細細病了

養左隻細細妹已經八年喇...一向佢都好少病痛...係早幾年試過一次比較嚴重係尿道結晶石...不過好快無事...不過已經令我地非常擔心...而通常佢睇醫生都係因為皮膚既問題多...所以佢都算係一隻健康的狗仔!!

上個星期三...朝早返工時已經覺得佢好似比平時嗲...成日跟住我...以為佢又扭要零食...所以比左一條雞肉乾滿足下佢......

o個晚十點幾返到去...見到廚房成地都係佢d大大...至驚嚇既係成地都係血...好多滴...嚇死我...不過當時見到佢都仲係好精神...嗲住要玩...仲識跳跳扎...以為佢屙得太盡情...搞到pat pat流血......不過過左一個鐘後...佢開始好累咁...叫極都唔想郁...係咁訓...開始覺得佢有d唔妥......等到阿B返黎...再觀察多佢一陣...決定都係帶佢去睇急症...

要出太平路睇 24 小時急症...全程車程佢都係綣埋個身訓響我對腳上面...無乜大郁動...一D都唔似佢平時咁...我地真係好擔心好擔心...因為之前上網 search...話狗仔屙血可大可小...通常因為腸有事...而呢d病係狗仔既致命原因...所以真係好驚佢會有事......

呢間診所相當之大...有隻狗仔都係黎睇急症...阿細跟佢排第二...終於論到細細...醫生問左佢既病徵...量度了體溫...抽埋血驗內臟...要等候半小時取化驗報告...而糞便報告即要等四日才知結果...細細全程都好緊張...不過佢都好乖巧...只係響度震無大反抗...醫生及護士都讚佢好乖呢~~!!

等待半小時的時間...真的覺得好漫長...其間見到有個女主人拎住個枕頭...在和護士商討愛犬的身後事...不時見佢在飲泣...我個心有d拿住......聽到一d關於狗隻善終既野...更加好唔開心...雖然呢d野遲早都要面對...不過我真係唔想去面對......

化驗報告終於出左...顯示細細的內臟功能很正常...不過佢正在發高燒...醫生有要求可以留醫吊鹽水...如果唔係就打抗生素...我地選擇幫佢打針...因為唔想佢一個留響度...佢實驚啦!!!  呢個醫生打針手勢麻麻地囉...阿細應該覺得痛呀...一打完阿細即刻拎轉頭望支針呀!! ><"   之前抽血已經響佢前頸度拮左幾針...見到都好心痛呀!!!

返到屋企都成兩點幾...隻妹妹累到唔想郁喇...響佢張床仔度係咁訓...第二日我請左假黎陪佢...佢朝早都仲有屙左d血...而且仲嘔...唉...真係擔心死人喇!!  幸好訓醒一教食左少少野...個樣好似精神番d......不過都係成日訓......餵佢食藥都好合作...連我食牛肉飯佢都無反應...平時佢一定好興奮...要一齊分享架!!  証明佢真係好病好唔舒服...嗚嗚~ 睇下佢...訓到個頭好似生意失敗咁既樣......

佢仲要食幾日藥呢...而且仲要戒口...食減食既糧...為左補充佢既體力...要用 1:1 既份量開補抗力比佢飲...

到左今日...佢應該好番晒喇...因為佢又變番好為食既樣...聞到美食就會咀lam lam...而且餵佢食藥仲會反抗...而且仲好大力添...!!   而佢大便既化驗報告都出左喇...幸好只是腸胃炎...!!  細細...你唔好再病啦...!!!  拜託~~!! 我寧願自己病呀...因為佢唔識同我講邊度唔舒服囉!!!

今日阿B幫佢理髮呀...病完之後已經輕左...家下仲剪左好多毛...而家佢成隻瘦晒...變左排骨妹!!  好清爽呀~~~