FACEBOOK 的發明...真偉大...

Hong
July 21 at 11:45pm
多謝妳在facebook同我做朋友呀、、、、哈哈
聽問妳會做九月新娘是否眞的嗎？？？

Jovy
July 21 at 11:57pm
九月我生日咋喎...haha~~
係十月呀...想搵你做兄弟得嘛?!

Hong
Today at 12:07am
我想做姊妹多的！得唔得
油脂早過妳還是遲過妳呀！點解妳地唔一齊呀！
我會荷包嚴重重傷..........惨慘惨

Jovy
Today at 12:11am
我又唔係同油脂結婚...點會一齊啊...哈哈~~~
油脂遲我一個月呀~~
我講真喎...LB真係想搵你做兄弟啊~ 已經搵左油脂了...只係未搵埋阿松啊

Hong
Today at 12:21am
妳在十月幾多號。
如果是星期日就問題不大啦！
但是妳撰擇平日..................我...我.......我.....？

Jovy
Today at 12:24am
我十月十八日呀~~~為左你地...我地特登搵星期日架!!!!
油脂係星期六呀 (十一月廿一日)

Hong
Today at 12:38am
真的難為妳呢.......為咗我地！
如果真的需要到我這個姊妹，到時通知我啦！
恭喜妳同 LB 年月日都生貴子

Jovy
Today at 12:40am
係呀...你地成日催我嫁丫嘛...heehee~~

咁我地預左你架喇!! 唔該晒...哈哈~~
我班姊妹又多個對付對象喇!!

我遲d再call你啦~~~^____^

***

以上的文字是節錄自我的 Facebook Inbox

估唔到...人與人的聯繫...以前要靠飛鴿傳書...再而是郵寄信件...接下來是電話通訊...這樣已不能滿足大家了...而家已經進化成~~~在 facebook 內溝通~~@@~~~ 邀請兄弟....哈哈哈~~~ 真係意想不到!!

細細~

姊妹情

早前為了姊妹裙心煩了一陣子...聽晚就去揀衫度身了...我發覺至緊張o個個係我...因為自己諗左好多好多問題出黎...其實都未發生...只係我自己在想多了......

經過一輪討論...顧慮到幾位姊妹唔想著短裙...所以最後都達到共識...著長裙~~

先前一直怕伴娘唔鍾意著長裙...堅持要著短裙...一直都唔敢向她提出各人的意思...可能亦因為已租了一條長裙給她...而佢當日身份係特殊點...反而佢著長短都無大影響~~ 所以係決定晒...仲要係佢打電話比我先再問佢的意見...出奇意外地...佢話長短也沒所謂 @@~~ 而且佢話如果係長裙就唔駛做多條比佢了...反正佢覺得租o個條個款都幾靚... 佢既答覆令我好意外...其實無論點解變化都好...好感激佢既體諒.....

始終同佢都係好多年既朋友...朋友相處當然會有爭執的時候...其實我幾鍾意同佢相處既方式...唔鍾意就會發晒出黎唔會放響心內...bi li ba la激動過後就無野...不過我地唔會係鬧交既...亦唔會記在心內...所以我地既感情屬於細水長流......

而且佢為左我呢個婚禮...都出過不少力...陪我去睇衫試衫試妝...買野傾野...有時甚至請假陪我去...比左好多意見比我...一直都無乜怨言...換轉係我都未必做得到.....不竟要花很多時間及精神.....

早幾日...佢問我而家有咩搞緊...我話比佢聽買左d絲花準備 DIY 襟花 & 手花...佢話比我聽學過下...不如去我屋企一齊搞...其實有時我會比佢無咁細心...佢話一齊搞可以快D完成...咁多野搞要有人分擔下... 聽到呢番說話...好開心...好感動......

之後再傾下當日既流程...佢同我一齊分析分配人手既問題...算係有個初稿了... 同佢又變得好似以前咁有商有量.....大概先前因為搞婚禮的事令我們疏離了...我也發覺自己變得多愁了...太多野去想...去顧慮了...變得不似以前般爽快開朗...有時怕會煩到別人...變得唔敢開口請人幫忙...成日認為婚事應該唔好煩到人...請人來高高興興吃一餐就可以了!!  變得令自己好大壓力...驚搞得唔好...驚呢樣...驚o個樣...變得每事都猶豫不決...解決不了就去逃避...甚至乎在發自己脾氣......發忟憎......發花顛.....

原來姊妹就是姊妹...總在某些時候會扶上你一把.....

***

上個星期某一晚...看到電視播放既 "  霎時感動" ...故事講述有三位好朋友C, D, E去海邊玩...阿C 同阿D突然因為某件事發生左爭執...期間阿D推左阿C落地...阿C一聲不響就在沙上寫上 : " X 年X月X日...阿D在這沙灘推倒我在地上..."  阿D看到阿C寫了這一番話...覺得阿C好小器...咁少事都要記住?!   好嬲就走左去...阿E勸阻亦無效...

無幾耐阿D望見阿C被大浪衝左出海正在掙扎...阿D諗都唔諗...忘記左佢地還沒和好...即刻跳落海救番阿C...

阿C上岸後...一言不響就拿了一塊石仔...在大石上刻上 : " X年X月X日...阿D在這海中救了我一命... "  呢個時候阿E再忍唔住問阿C...點解你剛才在沙上寫低阿D推倒你既事...?!現在卻在石中寫佢救你既事呢?!

阿C就話比阿E聽...朋友爭執在所難免...將唔好既放響D容易被風吹走既地方...好快就會唔記得...唔好放唔好既野在心上...

而朋友對你好既...就要放在一處唔容易被風雨破壞的地方...要好好地記住...

三位好朋友最後歡天喜地相擁而去......

***

故事好簡單易明...其實上述既故事...我聽過無數次...意思絕對容易明白...但係知易行難...到而家...我還沒有真正的做到當中的意義......或者每個人都不會為別人設想多一些...總只站在自己的立場去想要人遷就.....變得任性...

***

其實自己也算好運的人...身邊朋友總會幫上自己的忙...其實我成日都對人講...有人對你好唔係代表你人緣好...係因為對方好人罷了...我絕對相信的!! ^___^  我身邊太多好人了!!   錢我就儲唔到...這種福氣就儲了點點...heehee~~~

說了出來...心情變輕了......其實我要放鬆自己...應該好好去享受一下...不過我個人一有得享受就會懶...而家先挑起團火搞呢樣o個樣...@@~~ 有點擔心自己樣樣 DIY 都整唔黎...哈哈哈~~~

我們的囍帖

我地會有兩款帖呀~~~ 中式係酒店送既...無得揀...!!  西式我地遲d會再去揀...不過應該都係呢款喇~~!!

中式帖 sample :

紅紅金金...好囍慶~~!!

有埋酒店既地圖...希望 d 人識黎啦~~~

西式帖 sample :

(未定實款式及顏色...心水是紫色...浪漫丫嘛!!)

暫定係呢款先~~~呢款係雙頁款~~~ 米黃色都幾靚幾grand~~~ 雙頁貴 d ...不過靚好多呢~~

呢款係單頁款...無得借走...用相機影出黎...紫色啊!!  好浪漫呢~~~~ 張帖質感好正啊!!  不過影得唔係咁好~~

單頁平 d ...不過太簡單...

我地應該會揀雙頁設計...

又再踏前一步...日子真的好接近了!!!  yeah~~

 

終於Book 左出門酒店喇~

夜晚約左 Royal Park 睇套房...見未夠鐘就周圍睇下...好多人@@~~ 而且好多大陸同胞...咪睇少佢地...真係好富貴~~ 消費能力真係好高呢!!

我地出左外面睇下環境...

都好大喎...泊架花車響呢度影相好正...我見好多 blogger 都響度影...好靚呢~~ 夠寬敞~~

酒店大堂好大...不過可能夜晚人太多好似混亂左d...

跟住叫左 Jacky 落黎...佢帶我地上 17 樓睇房... Lift 口企左個實蕉...要客人 show 房咭先入得...不過佢話唔駛驚...只係夜晚人多先會有實蕉...驚d人入錯lift喎!!   朝早係無實蕉既~~

入左 lift 要插咭...即係你只可以上你住o個層...如果無記錯Jacky好似話大概有十幾層有套房...不過每層只有兩間~~ 佢話到時叫個姊妹拎張咭落黎接d兄弟上去玩喎~~!!

響走廊度...Jacky話比我地知...佢地房間隔音設備好正...所以可以盡情響房內玩得盡興d...@@~~ 不過佢話走廊就唔好囉...唔好影響其他住客嘛...而且佢話最好唔好玩d落街收集人地既祝賀說話o個 d 遊戲喎~~ 都係o個句...唔想影響其他住客~~

入到房...真係好大...一睇就好鍾意喇~~ 850呎...比 Metro Park 多幾百呎...仲有兩個廁所添...個廳好大...90度角窗好大...Jacky 話影相會好靚...朝早會好光猛...遠望獅子山景色...當然單數房個 view 好 d...雙數房無拉拉出面有一棟好高既大廈...景觀差d..!!  睡房入面個廁所真係好大呢...佢仲叫我到時坐響度化妝...有張化妝椅的~ 張床 king size...訓幾個人都得~~ 個衣櫃好細...基本掛唔到件婚紗...掛套褂就得~~~ 不過我都係掛褂o者~~

Jacky 話基本上可以郁d傢俬...不過唔可以整爛...郁左唔駛還原...我問佢中間張sofa重唔重...佢話好輕...仲即刻一隻手抬起一邊比我睇...@@!!!  佢話近窗邊有個位 for 斟茶... 如果唔記得帶跪墊可以用椅o個張...佢話張椅無左個墊都坐得好舒服喎~~~咁都比佢諗到!!

之後佢繼續依依哦哦...話比我地知房內唔准燒香燭...不過可以點佈置都得...都係o個句...唔好整爛野...要賠! @@~~ 佈置完既物資...如果我地唔要番既可以唔駛清除...佢地會有人搞番惦...

基本上我地都唔駛問佢野...佢係咁依依哦哦背書咁講晒比我地知...

有關延遲退房佢話要睇番當日入住情況...如果比 credit card 做 deposit 既話...到時check-in一定要我地本人...check-out 就可以搵其他人...比 cash 做 deposit 既話就要本人去簽名...可以到時再決定~~

我地問佢影相得唔得...佢話無問題...所以我地係咁影...不過間房太柔和了...好暗...所以影出黎唔太清...

佢仲教我地可以駁條線入房...架電視機可以播廳出面既情況比我睇...哈~~ 咁我咪可以睇到班姊妹點招呼d兄弟囉?!  諗起都好興奮~~~ 嘿~~嘿~~嘿~~~~

睇完房...出番 lift 口...影番轉頭...好長的一段路呢~~ 真係唔錯唔錯...怪唔得好多 blogger都搵呢度出門啦~~ 有一刻在想像自己響呢度著住褂出門既情況呢~~

Jacky 話到咁上下出門時...先call 架花車駛去樓下接我地...因為新世紀泊車平d ($22)...酒店泊車就 $50一個鐘呢~~ 佢話可以有30mins free...所以到時可以咁上下call兄弟響隔離駛d車過黎...基本上兩個停車場係相連的...!!

最開心就係佢仲好貼心咁話比我知...到時唔駛咁急一箱二箱搬d野走...可以寄響 lobby 度一日都得...到咁上下叫d兄弟黎搬過去 Metro Park...真係好啊...我地正擔心要搬好混亂呢!!  聽到真係好放心!!!

落番 lobby...呢度先至搞笑...我地話比阿Jacky生知決定即時book 埋房...佢居然唔係帶我地去 receiption...係帶左我地去部打得出街既電話機度 (就係上面o個幅相...我拎住電話筒o個部喇)...我地以為佢又要 call 第個落黎...?!  因為呢間酒店分工相當仔細...每一部份都有部門跟的...下下要左轉右轉~~

點知佢講完一輪電話...跟住比個聽筒阿B...叫佢同訂房部講話要訂房...跟住佢同我講失陪先@@~~~ 跟住就一支箭咁走左去......下?!  走得咁急?!  你係臨時演員黎架咩?!  @@!!!!!!!!!!!

我地兩個企響度...打電話訂房...講 credit card 資料...響電話比晒資料人...個電話仲係別人幫我地打...其實係咪打去訂房部都唔知...哈哈~~~~真係感覺有d似街頭騙案呃人既情節囉!!  真係唔相信家下d酒店既服務係咁唔得!!   如果呢兩日都無e-mail收到 confirm通知...大家可能會響下集警訊見到我地打格仔比人訪問既樣~~!!

***

之後去番新世紀搵野食...又見到變型金剛...今次同佢黎張合照先得!!

禮服穿著時段

禮服穿著時段
除了依據體型的條件外，選擇婚紗還需注意與時間和場地的配合，不同儀式、不同場合所穿的服式亦有不同。 日間和夜間所到的會場不同，因此需考慮在不同場合時應穿什麼禮服，希望在某個程度上堅守著應有的禮儀。
一般來說，若婚禮在教堂進行，婚紗及禮服可以選擇華麗款式，裙擺以七尺為佳 ; 在婚禮進行時，新人通常是背對著一眾觀禮嘉賓，所選婚紗的背部設計、頭紗的層次和質料的選擇就顯得十分重要 ; 如果在婚姻註冊處舉行結婚觀禮儀式，款式可以簡單大方，裙擺亦不須太長或複雜 ; 而晚宴期間，不同時段的項目可以配襯各款晚裝。
下列是一個簡單的建議:
1600pm – 1800pm 中式裙褂
於婚宴開席前和斟茶給長輩時穿著裙掛，與到場的親友拍攝留念 ; 選密地、疏絲、疏金或珠石裙褂
1800pm – 2030pm 晚裝
與賓客拍照時段，由於是最多拍照的機會，應選擇自己最喜歡及合襯的晚裝款式
2030pm – 2100pm 婚紗
進場(match in)、新人上台切餅儀式及致辭，全場焦點所在，宜選隆重而高貴的婚紗
2100pm – 2130pm 晚裝
玩新人環節，選擇輕便而不易走光的款式，一來可與眾同樂時可輕鬆自在，又可減低因動作幅度較大時走光的情況，以免失儀引起尷尬場面
2130pm – 2230pm 晚裝
在敬酒時段，宜選背部有特色的晚裝，以最美的姿態與親友作近距離接觸，表現新娘性感柔情一面
2300pm – 散席 晚裝
送客時間，適合A字型線條的晚裝/旗袍，可盡顯新娘的身裁及大方得禮   *** 完美頭紗 舉行婚禮，頭上的薄紗令新娘的容貌若隱若現，增添神秘感。 怎樣才可以找一頂完美頭紗？除了婚紗店提供的款式外，你也可自己預備。要選擇完美頭紗，可以留意以下要點： 長度 頭紗中最常見的長度是 Elbow Length，即是剛到手腕的長度。除此之外，還有 Waist Length（至腰間）、Waltz Length（剛到地）、Chapel Length（小拖尾）、Cathedral Length（大拖尾）等。 圍邊 圍邊方面，最易配襯的有素淨的 clean edge、小線條的pencil edge、絲帶邊的satin edge及優雅的lace edge，而當中最名貴的是lace圍邊的大拖尾頭紗。不過由於這款圍邊的線條較粗，若再配上設計複雜的長拖尾婚紗，便會顯得過份累贅。 配合場地 頭紗既要配合婚紗款式， 也要配合場地。例如若在一個小小的註冊處行禮，卻用上特大的頭紗，便會感到格格不入，也有被踩到的危險；另外，特長的頭紗在大風的情況下也會失去美感。所以選用時需特別留意。 *** 頭紗之顏色及層數 除了長度及圍邊的方式，選擇時也要留意頭紗的顏色及層數。 顏色方面，以接近婚紗的主色為佳；如用上不同色系會很突兀，除非這是設計的特色。 至於層數，則要視乎期望的效果而定。如果期待行禮時有揭開頭紗的一幕，便要選上兩層式，而且要確定長度足夠蓋住整張臉。 另外，有些多層的設計能令頭紗感覺更飄逸，但卻很容易令臉部顯得肥胖，試戴時要特別留意這一點。 除此之外，選擇頭紗時亦是考慮到當日的髮型及頭飾。 例如將會配襯小皇冠的話，便應避免選擇複雜的頭紗； 但若頭飾會較為簡單，甚至沒有頭飾的話，便可配襯花巧的頭紗，如綴上碎鑽或繡花的款式等。 頭紗之配戴方法 一般的頭紗會預先縫上髮梳，以方便插在頭髮上，再用髮夾定位。 另外還有一種圓形或橢圓形、周邊圍上 lace的頭紗，除了可以當「一塊過」的頭紗用，還可以在不同的位置接合，形成兩層的效果。 ***

我而家都頭痛既到時d衫點分配...因為當晚有兩件係唔可以著 girdle...但係有兩件就要著...

敬茶仲未知換唔換番套褂出黎...都唔知D親戚幾時黎...~___~"

(1) 迎賓 : Couple 租的紫色裙...背面綁繩...係打交叉咁綁...一定會露肉...所以唔可以著 girdle!!

(2) 進場婚紗 : 溫馨租既拖尾婚紗...條裙幾重下...我又無咁 fit ...要著 girdle 就會好睇d收身d...!!  (呢條唔比影相...要到 fitting 先影得 ><"...我都唔記得左個款了~只係記得幾閃下...拖條尾咁~~)

(3) 敬酒晚裝 : Couple 中式晚裝...前面deep V...背部開得低...唔可以著 girdle!!  (我都想好似相中人咁滑溜)

(4) 送客晚裝 : 溫馨的黃綠色晚裝...著 girdle 修身好睇 d ...!!   唔比著上身影...就咁影出黎好樣衰...哈哈~~ 而且我都唔記得著響身係咩樣了~~ 可以落綱紗亦可以唔落~~

不過呢件我想搵呢件黃色 或粉紅色 A-line 代替用黎送客...或者席前著兩件衫黎迎賓 (1.黃綠色 2.紫色)...賓客唔太多...唔換髮型...只係換下頭飾會唔會好趕呢?!  女人真係心多.....

成晚 d 衫...要間住著 girdle...不過著完 girdle 會現左d印出黎唔好睇...而家都幾頭痕...即係成晚應該唔可以著 girdle 啦~~~ !!  

唉...而家真係要搞搞個肚腩了...!!  上次有朋友告訴我收肚腩既療程要 HK$19,000 ...痴線啦~~~ 我寧願唔食野呀...又慳錢喎!!  萬九蚊可以比我買好多敗家野啦~~~ 而且做機減...我驚到我大日子o個日會打回原型呀...哈哈~~~ 所以駛錢既減肥...唔多適合我~~

Wedding Expo~~

今日本來上去玩Spinning...不過天文台話下午會落大雨...夜晚仲會打大風...所以決定更改行程喇!!

記得之前上個月收到今次的 Invitation card...所以就向灣仔進發了~~~

一入到場首先就去換入場劵...今次感覺少人左...可能又分左兩個 hall 啦~~ 都無人排隊換飛~~ @@!!

行左一陣等法國婚紗三點半有場show...阿B今日做龍友...佢拎埋佢個"大老婆"黎影女呀!!  經過羅浮宮...居然見到幫我地影相既阿Lam...佢今日著得好型仔呀...突然變靚仔左呀!!  哈哈~~ 佢都認得我地...我仲笑佢做乜響度企街...唔駛影相咩?!  佢係咁傻笑...突然覺得佢變得可愛左...哈哈~~ 佢幫我地影相o個日...著件大大件 polo 衫...覺得佢好大件咁...不過完全唔同左...唔通佢去左玩變瘦d...?!  我仲記得佢叫我地第時返去派利是比佢同阿鵬呀.....

可能今日落雨又打風的關係...勁多羅浮宮既 sales同埋攝影師都響度...而且佢地今次加左兩本書仔好靚呀...不過無得拎走...係用黎 show d 外租衫既~~

夠鐘過番隔離睇 show ...今次法國 d 衫好似麻麻地...我覺得上兩次睇好似靚d...可能而家睇得試得太多了...已經麻木左...唔再識分靚定唔靚喇!!

睇完之後又過番 CDL...因為到佢地開 show 喇...佢地 d 婚紗同頭飾幾靚...係d晚裝就差左少少...今次佢地著重左介紹 d 外影, 化妝, 造型, 頭飾...可能因為新既外租中心開左啦~~~ 咁講真...佢地 set 頭同化妝係幾得既~~~ 仲有...佢地個佈幕員...好搞野...外型好似高大左既林一峰...講野眉飛色舞...表情多多...@@~

臨走時見到上次揀相既 sales Fiona...佢認得我地呀...仲話阿B專登帶埋長鏡腳架黎影相...哈~~~ 唔該晒 Fiona...佢上次幫左我一個忙呢...^^

***

錯過左 Pretty woman場show...唯有睇 spring ...不過佢d衫麻麻地...清過頭... 之後睇埋蝴蝶樹...又係無乜驚喜感覺...

之後好口喝...落左 G/F o個間 "港式茶餐廳" 食下午茶...貴到嘔... 我只係叫左個菠蘿包同杯龍鳳檸...阿B叫左個無錫骨飯...埋單要成舊水 @@~~

杯龍鳳檸...我覺得只有龍而無鳳囉 !!   即係得好淡既檸檬味咋...!!

食完上番去睇野...今次黎都有個目標...就係睇下D請帖...我地係時候要印喇!!  酒店包o個張只會 for 長輩同 d 守舊派...

酒店張帖好傳統...又金又紅~~

響公司檯面影的...哈哈~~ 唔知點解影到張帖咁淡色...張檯明明係灰色架@@~~

我地想揀張西式 d 既~~ 上網睇過 Joy's Card...因為酒店有八折coupon...d 款都幾清幾靚...但係總係搵唔到張一眼就鍾意既...可能我偏好d古怪特別既野啦...初時諗過整機票...戲飛...日曆...聖旨呢d無聊野...因為同輩既無人用過特別丫嘛...但係阿B唔多想...佢話印我地張相落去...不過我又唔多想...一直都無共識...@@~~ 都羨慕blogger會自己設計...不過我地無時間又無天份又無o個團火...費事整出黎樣衰比人笑...欣賞別人的算了.....

(1) 黎到呢度就首先去 Joy's 先...不過都係揀唔到...原來阿B想要有個 " 囍 " 字...@@~~ 中式o個張咪有囉!?  西式又整呢個字?!  我用個 " 囍 " 字打孔機幫你打落去啦~~ 通花帖貴d添呀~~ 不過會展價同 coupon 都一樣係八折咋...

(2) 之後去到金成... d 帖較整齊...見到有張幾靚...不過印單咭 $13...印雙咭 $20...只有八折...呢張係我地兩個第一張同時間覺得 ok 既...記住先~~

(3) 去名帖...個場好混亂...好多實物帖比你拎上手睇...但係太多又亂...好似亂葬崗咁...無乜心機揀...呢間仲平d添...而且夠多款...但係幾 hard sell...成日叫人開單先...講野又機械化~ 揀唔到~~走人...

(4) 去到心印...都係揀唔到...不過覺得o個張龍鳳囍紋聖旨幾靚...而且應該夠入張餅咭...但係我要提醒自己...家下係揀西式呀...!!!  紅咩色囍咩紋o者?!

(5) 經過有間新婚印像...原來係印帖的...佢D款其實同之前o個d都類似...所以睇左陣就出番去...

諗諗下...再巡多次咁多間...最後都返去金成...不過佢公司響灣仔...其實對我地黎講有D唔方便...遠左D...不過睇中呢間無計...其他又無呢款喎!!

Sales 係個阿太...佢話張帖點改印咩花款野都得...而且家下揀左到時都可以再改...佢仲話幫我地印埋地圖添...只要我地比到圖佢...張咭其實清清地...部份花紋突出而且好似過左陣膠咁...手感唔錯...不過我想轉我鍾意既色...佢話無問題...叫我到時再揀...

我地問佢有冇得拎d版返去比長輩睇...佢話可以借...但只得一張o個d就唔得...問佢影相得嘛...佢話開左單就隨便影...所以我地就落左 $300 deposit 喇~

開完單就影相...影左唔比借走o個張單咭款...影極都影得唔好...因為頭頂好多燈...最後都ok...另一張就借走下次揀帖先還~~ 用咩色好呢!?

之後見無乜野行...而且八月又有 expo...紅酒又唔想咁快買...唐餅又唔駛咁快買...所以我地七點幾就走喇~~都黎左好耐喇...停車場 $22 一個鐘呢@@!!  我地都黎左5個鐘喇!!

點知一開車...金成就打黎搵阿B...問佢比左 deposit 做乜唔拎張單走?!  仲問佢係咪唔要添!!   哈哈~~~ 真係兩個可以低能到咁~~@@!!  唯有我上去拎番啦...!!

上到去...間鋪無客呀...三個 sales 響度食緊野...離遠都認得我...呃...好樣衰添!!

我仲比佢地三個圍住黎窒呀!!!

笑我地唔記得拎張單不突止...打電話又打左3次先識聽...笑我地掛住影相張單都唔要...佢話佢可以當無收過我地deposit都得...又話我地係咪用 $300 黎借左張帖自己拎去印...好瘀呀!!!!!!!!!!!

出左會展...地下係濕既...不過無落雨...!!  聽講呢個風會吹正呢!!

好野...今次又再踏前一步喇!!!!  今日係倒數三個月的日子...好開心搞惦呢樣~~!!  時間過得好似越黎越快呀!!

***

夜晚十一點半真係掛八號風球呀...之後仲九號...又紅雨添...我地屋企食正風~~ 露台度門入水添呀!!