20100724 再戰書展

今日約左細細佬一齊去闖書展...早幾日去過探路...大概知道條路應該點行...嘻~~

今日見到好多名人...有高永文...盧冠廷...黃貽興...真係笑話o個個李導演等等...

之前搞到滿城風雨的一眾o靚模...會展就見唔到佢地既真身...不過佢地既寫真真係好容易就搵到...其中周秀娜小姐的就最為突出...仲出埋 3D 螢幕添...搞到條路塞到...要搵實蕉黎扮人肉鐵馬開番條路出黎...

我地兩個一場黎到當然唔執輸睇埋一份...其實都無乜野睇既...只係著住泳衣又幾立體咁響你面前擺下 POSE...講真...爭住拎 3D 眼鏡黎睇既居然係女仔多喎...哈哈~~ 可能 d 女仔既心態係睇你有咩咁特別...而d男人就買隻牒買埋本書返去慢慢欣賞....!!

點解書展會搞成咁?!  度度都係賣呢d書呢~~~

今日有帶相機可以同 chocolate rain 個公仔影相...小馬既簽名籌一早已派完...不過我響塊 foam board 度見到佢簽左個大名...哈~~~

之後去左食 buffet ...其實都無咩特別...不過今年細細佬話請我食...真係食得幾開心!!  嘩哈哈~~ 我話佢變左...家下咁闊佬!!! 

今日其實收穫唔多....買左套雀仔印...個盒好靚...買埋個 stamp pad ...

買左本漫畫書...一本澳門既旅遊書...哈~~係新假期同 chocolate rain 合作的!!

今日 chocolate rain 好多野都做八五折呀...激死我呢~~ 好彩新貨無折都無咁心痛!!  買左兩本 postcard...送左兩個袋...真係超值!!!  仲平過就咁買個袋呀!!!  ~___~"

前幾日買左馬仔本書...不過唔記得加 $$ 換購個散紙包...遇到個超好人...肯比佢張 receipt 我去換購...真係唔該晒呢!!!

由五點幾行到十一點幾就走人 lu ...都逗留左成六個鐘...基本上三個館都行晒...但係睇唔晒咁多野...只係重點出擊......其實想搵 d 手作書...不過黃家細少爺成日無耐性等我慢慢睇...@@!!