2010-11-02 & 2010-11-09 Wedding Photo Album (Lesson 1 & 2)

結左婚唔經唔覺都已經一年喇...但係因為太懶的緣故...仲有本攝影公司送既相簿未整...其實已經響今年五月交左相去...人地都整埋排版比我地...不過我地都未簽番比人地 confirm ...   結婚前可能用得太多精力精神喇...所以一旦搞惦左個大 project 就兩個都唔想郁咁~~~希望呢個月前完成啦!!!

話時話...之前學既兩個相簿都係未完成...  唔得喇...堆太耐喇!!   真係要清清佢~~!!

Travel Photo Album - completed 80%, 尚欠兩頁, 未合成!!

Mini Photo Album - completed 50%, 相都未晒~~ decoration 未整...!!! 

而家下學緊 Wedding Photo Album - 相又係未晒~!!   一開電腦見到咁多相就有點頭痛呢...哈哈~~

噚日上堂都係問同學仔借張 3R 相黎度位,...下堂一定要咩都準備好!!!!!! 

上星期上左第一堂...Oli 幫我地 cut 左 d 相簿封面...張咭紙4mm厚架...而我地每人只係負責 cut 個相片窗口位出黎都 cut 到手都有點痺...真係難為了 Oli 要 cut 咁多份呢~~~ 辛苦晒!!!    真係一個大好人呢~~~!!!

第一堂整左封面同封底...好鍾意張 bookcloth...  又同白膠槳玩遊戲... d 角位我始終都係整得唔太靚啦...個窗口又 cut 得有點斜又大細邊...幸好...今次打窿無斜到!!!

第二堂就同 d distress ink 玩遊戲整兩張內頁...哈~~~ 個個同學都整得好乾淨又靚...係我搞到成手都係紫色墨呀...返到屋企洗左好耐都仲係紫手黨呢!!!!  終於麻煩阿B幫我用快潔布係咁擦先去左 85% 呀!!!!  今朝仲有小小呀...!!  哈~~佢叫我下次戴手套...咁又唔駛咁誇既...下次我會小心 D 架喇!!    我太大力渣舊化妝海棉喇...變左張紙都未吸到墨...我隻手就已經吸晒喇~~~~ 

坐我隔離既同學仔整得好靚架...仲整漸變色添...我唔敢亂搞...因為我張淺色紙得番呢張...HEEHEE~~~我要好小心...!! 

而對面位同學仔呢...佢揀 d 紙同襯色都好靚架...而且佢整得好型的~!!  好大膽用黑色呢...但出黎既效果好 good 喎!!!! 

Oli 教我地剪個 pattern 出黎效果會靚 d ...真係靚好多架!!!!!  

呢張係第一頁...紫色...我愛既紫色...我結婚時既 theme 都係用紫色架~~~

因為無帶相...所以暫時都未組合...暫時應該係咁~~~

呢張係第二頁...做左暗花效果...不過真係好暗下...唔太突出...哈~~~ 我要改進下 d 技術先得~~~!!!  同一個花紋...其他同學仔既效果好好多架!!!  呢兩款花紋本身好靚架...!!! 

一放左相...上面個 pattern 就遮晒添...得番小小睇到...早 d 整另一邊啦~~~ 蠢左!!!    家下好似好單調咁添...!!  總係整得好慢...個個同學仔都整埋其他 decoration 喇!!!   我仲未揀英文紙整名...!!  下堂要開行 turbo 先得喇...!!  

哈~~本來揀左張好靚既 pattern 紙黎做托底...不過貼左相之後又會遮住...無謂浪費左佢啦...所以又響廢紙堆中尋寶...搵到呢張剩番 1/3 既紙...我記得 card making class 時有位同學仔係用呢張紙黎做糖果咭架...應該係佢剩左...我見突呢條色既邊出黎都 ok 丫...所以就用佢黎整啦... cut 開兩張剛剛好!!!    其實呢兩頁除左底紙外...所有都係響廢紙堆中尋寶的...當尋到心頭好時仲開心架!!!! 

distress ink 真係好好玩...可以好多變化...不過我既使用方法真係要改善改善...!!