J & B 開心又無聊的生活點滴部落格

2010年5月16日星期日

2010-05-08 即興長洲遊 (Part 1)

上星期六...朝早去中環打埋第三針阿 sa 針...打完痺到呢...唔知係第三針係特別痺定係換左人幫我打既關係...呢支針打完又痺又痛左足足成日......終於都打晒三支喇~~~ 一個婚禮令我受左好多皮肉之苦...哈哈~~

打完針...拎埋上年既婚前檢查 report...呵~~其實打第2支針都可以拎架喇...不過我地又大懞...走左至記得...雖然姑娘響電話已經講解過...不過點都要拎番份野既~~!!

本來阿B話去健身的...而且已經拎晒衫褲洗頭水各樣野...不過我即興想話入長洲行下...佢又陪我顛...所以兩個茅利就行去中環碼頭喇...其實都唔多識路...只係一路向海既方向行......見到 IFC 就中左入去...見到指住中環碼碼頭既路牌就跟住行......終於都去到喇~~!!

成十年都無入過長洲喇...而家原來有架快速船呢...半個鐘就到喇...!!

一去到第一件事就走去買太陽眼鏡...沙灘拖...哈~~ 好有遊客 feel~~

咁多年無黎長洲...不過感覺無乜大改變...碼頭都係佈滿海鮮檔...周圍都係租渡假屋既 counter...

一年一度既太平清醮搶包山盛事將會響佛誕o個晚舉行...而家已經開始準備喇...

行左一陣...烈日當空...所以我地都係決定食左 lunch 先去行沙灘.......咁多間選擇...見呢間多日就中左入去喇...$168任揀四樣海鮮...其實間間都差唔多價錢........

下午食海鮮...真係第一次...哈~~ 賣相 ok...不過 d 虾仔同d賴尿蝦就麻麻啦...始終海鮮都係大大隻先夠鮮味...不過算啦...百多元仲想點?! 呵~~

．．．．．．　待續　（ＰＡＲＴ　２）．．．．．．

2010-05-08 即興長洲遊 (Part 2).

2010年5月7日星期五

慶祝朋友仔生日

今日係朋友仔既正日生日~~ 我地成班人約左去食正宗韓國野...生日快樂呀~~裙!!

其實我次次食韓國野都係食燒烤...就算去韓國食地道都未食過呢類形式既野...不過我始終都係鍾意食燒烤多D囉~~!!

食韓國野...一定會擺到成檯都係小菜...其實都麻麻地...好似好大堆頭...但實際唔係咁好食~~

我地叫左個六人套餐...第一牒係韓式沙律...但係D芝麻葉真係好難食囉...我情願所有都係生菜~~~ D 年糕又無味喎!!

第二樣係腩肉生菜包...加埋D麵是醬...爽爽地幾好味~~

第三樣係銀雪魚...哈~~無想過食韓式有呢樣食呢...好似食緊日本菜咁~~@@~!!

第四樣係海鮮煎餅...又幾好味啵...!!

第五樣係我地好期待既烤肉...不過唔係自己燒啦...係有專人服侍...我都係鍾意自己燒啦~~~ 佢差在無餵埋我地個口咋~!!! UM~~

第六及第七樣都係有專人代燒既雞肉及帶子.......味道都唔錯...不過咁樣食野我覺得唔過癮囉!!

第八樣係牛肉麵...牛肉賣相好靚...不過可能煮得太耐...食既時候d牛肉好鞋囉!! 不過個麵都幾好味既~~!!

之後上埋糖水...真係好糖水下......有姜味有糖味.......再黎埋生果盤...呢個令我大開眼界既正忠韓國料理就食完喇~~!!

如果今次另外幾位朋友都有出席就好啦~~~起碼可以傾下點處理上次中左六合彩點用...hahaha~~ 唯有等下次啦!!!

2010年5月4日星期二

世界最小級積木
河田(KAWADA)於西元1952年創立，在日本推出大人氣的mamelog（nanoblockR）4mm x 4mm世界最小級的超迷你積木，更適合用來組合出細緻的造型，mamelog系列將nanoblockR積木做成禮品包裝，讓收到禮物的朋友在組合中得到更多驚喜，組合後的成品更適合長久的收藏。

簡單設計
小朋友大朋友都可以玩，最短只要10-15分鐘就可以完成一副作品。

變化多樣
除了隨附說明書記載的組合方式，使用也可以挑戰自己的創造力，做出不一樣的變化。

2010年5月3日星期一

20100501 夜釣墨魚

今日約左班朋友仔出海釣墨魚...早在十年前左右去過一次...不過我地全艇人都係無收穫...只有船家有收穫......其實我對釣魚興趣麻麻...因為我唔鍾意搞d魚餌...d味道好難聞...哈~~所以我都係做唔到稱職既太太啦...我好怕烏糟!!

未出發之前...去左 1881 出面影左陣相...其實我都係第一次黎呢度.......

之後響集合地點~~~ 鐘樓又影左一陣...感覺自己好大陸人...哈哈哈~~

尖東夜景真係好靚...但係太多大陸人喇...好點嘈......

架船遲左成廿分鐘先黎到...只係有點過份~~!!

上到船...出左海一陣就先開餐...到會既野...有 sandwiches, 雞翼, 腸仔...飯...炒麵等等...都幾大堆頭...味道比想像中好喎!! 食得好飽...哈~~~ 一陣出到海...如果暈船浪都有野嘔下......哈~~~

等左成晚...全船人都係同一動作...不過墨魚影都無見過.......只係見到好多魚仔同埋水母......正當失望同埋好多人已經放棄既時候...突然發現幾隻墨魚蒲頭...個個都發出歡呼聲.......哈~~~不過船家大概驚我地臨尾先黎有收穫...變左佢要幫我地整...所以急急話要回航了...呃~~~ 真係狡猾啊!! @@~~

今晚又整到隻右手...UM...再係咁不斷整親....我會唔會變殘廢呢?!

2010-04-30 逛一田

公司兩位的同事的愛情結晶品響早幾日出左世喇...係仔仔黎架~~恭喜晒呢!! ^__^

所以今日放工就去左一田行街街...睇下有乜可以送比佢地個寶貝仔啦~~~ 睇左好耐...其實都唔太識買 BB 用品...離不開D衫褲鞋襪...而家又減緊價...好多都好得意好靚呢~~ 怪唔得有D新任媽咪既 bloggers 會買到唔停得手...著實真係太可愛......!!

行左兩個幾鐘...終於有所收穫...麵包超人系列...帽仔...和尚袍仔...口水肩...手套仔...腳套仔...好得意啊~~~ heehee~~ 加埋對雞仔鞋...不過對鞋應該要等佢一歲...學行o個時先啱著 lu...希望兩位新任爸爸媽媽會鍾意啦~~~

而一田而家做緊 promotion...買滿 $880 (其中一樣物品要係雨具系列)...咁就會送個迷你聾貓環保袋...公司有位妹妹仔同事極鐘意呢隻~~樣子怪怪肥o都o都既物體...問左仲有得換...所以去買左把防 UV 雨遮...去 Sanrio 買左d野...夾夠數目就換左一個喇~~~登...登...登.......不過比想像中細個啦...都唔知裝得乜...不過佢都唔會捨得用架啦~~~呵~~