Wedding expo

放工後就闖去灣仔...因為今日又有婚紗展~~~今次想睇下D請帖...

今次好多人呢...條排隊買飛既人龍好長呢~~ 排左兩個字左右先買到入場劵~~

入到去已經完左 SPRING 既 SHOW...UM...唯有睇 PRINCESS o個場...最失策係唔記得帶部好d既相機黎影呢...唯有等下個月再影啦~

上次九展 expo 都收到飛...不過無時間去...唔知點解今次又收唔到呢?! 

前幾日收到兩張入場劵...車~~~點解係七月既?!

今次 Princess 既衫無乜驚喜...之後睇埋法國婚紗...不過唔係幾睇得到...太多人喇!!

之後又周圍行...今次又係好多影婚紗相既檔口...成日比人拉住...不過一聽到我地話影左時...就會放我地走~~@@!!

不過阿B好似真係想去台灣影咁...佢成日睇人地D相...仲話不如叫埋NOV結婚既朋友一齊去影好無?!  真定假呀?!  @@!!!!!!!   我要去歐洲喎!!!!!!!!!

***

睇下印帖o個幾間公司...其實我都唔知揀邊款好~~ 酒店包既係紅色長型囍字傳統帖...都ok既...有同事同我講...帖呢樣野求其得啦...人地收到都會掉架啦~~~不過對我黎講...我唔會掉丫嘛!!!!  所以都會有d要求囉!!  我會留為紀念嘛!!!  ~____~" 

見到 Joy's card 今次有擺檔...問左如果有酒店 coupon 會點計...佢話可以補番差額就ok...所以可能搵番呢間...佢d咭款比較簡潔...睇埋其他公司...好多款都幾有特色...再諗諗先...因為都未知自己想要乜~~~遲下先再決定!! 

睇下d小禮物...其實之前都諗過下回禮小禮物係乜東東...今日居然無拉拉搞惦埋@@!!!  我地真係快人快事...明明o個個價錢係包20圍...咁我地得o個12圍應該會平好多架嘛...不過最後只平左兩舊水...但係我地又 OK喎...@@!!  真係唔明我地因乜事咁趕咁?!  雖然比起其他公司係差唔多價錢就真...!!  而且仲包埋印張Thankyou card (其他公司唔包既)...基本我地都慳左六百元既...!!  我地響度又係逗留唔夠 15 mins ...包埋問野開單比 deposit...哈~~  至於係乜野...係要保留番一d神秘感...heehee~~~^^  收到既應該會開心同埋實用...肯定一定唔會扔左落垃圾桶呀!!!!!!   嘩哈哈~~~ 希望有咁既效果啦!!!  不過阿B話會再買D好細既小禮物喎...呃~~咁要去笋崗睇下先得...

最搞笑係...個老闆叫我地臨婚期前打電話比佢地喎?!   真係令人好笑又擔心呢~~ 咁會唔會印錯我地名同日期架?!  天呀~~~ 有乜理由叫我地提佢呢?  @@!!!  佢唔會唔記得有呢單生意下話?!  到時我會去睇一睇佢搞成點先得!!  希望唔會好混亂啦~~~

又唔記得拎張單去抽獎喇...真係蝕呀!!!!!  次次都係咁呢~~!!

今次入場贈品好大手筆呀!!  居然有樽 1 LT 既瀲口水呀!!!  回番本呀!!  不過重到丫~~

又拎左一大堆野返黎...阿B話睇下人地影o個d相既構圖學下野喎~~ 本囍悅刊我自己買架...佢派o個本係舊既~~ 不過我覺得新舊其實都無太大分別...因為好多都係廣告黎既...

新婚會送o個本雜誌, 2月時佢做特價買左啦~~~

又係送過期雜誌...!!  新o個期今次無折呢~~所以無買喇!!

UM~~經過壹証婚個檔口...野!!!!  佢今次送紫色既結婚証書套呀!!!  同我訂o個本一樣的!!!!   不過紫色仲靚啊!!!! ><"   阿B安慰我話 : 唔同丫...我地訂o個本有繡名同日期喎!!  咁又係喎...!!  算啦~~

本來想去d玩野檔口玩下...點知一係排長龍一係話 booking已經去到七點幾...咁即係又無野玩啦~~ 仲想畫幅卡通畫添...!! 

行到六點幾就走 lu...好開心...今日又搞惦一樣野!!

***

阿B今日問我想用邊個價錢既 MENU...哈~~~我叫佢用最平o個個得啦...唔駛比咁好既野人食 (←好無人性!!  哈哈哈~~~)  留番d錢比我去shopping!!!!  哈哈哈~~~ 不過放心啦...佢已經否決左我喇...!!!   絕對唔會刻薄人既~~!!!  應該唔會比人炸形掛~~~ 其實間野係香港優質食府黎架~~應該有少少保障掛...唔會失手架呵?!  @@~~

有朋友話我地擺得咁少圍...而且大部份係親戚會蝕本...我又覺得唔係囉...擺酒唔係想賺錢啦~~~ 如果係想賺既...其實我地可以擺多幾圍...不過唔想乜人都請嘛...一黎唔想煩...二黎好多都少聯絡...朋友既老公老婆唔熟費事請啦...亂炸人咩?!  我真係做唔出囉...我只係需要d真心黎祝賀我既朋友就得架喇......