2011-06-25 初試心太軟

上星期六 (25/6) ...之前約埋兩位好友一齊買了 coupon ...參加八度海逸酒店辦既心太軟團購課程...!!   其實我麻麻地食心太軟...不過我知呢個甜品唔係咁易整得成又整得好味的!!  有得一齊玩...我點會錯過喎!! 

第一次去呢間酒店...其實睇左地圖我都唔知實際響邊...所以就約埋其中一位好友打的去...!!  熱辣辣的街道...響的士站都要等左一陣先有車上呢~~~~

間酒店都唔錯喎...雖然位置偏d~~~

今次由酒店糕餅總廚教我地整呀...真係唔簡單...$99 仲想點?!

全班只有9個人...其中有2個最後甩底無黎到...7個人...少數團購蛋糕甜品課程咁少人呢!!!  酒店搞可能就有呢D好處...唔駛一個對廿個唔知睇得邊個!!! 

黃師傅首先講解示範一次比我地睇...佢好搞笑...話自己7日7夜不眠不休研究呢個食譜出黎架...嘩哈哈~~~~駛唔駛講到咁誇啊...知你努力喇!!! 

嘩~~~原來要用咁多牛油擦落個模度架...@@!!!   之前已經溶左一舊落D朱古力度架喎!!!

哈~~~~ 酒店的行政總廚都響度監場呀...!!

睇完阿SIR示範完...我地就埋位個別製作喇~~~~全個過程都幾簡單...

(1) 座溶 (2) 搞勻 (3) 凝固 (4) 焗熟 (5) 食得 

呢部原來叫做光波機...阿SIR話麻麻地...因為個底唔太傳熱...不過佢只係分配到呢個資源~~~~

阿SIR既示範作品...終於焗起喇~~~~!!  我地在等食中~~~

阿SIR仲好認真...話教埋我地整吉士汁呀~~~~!!!  都好好味啊!!  不過呢個汁又貴又麻煩...自己唔會整喇!!! 

阿SIR示範點裝飾個心太軟喇~~~~

嘩~~~~ 好靚呀...!!!

呢個細個D既係阿SIR請我地食架...真係唔錯啵!!!  如果有埋個雪糕就好喇!!!

我既半成品...有兩個已經焗熟...有兩個係未焗的...返去試下效果先得!!

呢間酒店D工作人員都好 NICE呀~~~~ 呢位係中菜廚師黎架...佢好可愛呢~~~同我地影相又扮野喎!!  仲話自己係周中師傅...HAHA~~~其實佢姓郭的!!!  佢話遲D會開班教中菜...有同學問佢野又認真答喎...真係好好人呀!!  我問佢會唔會參加大廚出馬...哈哈~~~佢好謙咁話: 我未夠班~!!  

呢位係教我地既阿SIR...臨尾佢講自己個名比我地知...笑到我地丫...原來佢英文名叫 : BABY 呀...哈哈哈~~~~之後我地仲成日高音地叫佢個名呢......呢堂實在太好玩喇!!!!

夜晚...阿B放學返黎...即刻焗左個熟既黎試味...!!  哈~~~屋企有防潮粉...整出黎都靚靚啊!! 

阿B呢個好好彩呀...焗多次都仲有D流心效果...唔多好朱古力味既佢都話好好味呢~~!!

噚日試埋未熟嗰兩個...初頭溫度太低七分鐘都未有起息...最後將爐溫加到 180度...焗多五分鐘就得喇~~!!!   裡面好流心...!!  好好味~~ 不過都係太大個...有D漏~~!!

Free Hit Counter