2009年6月21日星期日

隔成個月先再運動!!

行完笋崗即搭的士去金光華...因為塞車...所以響對面馬路落車...在等過馬路途中...突然覺得個背囊好似比人拉住咁...我回頭望...發現有個人企圖拉開我背囊前面個袋既拉鍊!!!!! 好彩背囊條拉鍊唔太順暢...我朝早仲吟吟噚噚埋怨條拉鍊廢~~ 幸好幸好!!

佢只係拉開左少少...我話比阿B知...o個個人先識放開手...幾驚佢見東窗事發成個搶走呀!!! 我仲有部相機同本記事簿響入面架!!!!

o個個人仲大膽到完全漠視我地呀...只係見佢同遠處既人打左個手勢...我地估佢既意思係失敗左!! 大街黎架...而且我地周圍都仲有人...真係超大膽呀!!!

佢個樣唔似我地中國人...阿B話佢應該係新彊仔...大細佬話新彊仔就好D...只係會拉人地拉鍊拎野...如果係湖南湖北o個d就會 "界" 爛個袋拎野架!!!

好驚呢...!! 事後為左令自己無咁驚...仲搞笑同d朋友講...至驚佢拎走我本記事簿...因為好多結婚既野...行程都寫晒響度...如果無左就大鑊...!! 有個衰同事問我 : 有冇 backup?? 口亨!!! 仲叫我拎去影印做 backup呀!!!! ><"

呢個就係今次既出事背囊喇...我剛買左幾日...第一次用咋...仲諗住好抵...因此原價四百幾...之後特價三百幾...我再用cash dollar ...最後只係用左 $140 就買番黎既黑仔背囊!! 我貪佢夠簿身好輕囉~~~ 好彩條拉鍊唔多順o者~~~

之後為左定驚...去左 "燒東西" 食我至鐘意既 " 魚翅餐 " ...嘿嘿嘿~~~~

登登登...... 即叫即做... RMB10...

我無呃人架...呢個餐真係叫 " 魚翅餐 " 架... 魚 = 秋刀魚...翅 = 雞翼...個餐牌係咁寫的!!

仲有個餐叫 " 鮑翅餐 " ...即係鮑 = 小籠包... 翅 = 雞翼...如果改魚既就 " 飽魚餐 " ...好好味架~~~~

響金光華商場...地鐵出口o個層行到尾既左手邊就係架喇~~~ 下次影埋個門面先得!!

***

未運動就食食食... !!!! 呢個係我既動力...呵~~

黎到主要目的都係玩 spinning啦~~~ 未夠鐘有堂...跑住步先...慢步都出晒汗...跑幾野都熱到痴根~~~ 今日天氣真係好熱...有冷氣都頂唔順~~~

今日唔知係咪高班d既呢...跴既方法好唔同...仲加左d舞姿入去...@@!! 跴單車做埋d跳舞動作...條腰又要擰...隻手又要 fing~~ 不過運動量大左好多啊...!!! d 汗係咁滴落黎...我好少覺得出汗係咁爽的!!!

之後去玩步行機...玩左幾個字之後去沖涼 lu...做左兩個鐘頭運動...個人好似爽左...唔多攰咁...希望我有恆心落去啦~~~

不過...佢地次次做完運動都帶人去食好野...其實做黎都補唔番~~~@@!!!!

***

雖然上個星期已經慶祝左父親節...不過今日先係正日嘛...所以唔想黃老闆孤單一人渡過...所以我地約埋佢去食晚飯啤一啤啦~~~

細細佬唔黎做運動...所以無預佢~~~ 佢唱 K 就黎喎!!! 肥仔!!! 嘿~~~

今晚食中餐...五個人...叫到成檯野...不過真係幾好味~~~

父親節快樂!!!!

笋崗行

噚晚響沙田買左樣野響結婚o個日用...正搵緊文具中...突然醒起今日會上深圳...咁不如去一轉笋崗先啦...真即興@@!! 呢個就係我地喇...從來唔會計劃下先做既~~~

明明話早d上黎...都差唔多下午成點鐘先黎到!!

我地兩個懶人...一出關就走去搭的士...實在好熱啊~~

呢兩個"商場"...其實賣文具多...真正賣結婚用品既其實唔太多...不過真係平過金都賣既就真既!! 所以最好寫定大概要買D乜...上到黎買完就去搵其他節目就最簡單快捷~~~

首先我地去搵文具...問極都唔知咩叫 CUT 相角...成日拎部打孔機比我地...UM...都係算喇...響 HK買啦... 買左支小熱溶槍同幾次膠條 (RMB10 + RMB2 / 6pcs)...上次本來想o係德祥買架...好彩佢無貨咋...成三四十元一枝...@@~~ 如果買左我就溶左自己喇!!

去到好多 blog 友幫襯既鵬鵬...我地拎住個迷你子孫桶覺得幾得意...不過都唔知應該問邊個幾錢先啱...其實店裡面仲有另一pair人響度買野之嘛...咁都無人理我地...咁我地唯有去第度睇下先...呢間野我地黎過幾次架喇...不過無次有人理我地...或者我地個樣唔似有幫襯既人掛...我想響度買個囍字蠟燭的...~___~" 係呢間我先見到咋...唯有下次比多次機會佢做到我生意啦~~

跟住周圍行...都唔記得行到去邊座既頂樓...買左兩個花籃仔...我唔知 HK 賣一個花籃幾錢...不過見順眼就買左兩個 (RMB30 x 2) ...仲買左幾個衣架 (RMB28 / 4pcs)...幾靚架...有 lace有花花有絲帶咁 ...姣姣地啱晒我...呢間價錢企硬...點都唔肯減...唉...我地係最易放棄既人...所以只有乖乖比 $$... 天時熱...人就會失理智...不過後黎發覺佢地收少我地10蚊...@@~~

去睇下d花籐...不過阿B都未諗惦點佈置...所以都係得個問字...又要遲D先買...都好既...費事通屋放...家下屋企已經亂到唔可以招呼人黎玩喇!!!!!

本來想買d絲花...不過我都未決定用咩款式花球...所以襟花手花呢個項目又要延期進行喇...而且太多款式...我既選擇恐懼症又發作了...所以都係決定遲d先再買啦~~ 或者...到最後買現成算了...皆因我實在太懶了~~~

買左D籐波波 (RMB30 / 16pcs)...我地見幾得意...用黎擺響 receiption 丫下d地方應該唔錯喎...其實我地都無乜計畫...見到就話咁咁咁...不過都幾開心丫...幻想下o個日係點都好丫~~~呵呵~~~~ 老闆娘好 nice ...所以我地都無乜所謂就買左呢d唔等駛既籐波波喇~~!!

之後買左d利是封...囍字紙杯 (RMB6 / 50pcs)...花瓣 (RMB2 / 100pcs x 4)... 其實仲有好多野未買齊...不過無咁多手拎野喇...下次再黎掃貨~~~

我細細佬成日都話想要隻七仔...都唔知有乜咁得意...RMB5 求其買左隻比佢了左佢心事...哈哈~~~ 另外見咁熱...買左把大口仔老翻扇 (RMB5)...幾搞鬼架...按個制識彈開黎架...如果識自動撥涼就 Very Good 喇...熱到痴左~~~~

以下物品就係今次同早前響德祥買既收穫喇~~~~ 支閃拎拎既指甲油同埋d星星電話繩係阿B買既...佢要黎做佢既神秘 project架...哈~~~唔通佢想扮女人比個驚喜大家?!

丫...幅大口仔 Puzzle 係響 HK Jusco 買既...貪得意影埋黎充數o者~~~ 特價架...HK$30~~

行左兩個鐘左右...其實我地未行完...不過約左大細佬響金光華等...所以要徹退了...!!

對於講價...我地真係唔在行...下次要帶埋大細佬黎先得...佢成日流連深圳...係佢先搞得惦d大陸同胞呢~~~~

好歌~~

簡單愛

今天你要嫁給我

愛很簡單

小酒渦

畫紙上的指環

2009年6月20日星期六

第一次行珠寶展

公司的清潔阿姐比左兩張珠寶展邀請咭...叫我去開下眼界...!!

阿B話陪我去...佢仲話會記得唔帶張 Credit card 去...哈哈哈~~~ 我講比阿姐聽...笑到佢丫...!!

第一次黎都幾緊張啊.. .保安幾嚴咁...仲要排 pass 先入到去...入場仲要 o都機做記錄...@@!!!

嘩~~~ 全場都閃呀閃咁...都唔知點開始行...心目中有樣野想買...之前睇過下出面d金鋪...都幾貴下...睇下呢度有冇心水先得...

行開間間都叫我地試下戴下...好似唔駛 $$ 咁...第一次試帶條七卡既鑽石鍊啊...好大粒...真係幾重手下...不過成七萬六呢...邊有 $$ 買丫...試戴過都心足 lu...呵呵~~~

睇到好多珍珠...鑽石...水晶...多到好似好假...@@~~ 見到好多阿太...佢地真係黎掃貨咁...係咁試戴... 香港人幾時都係咁有米既~~

睇左幾間都唔係幾啱心水...去到有間叫萬利珠寶首飾...睇左好耐...有件啱心目中既 size ...不過咁貴...算啦~~~到我有 $$ 唔等駛先買啦~~~

阿B響度買左樣野比我呀...好鍾意...好開心!! 唔帶credit card...有 ETC都得~~!! 哈哈~~ 多謝你既結婚禮物...至於係乜...大日子o個日就會見到架喇!! ^^

不過個 sales 唔多 pro ... 用埋佢個放大鏡都睇錯我隻介指...不過我覺得佢唔識用就真...真失敗...我隻介指係有証書的...而且係半卡...佢肉眼都睇唔出有 50份?! 初時仲話唔怕得罪講句話我隻介指麻麻?! 當佢知道真相後...佢個樣好尷尬囉!!! 你識野唔識野!? 你係咪做呢行架? 之後仲問阿B係咪做呢行...阿B話只係買介指o個次上左兩堂...佢當堂無聲出...... 你唔會賣假野比我地嘛?!

＊＊＊

買完想睇下d 珍珠耳環...不過都唔係幾啱款...

之後睇下d朱耳繩...我都係啱睇呢d多d...哈哈~~~ 發現有間賣銀器架...雙眼發光!! 我至鍾意銀架喇...!! 初時無乜人睇入黎睇架...之後多人到迫唔到出去@@!!!

用重量黎買銀器我都係第一次...原來銀真係好平...怪唔得我d 朋友成日話我...鍾意d平野...但係就用好多 $$ 黎買 d 唔值錢既野~~~ 例如: Tiffany... agnes b 既銀飾...!!

係咁買買買...阿B都有買架...不過佢買英文字...大 "J" 大 "B"只係十幾廿蚊 ...細"J"細"B" 都係幾蚊一隻吊咀...Tiffany...agnes b...實在令我又愛又恨 ><"

買左 3 對耳環...簡簡單單既心型...圈圈o個對係 K金黎...響第二間買既~~ 呢對成5舊幾...@@~~ 阿B叫我買啦買啦...咁就買左...之後我覺得其實都幾貴呢~~

呢隻3色介指好特別...係立體既...戴響食指好靚架~~~ 另外蝴蝶係我既偏好...所以就唔駛諗就買埋啦~~

仲有橙色既銀器...好少有... 個心型鍊咀係立體的...因為幾重下...係咁多樣野中最貴既...買左兩個...其中一個準備送比...............某位同年結婚的朋友!! 用黎紀念我地同年結婚呢...呵呵呵~~~~ 用條長d既銀鍊黎配...好睇又型呢~~~^^

條心型鍊係我至鐘意既...

其實我入左呢間鋪兩次...如果一次過買滿 100g 有折呀...後黎阿B係咁哦我...話我蝕...哈~~~因為我唔要隻銀手鐲...佢覺得幾靚...不過我隻手瘦...我對手鐲麻麻地鍾意...所以唔要囉...佢話我而家已買左80g...加埋隻手鐲 (30g)...即係比而家應該平200蚊呀...呃...唔買野都比人話...真係第一次!!!

最搞笑係...我地買完第一次時...開單都搞好耐...因為張單係人手抄寫...寫 no...重量及價錢... 之後行行下...諗諗下都係買埋對心心同埋o個幾隻介指...所以都係返轉頭買...阿B見人多就叫我自己入去...不過睇睇下...我見少人所以想搵佢研究下買邊款好...打比佢又唔通喎...所以我係咁望出面...個sales好搞笑...話比我知阿B響遠處講緊電話...@@~~~!!! 咁都認得我地?! 之後仲叫佢同事幫我叫 "o個個著藍色衫既男仔" 過黎... 哈哈哈~~~

之後比錢...個收銀仲搞笑...好大聲對住我話 : 又買?! 佢個樣真係好搞鬼的!!! 哈~~ 我地真係咁易認咩?! d 人見過我地一次...成日都認得既?! 真係唔好做壞事...實比人認得出...哈哈哈哈~~~

我只係可以買呢d 玩具架咋...不過都好開心呢...戴呢d無咁大壓力...唔見左都唔心痛...heehee~~

呢度太大喇...仲要分幾個hall...我地只係行左一個hall 咋...都行左3個鐘有多...

珠寶展真係令我大開眼界...下次都想黎...嘩哈哈~~~

＊＊＊

之後去左尖咀 Tiffany 問野...無貨留底左電話...um...希望有貨啦~~~my dream呢!!!!

再搭 MTR 去旺角睇腳架...不過佢睇唔啱...我話送支好D既比佢...貴D唔緊要...至緊要係輕身D...佢成日腰痛背痛...唔想佢負擔太大呢...!!

夜晚響朗豪坊又食 Pepper Lunch...兩個都係食牛肉炒飯...好香好好味!!! ^^

真係咁抵?!

以下是朋友介紹...我未親身去食過...唔知係咪真係既呢?! 金光華...就係我地做運動o個個商場啊...下次做完可以去試下呢~~~ 又食?! 咁點減肥呢?! ＠＠～～

＊　＊　＊　＊　＊　＊　＊　＊　＊　＊　＊　＊　＊　＊　＊　＊　＊　＊　＊

吃足六小時的上井之旅

等到頸都長埋既長假期終於都來到，咁難得當然玩大佢，相約老友到深圳三日兩夜勁食之旅﹗

深圳金光華既上井精緻日本料理﹗

怕無得食我地五點已經o黎到，岩岩有位可以入座﹗

乜鬼都任食，你想到的日本料理都有，可惜的是沒有紅白酒供應，只有啤酒及清酒梅酒等任飲，如果有會更盡興﹗

大花甲蒸蛋，蒸得又滑溜又香，食家大讚﹗

日式海鮮湯以的骰的茶壺上枱，用蝦、蜆及蟹肉煮成，吃得出的鮮甜﹗

酒水任叫當然唔同佢客氣，梅酒平時好少飲，試下先﹗

酸酸甜甜相當醒胃，唔餓都飲到餓﹗上井呢次大鑊了﹗

燒鱈魚扒好香牛油味，食落肉質軟熟無腥味，不吃魚的我也吃了一塊﹗

燒芝士蝦蝦身爽口又彈牙又大隻，配上微溶的芝士同吃，正﹗

燒響螺片能吃出微微的清香，有咬口亦甜美﹗

呢度必吃回本之作，就係任食刺身﹗

唔差架﹗睇到都覺得新鮮﹗

老實講如果你吃得到刺身的話，一個人食碟呢個刺身拼盤已經差不多回哂本﹗

當然刺身味道未能與香港貴價的相比，不過如與三十幾蚊碟的元氣元綠等比較，我覺得上井的更鮮甜同新鮮，應該是因去貨快，人人都叫，刺身師傅就慘喇，切到手唔停﹗唔方唔新鮮﹗

連一向任食場必難食的海膽，也毫無腥味，不過略欠海水鮮甜﹗

有刺身點可以無清酒﹗不辛辣有米香，甜甜的很易入口﹗

海鮮方面，燒芝士扇貝很好吃，芝士內有金菇、冬菇粒及煙肉提鮮，更惹味﹗

燒蠔夠哂大隻，配上金蒜同吃肥美動人﹗

日式牛肉刺身，食落好軟熟又香又無渣，無腥味血味的，值得一試再試﹗

燒鰻魚相當肥美，友人一路吃一路讚﹗

從未吃過的溫泉蛋都係任食﹗不過我唔太頂得順生吃雞蛋味道﹗

雪糕就唔洗講，某女性友人一個人吃了六杯面不改容﹗

當然生啤不可少，是Asahi日本來佬貨，保守估計我地呢六個人飲左十五jug以上，咩都抵番哂﹗

食得飽飽地當然係玩下啤牌啦，無人理喎﹗

各有各食，職員見到都唔太黑面，仲幫我地不停加酒加食物，呢六個鐘真係辛苦佢地了﹗

最後仲一人一個魚子醬雞蛋作結，近乎完美﹗

最後幾個變態的人由五點吃到十一點，飲飽食醉埋單一人$188人仔﹗在深圳算是高消費，不過當你親身感受到自己吃了什麼喝了什麼，就會覺得抵到爛﹗

比起上次來深圳吃的「大漁」味道更形出眾，樣樣都精緻又的骰，睇得出的有心機，食物種類更繁多，刺身更新鮮，環境亦更浪漫，未見有任何走單的情況，叫左咩食等一陣就o黎到，很不錯﹗

值得推介的一間自助場，來深圳要吃個飽玩得開心，來呢度無錯的了﹗