懶人的話

近黎都無乜 mood 理結婚 d 野...天氣又熱又成日落雨...想去街都無心機...所以o係屋企 hea...上下網周圍睇...

睇到好多 blog 友都好有心思去令自己婚禮好有特色...睇番自己...真係好 hea~~ 其實曾幾何時都幻想過自己要有一個夢幻式既婚禮...不過人大左...好多野都現實左...而且浪漫對我黎講又有d骨痺...可能我都豪爽慣...想要個難忘既婚禮...又怕太大壓力到頭來會失望...所以羨慕下欣賞下人地算了~~~

其實搞呢個婚禮都係想老爸開心一下...佢開心我就開心了...!!  原本怕麻煩的阿B和我...一早是決定旅行結婚...不過老爸口頭上說不擺酒無所謂...不過眼神就是出賣了他的內心...

所以...終於決定擺酒...不過對我黎講真係好大壓力...一時間好多野要去做決定...有決擇恐懼症既我...真係一時間係無拉拉瘦左5磅...做運動其實反而無令我瘦過呢!!

搞左一輪結婚既野...反而覺得搞既過程都幾得意...會令人長大...而且會將兩個人既關係拉近左...哈~~~有幾次...阿B send msg 比我...叫我老婆仔...笑到我丫~~ 原來感覺都幾幸福...原來夫妻關係和男女朋友的關係真係有唔同的!!  以前佢都有咁叫過...不過而家聽到...個感覺真係好唔同好唔同......

一齊去籌備個婚禮個感覺好開心...因為唔係自己一個人在努力...每事都可以商量唔駛自己一個行事...例如買嫁妝試衫...原來開心就係咁簡單...定係我思想太簡單?!  @@~~

曾幾何時都有怪過佢好似凡事唔上心...不過實際上...佢有放在心上...沒表現出來...而且在這個籌備過程...只要我喜歡的...他多不會反對...呵呵~~ 可能我既要求唔高掛...睇黎佢都幾幸福...哈哈~~~

其實我要既難忘婚禮...唔需要華麗的包裝...只要有班真心黎祝賀我既朋友就心滿意足了...

***

不過我都要開始努力了...衫都未揀好呢...我相信...我係最唔上心既新娘...居然連應該要最重視o個樣都未搞惦...!!