上年已看到大口仔出左對結婚公仔...係原裝貨唔係A貨黎...不過咩都未定...算啦~~
之後又唔見有得賣...心想同佢都係無緣架喇...算啦~~~
今年新年前...無意中響吉之島既 Sanrio發現又有得賣呀!! 好開心...要帶埋阿 B 一齊買先得...終於響新年期間帶左佢地返屋企...好靚呢...而且中式夠特別...顏色好有喜慶色彩呢!!
響網上搵到阿 Ron 幫人整呢 d 車頭佈置...但我見到佢仲幫人整介指座...好特別...好靚...不過我欠缺一對大口仔大口妹既細公仔...上網周圍搵...拍賣...交換網...好多精品店...唔好話大口妹啦...細既大口仔影都唔見到呀!! 但係我記得係出過一 set 的...於是周圍留言 : 誠徵抵價的大口仔大口妹一對!! 估唔到第日就有回響...係阿桐啊...原來我上年送左比佢呀...即刻打比佢...佢仲話幫我周圍搵下先...無就送番比我都得!! 好開心呢~~ 搵到喇...!!
曾經諗過用大口仔黎改裝...我屋企咩 size都有...不過始終過唔到自己囉...咁咪要變性囉?! ~__~" 家下咩都解決到喇!!
搵到公仔...即刻 send e-mail 比 Ron...因為知佢 5 月唔交收...暑假唔交收...所以要快快快!!!
等左幾日...佢覆價錢比我...雖然都幾貴下...不過自己手藝唔得就要靠人架啦!! 而且佢既手工我好欣賞呢!!
佢好好人...什麼都 OK...仲應承可以暑假前比我添...太開心喇!!
佢會幫我整車頭佈置...介指座...同埋一個頸花...要黎外影用...仲約左佢April 1 交 d 公仔比佢呢~~ 好期待啊!!
放工出左去深水埗德祥睇下好咩o岩買...都幾多款喎...終於買左 d 花仔...絲帶...裝飾品...不過買唔到我想要既 lace同埋黑布...
之後去左金都...今次係拎左對大口仔大口妹中式公仔去改為西式公仔...呢套係333送比我架...嘻嘻...真窩心...佢真係對我好好架!! 話說我之前響網度徵求大口仔一對公仔...佢幫我出去睇呀...見到呢對大公仔就買左比我...仲話諗住比個驚喜比我添...點知我自己一早已買左...哈哈~~~ 不過無所謂啊...我仲開心呢...原本都心思思...想買多對黎改西式...而家 333 送比我...一來唔駛比人哦我浪費金錢...二黎更見証到友情啊...哈哈哈~~~ 所以我應承333...我會將佢地扮到好靚...仲會帶佢地同我地一齊影婚紗相添...
真係好開心。。。之前問過花得囍做禮服幾多 $$ ...佢話要500幾...仲要等到八月先可以取貨...oh...唔得...我五月要影相喇!! 之前行金都...見有幾間都幫人整呢d衫...問過下都係 400 幾...公仔衫仲貴過狗狗衫啊!!!!!
決定搵美塋坊幫我造...基本禮服300幾...不過我想要大口仔著黑色禮服...襯番阿B夜晚既禮服嘛!! 而且仲加多件閃閃背心...好型呢!! 女仔就要 lace 裙...加皇冠送珠鍊...埋單400幾...仲貴過對公仔 @@~~
好多謝 333 呢~~~ ^__^
今晚帶埋阿 B 去百利睇絲帶...不過原來 d 絲帶唔夠闊身...起碼要 38mm 造出黎先襯到個花球...不過min要訂100 yd啊...太多了!! 所以都係再考慮下先...
點知上網 search 其他公司...有間報到 800 幾蚊...唔係嘛?! 至平都要 500 幾...所以都係算了...唔訂喇!! 唔係太值啦~~
今日阿B上大陸玩健身...我一條友又唔想響屋企o牛...而且個風筒又比我趺壞左...所以決定出去行下街...
先去左百利...再問下d絲帶既訂價...都係叫埋阿B黎睇先決定...跟住睇下 d 租衫既鋪...有間叫做COUPLE囍...D款都OK...另一間 Charming Image都幾好...搵日搵埋同學仔黎睇下先得!! 再睇下d姊妹裙...真係好多間而且好多款...到時d姊妹一定搵到心頭好既! 嘻~~
之後又去金都...其實我想睇下有間叫做 Le Marrige新開既...o個度d 衫都 ok喎...唔似其他鋪頭d款...價錢又唔太貴...因為我想考慮響出面搵多間黎租兩至三件...而溫馨有一件轉比伴娘...所以要周圍睇下...
跟住去女人街搵打孔機...um...其實我好少行呢度...又唔清楚係o係咩位置...唯有由尾行番上前啦...行到成條女人街中間左右...終於搵到間賣呢d既檔口...佢話 $38蚊...之後話 $30賣比我...不過 d blogger話 $25都買到...我費事講價...拿拿聲試完貨走人...因為實在太熱...人太多了!! 不過...買黎其實唔知做乜...或者到時打落雪糕劵同餅咭個封套度...見幾得意...打出黎又好似幾靚...咪買囉~~ ...女人錢係咁易賺架啦~~ heehee~~
再行信和...買左大口仔個筆座...呢度平呀...唔駛60蚊...之前上網睇呀...賣成兩舊水...咪搶啦!! 雖然係2005年出既絕版貨o者!! 好鍾意啊~~ 到時或者用黎裝住d簽名筆...
另外之前都買左個擺設...唔知要黎咩用...不過覺得幾靚仲有心心添...就買左啦~~~
之後行行下先醒起...今日出黎行既主要目的!! 買風筒呀!! 拿拿聲走番去豐澤...本身想買番一樣款...不過都係試同一牌子既另一個款...但係原來麻麻地咋...原本o個款好用d呀!!
跟住 send msg 比阿 B...話比佢知我而家返屋企仲問佢落黎未...原來佢已經響羅湖喇...咁咪約埋一齊食飯囉...呵呵~~好野...唔駛自己食!!
今日無所是事...所以去行街街...真係開心...可以一齊去搞有關結婚既野...
首先去油麻地冠南華睇下對褂鞋既真身先...兩條友少搭地鐵...成個大陸人咁...去到出左閘見唔係呢邊出口...咁咪行另一邊啦...點知本能反應...一見入閘機就拎出八達通出黎o都...呃.....我地剛出閘咋...諗住算啦...蝕左由佢啦...點知又唔比出閘喎...真係超瘀咁拎住張八達通去詢問處搞惦...佢仲問我地響邊度搭黎...~___~" 好瘀囉...!! 如果我地o個張唔係八達通 visa 咭...佢可能真係當我地係大陸人呀!!!!
冠南華間野既指示真係唔好...原來係街鋪...個牌又點左我地入個舊商場入面...終於問實蕉先行到去...
睇到對鞋既真身...下...加左20蚊喎!! 幾個月咋喎!! 不過睇真個款又麻麻地咁...所以無試到添呀...阿B自從睇左對褂鞋之後...居然有少少認同我著金色 Converse喎...哈哈~~不過可能到時我又改變主意呢~~ 我鐘意睇 mood做野架嘛!!
之後去左行金都...都係巡下咁...好似唔黎就唔記得就嫁人咁...哈~~ 不過都無野要買啦...至多遲d再黎睇下d 頭紗手套...
行下信和...入左間狗狗衫既鋪頭...有狗仔禮服呀...成3舊幾水呀...不過 d 質地同個款好似麻麻地...上網再搵下先...阿細都要靚靚架嘛!!
跟住去左花墟買花仔整下個花園...有花開見到會好開心架!! 買左棵向日葵~~ 好靚呢~!!
***
之前買了本大口仔記事簿...哈~~~ o個條繩係夾左響我地大日子o個版架...真係巧合呢!!
今日約左溫馨下午試註冊時既拖尾婚紗...其實開始對呢間野有d 失望...太多限制了!! 為左生意唔夠體貼囉!!
去到 yumi serve 我...後黎先知呢個妹妹仔d taste好有問題...理解又有問題!! 今日我都體會得到...
先拎番上次 hold既比我試...不過我覺得好似唔係呢條...而且舊左好多咁既?! 之後又拎埋 d 我地上次 mark左 no. o個幾件出黎...都唔係咁既?! 你唔係求其博我唔記得下話?! 得條泡泡款既係o者!!! 是旦喇...咁試啦...唔好話"叮"一聲既感覺呀...係完全覺得唔係路呀!! 除左泡泡o個條...其他既唔係舊就係個款唔 ok...又叫我剪雜誌比佢睇心水選擇...拎黎既差天共地呀!! 究竟係咪耍我地啊?! 因為呢個仲有下次轉一次款既機會嘛...佢咪求其囉!! 簡直浪費我既機會...時間及精神呀!!! 好唔開心...佢之後仲越拎越古怪既衫出黎...真係無佢咁好氣!! 仲叫我 hold左條泡泡先...下次揀晚裝時再轉囉...真係好慶下!! 試左一個鐘左右...咁我駛乜專登請假黎呢下?! 放工黎仲大把時間啦!! 激到我死死下!!
離開間瘟神公司之後...落到街好失落又擔心...仲有幾套點揀呢?! 而且呢度好似無乜A-Line款...我唔想下下條裙都裝機關變魔術囉!! 唉.....
***
之後去左觀塘花得囍...想買對雞雞跪墊架...無貨喇!! 斷左貨添喇...!! 嗚嗚~~ 今日真係黑仔呀...咩都唔稱心順利既?! 好唔開心.....
買左個掛飾都幾靚既...不過幾貴下...
***
化悲憤為食量...去左九龍城食放題...咩減磅都拋豬腦後喇!!!!! 口亨!!~~
