因為好友抽到兩張入場劵...不過佢男友唔想去玩...所以就比左我地啊~~!!
開心開心~~!! 不過如果可以多d人一齊玩仲開心啊~~!!
當日放左工...就去左家鄉雞拿拿林食左d野...就揸車過海喇~~~
呢度d氣氛真係好過迪迪尼丫...周圍好多人都扮鬼扮馬...有時仲會埋黎嚇下你添~~~
周圍黑麻麻...我地其實唔知有咩地方係有野玩架...
只要見到有隊排就跟住排咋~~!! 哈哈~~
唔記得排左幾多個鬼屋了...因為其實都係差唔多...都係無拉拉有人出黎嚇下你...@@~~
反而排隊其間就遇到d好搞笑既人......
(1) 有對情侶自拍狂...響排隊等候其間...不停互相舉起手機自拍 & 合照...
表情又多多...好搞笑...從畫面睇...佢地既自拍功夫絕對係"神級"!!!
表情 & 角度都係好好~~!! (起碼睇畫面真係幾靚架...唔睇真人既話...)
我諗短短半個鐘...佢地影左廿幾張相都有...!!
到入鬼屋時...女既又無拉拉鬼上身咁好似極驚咁...?!
又唔肯行...又拉住佢男友唔比行...猛話唔行第一個...
連鬼都頂佢唔順...對佢講: " 你唔係行第一個...係第二個......"
佢先向前行...全情匿響佢男友後面...男既好似大俠咁趕鬼...女既響後面呱呱叫...誇得好緊要...
見到佢地咁樣...仲邊會驚比人嚇丫...好驚佢撞到我地就真...!!
(2) 另一對男女...唔係情侶...佢地好搞笑...排隊全程極少交流...
就算係講野都好似好唔熟咁...(但又呢d日子一齊黎玩...?!)
全程女既拎住手機同人傾計...男既初時仲開住架手機電筒睇書......
睇咩書...?! 居然係 " 人性的弱點 " ...真係夠搞野...!!!
(3) 第三pair 係極痴纏的情侶...或者我可以更正下...應該係女既極痴纏...男既極陶醉...!!
呢間鬼屋排左成個半鐘有多...響呢段長時間等候過程中...絕對唔悶...不過有點飽飽濟濟的感覺......
女既個樣係屬於國內可愛嬌嗲型...男既係普通男性物體...
佢地愛得極痴纏...平均兩分鐘就咀一次...女既仲間中不斷係咁咀佢男友...
有時甚至係猛拉扯佢男友埋佢身邊咀...睇到我地後面排隊既眼都突埋...!!!
咀不特止...還要 "chu chu" 有聲...真係撞鬼囉...!!!!
其實全程女既無望過我地既反應...大概佢眼中只有佢男友...
而佢男友有時都會唔好意思偷望下我地既反應......
我地只有報以微笑...哈哈~~~~ 我仲間中玩阿B添...
拉佢埋身邊扮咀...哈哈~~~~ 好好玩...!!
有抽獎遊戲...仲可以同鬼影相...之後可以 D/L 番...
哈哈~~~生日時纜車維修梗坐唔到...呢晚可以坐喇...!!!
幾年無坐過...原來上山都幾耐下......
落山我地揀坐海洋列車...因為要趕住返屋企餵細細啊!!!
阿B買左兩個會變色的骷髏骨...佢話遲D改裝安落架單車度...
夜晚去跴車極型喎...@@~~~~~
沒有留言:
張貼留言