Junjin HK Fanmeeting

今日好開心...因為神話成員 Junjin 黎左 HK 搞 Fan meeting~~ 我地買左 VIP 門劵...當知道係坐第四行...真係好興奮呢~~

上年 11 月左右另一成員 Minwoo 都有黎 HK 參加芝華士個 Party...不過要買酒先換到門劵呢...

我地一行三個人...食埋 lunch就向九展進發喇!!!   阿 Jin 我地黎喇!!　去既途中...見到林嘉欣呢...佢真人唔係咁肥喎...笑起黎好甜呢...真係好靚女呢!!

***

先前訂左 Jinjin 既新 CD今日都有得拎喇...撞鬼丫...大張到好似以前黑膠牒咁...UM...最唔鍾意呢D大大件 "丫渣 " 既 CD 設計!!   之前響佢既 Comeback show 已聽過兩首歌 Hey Ya 同埋像傻瓜一樣...很輕快又強勁的旋律...一聽就很喜歡...oh~~~ 我感覺到阿 Wan 叫我唔好爬牆要等佢返黎呢~~~heehee~~ 知道喇!!

***

會場內兩大論壇已經開左壇喇...首先我地去拎門劵先...哈~~~今次好落本啊...好多野拎呢~~~

我地仲見到 JIN 入左房裡面做訪問呢~~~ 不過我初時見唔到佢正面呢~~ 後來佢出黎我先見到佢正面...不過佢好似好攰呢~~ 可能禽晚夜機黎掛~~

入到會場...好期待阿 Jin 既表演...自從上年九月阿 Wan 演唱會見過佢之後...今次再見面呢!!

終於出場喇...我已經準備好架相機黎錄影喇...!!!!  不過頭一首頭一段我按唔到個制...錄唔到~@@"

如果響韓國...我一早就會比d "實蕉" 的左出去 delete 晒d files喇!!  今次會場無王管呢...呵呵~~~

照片拍得唔多...係得呢五相 @@!!!!  仲要係唔多清既~~~

佢表演得好精彩呢~~~仲同 d fans 一齊玩遊戲...頭一輪遊戲...叫所有 8 號座位既上台玩呢...我地梗係派至鐘意阿 Jin o個個上去玩啦~~~ 我地準備晒拍 movie 同埋影相架喇...可惜玩到第 4條題目就要落台了...不過都好丫...有咁既機會好難得呢~~~^^

之後佢仲教 d fans 跳舞...可惜無一個學得識呢...激到佢成日要重覆示範呢...哈哈哈~~

第一次參加 Fanmeeting...希望神話成員會陸續黎 HK 啦~~ 唔駛我成日飛去韓國嘛!!!  我已經去過5次喇...!!!

哈~~~ 我估唔到 Fanmeeting 都可以嗌 encore 的... Jin Jin 除左外套只係穿背心出黎呢~~ 我一路錄影一路掛住睇佢真人跳舞...有時架機個 focus 唔知去左邊呢...嘻~~ ^^"

90 mins 好快過...有個意外收穫呢...因為我地買左 VIP 門劵...所以有得上台大合照呢!!  我仲博到阿 Jin 懞添呀...我惦到佢隻手!!  哈哈~~ (←女色魔的笑聲!!)

不過唔知去邊度搵番呢張合照呢?!  @@!!!  大會又唔講清楚喎!!

***

睇完之後我地三個人去左食味千拉麵...d麵好似無以前咁好味...

Facial

自從上次試妝後...mua 話我塊面極需要補濕...不過懶惰既我...響屋企又懶做 mask...出去做 facial 就更懶...

響又一城做o個間...通常都唔會預留位比我...只間中打黎問我有位呀做唔做...基本上一年都做唔夠六次...幸好塊面除左係乾d之外都無乜大野要整...所以養成我可做可唔做既心態...

上次問開同學仔做開沙田o個間美容院...價錢都ok既...而且近...我又貪有伴有一齊做可以有人督促下...所以 就 join 左 20 次 package...如果我勤力d 應該還可以補救掛?! 

而家做左一次...手勢係ok既...不過我唔鍾意個o個位阿姐成日 sales 我野囉...做 facial 我唔鍾意有人響度依依俄俄...更唔鍾意狂 sales 野...我有需要我會買唔駛你講~~ 我雖然有時係迷糊 d ...不過對於呢d我都幾立場堅定的!! 

所以我鍾意去又一城做...真係好舒服...一個人一間大房...鍾意就同美容師吹下水...攰既時候又可以訓下...兩個鐘係完全享受...而且咁多年...一樣 product 都無 sales 過我!!!  呢個係 main point!!!! 

＊＊＊

第一次去沙田做...間鋪好細間...感覺侷促...四張床...好迫...而且張被...um...我唔鍾意d花花被...好大陸 feel...仲叫我換佢地d衫?!  唔駛啦...我又唔駛你按我個身!!! 

幫我做 facial o個位阿姐...一開始我已經好唔滿意佢...唔係佢既手勢...係佢把口...而且有d 想呃我既成份...明明講好我只做深層清潔護理 (即去死皮及黑頭) 加做機既精華導入...佢又話我應該做美白護理...唔係嘛?!  上次咪講好囉...仲係你同我傾o個喎?!  而且我已有精華導入...仲做美白護理做乜呢?!  所謂美白護理係o個個 mask 倒膜有美白作用咋!!  而呢個又要加多 $50 一次的!!  我未做已想我加錢?!  我堅持唔改!!

之後一路做又問我修唔修眉...當佢知道我去第度比 $$ 修眉時又串我...話佢呢度 $60 咋...叫我比佢賺好過比人呃...我真係好忍佢把口...我話唔駛佢修我條眉...佢係都要修...我條眉係麻煩我自己一向都知...所以咪搵人修囉...終於佢又搞到起角...嬲到我死...!!!

到按摩時...我話唔駛按兩額角位置...因為我呢個位好脆弱...佢又唔記得...按左野仲好死大力...我即時叫 stop!!!!   搞到我第二日仲好痛...><" 

一路做佢一路彈我皮膚乾...唔乾我駛咩黎做呀??  好彩我唔係滿面斑滿面爛瘡o者...如果唔係實比佢哦到我喊都似啦!!!

終於做機既部份...都係拎部野響我面度好似燙衫咁...一時熱一時凍咁燙黎燙去...佢話做左一邊面比我睇下效果...唔駛下話?!  但佢好堅持...叫我訓響度渣住塊鏡望自己個樣...我話無分別再合上眼等佢繼續做...好明顯我既語氣係好唔滿意佢呢個做法啦~~ 佢仲繼續堅持叫我睇下有乜分別...我話 : 我只係覺得我對眼好紅...而且塊面好油...其他唔識分!!  佢先好尷尬繼續做...不過佢又開始 sales 我做 eyes treatment ... 我再無理佢...!!

實在太煩...!!   老闆娘睇得出我做完之後勁唔 like ...黑晒面!!  同學仔話因為呢個女人係新人...所以會係咁 sales 野!!   下次再係佢做...我會扮聾扮啞~~

同學仔因為勁多暗瘡...所以次次做完 facial 都會紅晒塊面...佢見我頭髮又唔亂塊面又無野...問我點解咁乾淨?!   我塊面其實係乾d...個鼻有黑頭...至難搞既都係對眼之嘛!!  所以又一城既 Connie 成日讚我皮膚好...唔係因為佢讚我既關係...我真係覺得 Connie 係有heart 幫我做多 d!!  而o個位 Winnie 真的只想賺多d佣囉!!

 

羅浮宮揀相日

今晚約左CDL睇相...放工落大雨又遲左走...所以我地響公司下面搭 taxi 直出九龍塘...呃...唔係好先兆呢~~咁快要駛 $$ !!!

個的士佬係口水佬...全情係咁同我地吹水...唔同佢講野時...佢自己都不斷講講講...噓~~我地想商討揀相策略架嘛...係丫...我地剛剛先記得未有共識呀~~ 最後落車入去時...阿B話維持原判...即一張都唔加...不過我話~~睇下點...哈~~ 上次影相時...你夠話 $1 都唔加啦...你又加 $ 換衫...又買左set 2R 相啦~~

***

去到已經有好多人響玻璃屋度揀相...都無晒位喇...我地只有響大廳度揀...不過仲有人影緊相...d大光燈好殘眼...d燈時開時關...睇相時睇到我眼都花...

聽過下CDL點比相人揀...不過我地有揀相經驗...而且覺得好過用電腦揀呢...上次用電腦揀...又係咁分批比你睇...仲混亂添...因為實在唔記得揀過乜...好易重覆差唔多既款...今次實物在手...先睇晚裝相...我地首先好似玩潛烏龜咁將同類既放埋一齊...跟住再睇邊d唔順眼就即 foul...晚裝影左好多景...仲好...每個景我地先留一至兩張...

之後睇婚紗A(園景), 跟住婚紗B(室內)...女單人...男單人 + 對相...中式...effect相...大概有二百幾張...揀既時候完全無難度...兩個都幾決絕... Fiona 睇到眼都突埋...我地快手到咁...

第一輪已經好多唔要...因為太多景啦...同一景又影咁多張...所以揀大家都覺得對方順眼既... 一張effect相都唔要...要佢還原!!  呢d effect我咁豬都識整啦~~ 我發覺阿Lam講得啱...我拎花球一係好似渣住流星鎚...一係好似渣住支咪訪問人咁...拎到好hea...係完全另類拎花球法~~哈哈~~ 而且叫我地扮情深錫錫呢...兩條友豬咀到丫...錫得好難為咁...睇到想嘔...反而影d搞搞貢o個d...我地兩個就上左身咁...因為呢d 搞怪pose就係平時既我地...但係又無理由揀晒呢d... ~__~"  咁同平時影相有咩分別?!

***

有幾個景我地係一張都無揀的...例如: 紫色benz (人太多就唔到鏡頭掛...只係影左我地坐響架車裡面囉!  得一張影到外觀...不過又怪怪地...我最鍾意紫色呢!! 一張都無 ><")...露台 (由地下影上黎...雙下巴四方面現晒形)...大堂樓梯 (條拖尾裙都擺得唔好就影...)  書房 (可能到尾聲...之前又等左半個鐘有多先入到去影...所以影同被影既都好求其...)  花花欄杆 (無張覺得順眼)...大概係咁... 所以範圍又縮小了...

Fiona 一路都數住我地大概揀左幾多...成日問我地點解呢d唔揀o個d唔揀...我地話呢度影得肥啦...頭髮亂啦...pose唔自然啦...佢話有得執...@@~~ 下~?!

4個造型...揀得最多既係園景...因為覺得影得係最好...晚裝就比睇版時好d...反而之前覺得麻麻既室內造型...出黎既效果又幾好喎...我之前仲猛依依俄俄話阿 June 化得成熟添...中式都幾好...不過我太粗魯了...完全無女性味道~~ 對中式大口仔影得咁少!!! 

***

終於經過幾輪睇完又睇又foul d 之後...剩番 43張~~ 即係揀多左 11張...o個一刻...我地仲以為好醒守得住添... 如果只係買相...我地比多千幾蚊就走得了!

之後 Fiona 開始催眠式...一大堆數字...提出好幾個方案...總之就係 $$$$ !! 

一聽到咁多數字...個人就開始迷糊...又叫你做coating (做大本既送埋細本, 唔做coating及無蓬又真係唔靚既)... 送多幾張相比我地入埋落相簿...又話買相又唔包執相...總之算盡你心理...響催眠既情況下...而家將先前既散相取消晒...入晒落本大相簿...20 x 30 油畫照舊... 8 x 10相架照舊...情心美集照有...送左8張 2R銀包相...一本 10 x 14 水晶無蓬相簿入 48相..一本 5 x 7 相簿 入20相... 提名布照舊...感覺好似少左好多野咁...@@~~

埋單 $8,000 !!!   點忍手都要比八千~~  財散人安樂~~ 失守啦!! 

之後寫地址八月中左右送貨...我地住村屋唔知識唔識送黎...原來Fiona住我地附近條村...佢話無問題~~

佢問我地幾時婚期...我地答10月18日...仲順便問埋佢...其實可唔可以 e-mail d files比我地先...因為想拎去整d無謂野...佢好爽快話可以...叫我地寫個 e-mail 比佢...咁我地又問佢...其實可以send幾多張呢?!  佢話幾張啦...大概六七張...咁我話不如十張得唔得?  佢話公司其實唔可以send咁多...但係佢都 send 比我呢!!  不過佢話d files係壓縮左而且係未執相的~~ ok丫~~應承十日內send比我地呢!!  希望佢可以快d啦~~ heehee~~~

其實都貴啦~~~不過我地懶又費事煩...所以通常我地都係有頭威無尾陣~~ 失血收場!!

我地全程只係3個幾鐘...係最遲黎揀又最早走既一pair...其他仲傾緊呢...我見有對帶左伯母黎...個新娘仲好認真咁響每幅揀既相後面簽名 @@!!  咁認真?!  我地係咪太求其呢?!?!?!?!

***

出左CDL...一出門口...阿B就話 : UM...駛左好多 $$ 啦...仲諗住同你去台灣影添...而家無啦~~!!  哈~~ 因為我影完呢輯o個晚成晚依依俄俄...可能阿June令我連番受挫...又成日覺得影得唔好...加上o個8張相版好似麻麻...一路好唔開心...不過今日當第一眼d相...雖然唔係真係好靚好靚...但係當你認為無希望時...變成有點驚喜o個種心情...真係好難形容o個種感覺呢~~~ 佢見我笑住走...咪笑我囉...話我之前猛依哦...自己拎黎唔開心...^^"  唏...我係咁膚淺架啦!!  發洩左我其實都無野啦!!!!

呢兩張就係我依依哦哦既2R相版喇...屋企無得 scan...唯有用相機影出黎 @@!!  還有一些結婚照...好有興趣分享...可留言 add 埋你做 blog 友 ^^

婚紗相影夠啦~~~ 要留錢去衝出亞洲呀!!   豬流感快d走啦...!!!

***

好耐無搭過巴士...嘩~~駛唔駛咁凍呢?!   我一路震到返大埔呢!!!  而且發覺係未食晚餐架!!!

 

上乳豬歌~!?

 

 

陳慧琳 - 囍菜
原曲：《紙醉金迷》
作曲：雷頌德
編曲：雷頌德
監製：雷頌德
填詞：甄健強

*JUST OPEN YOUR EYES
JUST OPEN YOUR MIND
TONGIHT WE GONNA LOST IN PARADISE

若你經已很餓 搵到位安樂坐好
宣佈好事 起菜你已等到
就快吃翅你要點o的醋 要咁先似宴會
吃得高興就企起伴舞

飲酒抑或飲可樂 亦全情為你效勞
想傾偈定聽音樂 現場能為你做到
讓最開心氣氛你都感覺到
聯歡最重要實行未怕嘈

願你將這塊鬆脆的乳豬夾俾身邊果位
仲要起勢郁你雙筷子肥少少都不計
這夜枱枱貴客有野睇 名餚靚菜至夠揮
邊位吃得多才是最威

願我親愛尊敬的各位快飲多杯啦喂
仲要跟我爽快的碰杯 豪飲不必收掣
這夜全場個個也最親 全場個個靚爆燈
好到沒法子代替*

Repeat *

願你將這塊鬆脆的乳豬夾俾身邊果位
仲要起勢郁你雙筷子肥少少都不計
這夜枱枱貴客有野睇 名餚靚菜至夠揮
邊位吃得多才是最威

願我親愛尊敬的各位快飲多杯啦喂
仲要跟我爽快的碰杯 豪飲不必收掣
這夜全場個個也最親 全場個個靚爆燈
准我大讚 奉承大家
好答謝你的賀禮

細細理髮

今日一早阿B就幫細細剪毛毛...一剪就幾個鐘...好清爽呢~~~哈哈~~~

剪左毛...變左男仔頭咁~~~哈哈~~~ 其實佢唔肥架...多毛毛時先覺得佢係肥妹咋~~~

 

 

第一次去健身室

大細佬和阿B每逢SAT都會在深圳玩健身...不過我咁懶...一次都未跟過上去玩...

幾個月前佢地兩個 JOIN左另一間響金光華商場既健身室...上過去睇過...都OK...不過都係懶...佢地成日叫我上去跳下健康舞跴下單車跑下步...一聽到要出汗...我就唔制啦...至憎...響屋企 hea 下睇下韓劇唔好?!  睇下 shinhwa's 綜藝節目唔好?!

可能近黎間中有玩番屋企部機...出一身汗又好似唔係咁辛苦咁~~ 所以今日決定跟佢地上去玩下~~~ 而且...我都係時候要做下運動減下d脂肪了~~~

呢度係後門...哈哈~~唔敢影前門...因為好多人響入面玩緊...費事好似偷拍其他人咁~~

第一次黎...好鄉里...阿B比左個 Locker 牌比我...叫我入到去開 #103 locker就ok架喇...我一入門口就見到103號啦...點知開極都開唔到...就用有限的普通話問d阿姐...點知...佢話聽我試圖開既係人地d私人locker...呃!!!!!  好瘀丫!!!!

之後佢帶我入去我既locker...換好衫出去搵佢地...佢地教我玩跑步機...有得睇韓劇...金三順...哈哈~~~一路跑 (其實我係急步行~~@@!!!)...時間好快過左25 mins呢~~~

跟住去睇下人地跳舞...嘩~~~個個跳到好似纖型23咁...跟本我都睇唔清d動作啦~~ 咁出番去...有另一班教緊跳街頭舞...都幾得意...阿sir跳得好型啊!!

佢地帶我地去跴單車...四點半有一堂呢~~~ 一跴就40 mins...不過響強勁音樂同埋跟住阿sir既節奏黎跴...又ok喎...時間好容易過呢~~~ 佢地話估唔到我都跴得惦~~ 不過...我只係用番自己既速度...無跟足阿sir既...出左一身汗...估唔到又幾舒服~~

之後去玩步行機...又睇金三順...呢部容易過屋企o個部...仲輕鬆... 我發覺...大班人一齊做同一樣野...時間係好容易過...而且唔多覺得辛苦...之前我響屋企自己玩...成日睇住時間...好多時要靠意志去完成50mins的運動...真係好唔同!!!!  所以遲d我應該會跟埋上黎玩~~~

玩完去沖涼... d 女人唔著衫周圍走...我無佢地咁大膽呢...都唔敢望佢地...拿拿聲入左其中一格浴室拉埋簾除衫沖涼...好爽啊!!!!!!!!!!!!!!!  不過隻腳好攰呢~~~ 真係腳軟軟的...

沖完涼出黎...佢地上網玩左陣就去食晚飯喇!!!

不過我地去食扒呀...!!!!!    哈哈~~~~ 頭先做咩運動都無用啦...哈哈哈~~~~

呢間食扒好正丫...我地三個人食三份扒...佢兩個食牛仔骨...我就食牛仔柳...件件分量十足!!!   好美味呢~~

呢塊牛仔骨成16 oz~~~ 好大塊呢~~~ 其實唔落汁已經好夠味喇!!!

呢份就係我既牛仔柳...我用一塊換左阿B 1/3 件牛仔骨呢~~~ 食完好飽好滿足丫!!

埋單用港幣抵呀~~~因為居然同人民幣係 1:1 黎計...咁都有既?!  咁梗係比港幣啦!!!

今日好好玩呢~~~~ 不過做左等於無做...哈~~

***

返到 HK 之後...我仲去左百佳買左個新出既雪糕呢...食得好開心...!!  咩減肥都忘得一乾二淨了~~~kakaka~~

 

 

一田取喼

下午放左工就出一田取喼...今日好多人呀...阿B入唔到停車場...咁唯有我自己去拎啦~~~ 人山人海...多人到丫!!

首先我又去左出血...因為想買多支香水比人做生日禮物...喎?!  今日有第二套推出呢...有塊鏡有支睫毛液...仲有個靚既大袋送丫...終於又失守了...買左啦...仲加 $$ 換埋套指甲油啦!! 

我好鍾意呢個牌子既野...因為好浪漫咁...我D fds成日話睇唔出我男仔頭...思想有時都幾女仔...哈哈~~ 估我唔到喎!!

禽日換既抽獎劵今日填好...拎左去放入抽獎箱度...點知放左三張後...有個婆婆制止我...話: 你連票尾都放埋入去...咁你點對 no. 呀?!?!  呃!!!!!  係咩?  唔係成張放既咩?!  呢次弊啦...即刻問d工作人員...婆婆比我還緊張啦!!  好留心聽工作人員講呀!!  佢話唔緊要喎...如果有填電話應該都ok...有人會通知喎!!  而且先前都有人都係咁笨又係成張放晒入去!!  我手頭上仲有一張...正想又成張放埋...佢又制止我...話咁有票尾就穩陣d!!  呃~~ 我太大意喇!!   不過算啦...我都無呢d抽獎運既!!  (← 自我安慰中...)

之後去拎喼...多人到入唔到去...終於埋到去...又叫我行一陣...遲d再黎拎...咁即係行幾耐呢?!  去左就近既 sanrio睇 cushion...其實我想買兩個粉紅色既大口仔cushion黎做跪墊...不過好似無特價...咁唔買住費事拎啦~~ 而且阿B又好似話唔好...所以都係再考慮下先!!

跟住再返去睇下個喼上左黎未...仲有好多人企響度等拎喼呢...有人仲比佢地收左將發票又等極都未有得取貨...等左半個鐘都未有得拎...再問D sales...佢話自己落去拎比我...搶左我張單就走左去...呃!!!!!!!   之前登記時仲差d比左我張單比第二個呀!!! ~__~"  仲約左人趕住走添架...真係好心急呢!!  終於等多幾個字...個 sales 真係拎住我個喼上黎...真係開心番!!  check 完就走人...call阿B響樓下接埋我去粉嶺...放底架車上深圳喇!!! 

今日佢帶我去佢平時做健身o個度玩呢~~~

 

 

買嫁妝

今日阿B響 HK...可以一齊去一田喇...!!   今次主要目的係去買衣食碗同埋龍鳳被~~

香港人係好有 $$ ...又一証明...每次大減價都係好多人黎買野...!!  今日比禽日多左好多人呢~~

行經 D 特價場...見到有D快乾既 T-shirt...都好喎...佢揀左幾件要黎運動著~~ 之後去左間運動鋪買左兩件雞仔T-shirt...仲買左對波鞋!!   呃~~~又話黎同我買嫁妝既?!?!  @@~~

之後去賣床上用品既位置...因為知道佢好抗拒用大紅既床舖...所以禽日見到 Casablanca 有套粉紅色有心心既床單...應該ok掛...所以帶佢黎睇下~~~

就係呢套喇!!   個款都溫馨丫...!!

佢一見到就話呢套得...!!!!  不過我地床單要 4呎半...但想被單要 Queen size...個 sales 好似知我地心意咁...居然話可以有呢個組合賣!!  而且成套都係 $770 ...折左之後係 $569...雖然唔係紅色...又無龍鳳...平而且合心意...應該無所謂啦!! heehee~~~ 阿B話如果上面對公仔係狗仔就仲好...我即刻話唔好...!!  因為咁咪變左係狗男女!?  NONONO!!  hahaha~~ 不過如果我媽媽還在...佢一定唔批我用呢套!!   但係佢最後都應該會隨我意願既...媽媽~~係咪?!  你錫我嘛!! ^^

終於買左啦!!!  YEAH~~!!  好鍾意!! 

其實阿B仲想買個背囊...不過都唔啱心水...所以隨緣啦~~~

之後行行下...見到賣喼既地方...好多人揀喎~~ 其實之前已決定唔買喼...因為實在太多喼喇!!  就算係都想買D軟身既...想用紅色首飾箱代替...心想...都係箱丫...係細D之嘛...呵呵~~

睇睇下...見到有款唔太大...令身...有好多隻色架...個款好靚...不過又係硬喼丫...不過好輕身...而且係拉拉鍊...好特別啊!!  居然吸引住阿B~~@@!!  佢係咁睇...仲好專心聽人講點開鎖點改Password等...之後佢居然話不如買啦~~~ 我都幾愕然架!!!   咁佢話買我梗無所謂啦...不過我又驚佢抗拒紅色...所以話不如買橙色啦...因為係代表shinhwa's顏色嘛!!  係我首選既色呢!!  不過又令我意外...佢又堅持要紅色...話紅色幾好睇喎!!  @@!!  真係估佢唔到!!

終於成交...盛惠 $538...不過無現貨呀...要訂...聽日先拎到貨呢!!

跟住去買衣食碗...唔想買傳統o個d...之前已去吉之島睇過下...已睇中一款...不過吉之島要逢每月的1號及20號先有discount...邊有咁好心思去記住日子買喎!!  知道一田都有得賣...所以襯而家減價就睇埋啦!!

本來只想買兩隻碗...兩隻牒...兩隻匙巾就 ok...因為都唔平啊!! 

但係而家有 7 折...而阿B見到隻杯又幾靚...所以佢話買埋D杯...仲要埋隻 sauce disk黎襯番!!  @@!!  原來男人 $$ 仲易賺!!

對筷子係之前響公司附近既吉之島十元店買既...我見紅紅地都ok...又平喎...所以咪買囉...估唔到d花又襯到好似一set咁@@!! 

終於買左喇!!  好開心...!!  之前睇中一款係紅色底靚d既...不過無拉拉有行唔識既文字響側邊...所以揀左呢款啦!!   呢款感覺都幾清...(P.S. 底下塊布之前係買黎做公仔禮服裙的...不過搞唔惦...所以而家成日用黎做布景影相...哈哈~~)  如果我之前唔係買左小烏茶壺...佢仲想買埋個茶壺架@@!!!

十二樣野加埋要 $277.60...!!   心頭好...真係幾花 $$ ...!!   ^^"   遲d搵個靚盒裝起先得!!  十蚊店應該有...不過唔知size得唔得呢?!

之後換埋D抽獎劵就去左太和食元氣啦~~ 九點幾無乜人...!!

哈~~ 而家可能好多人都寫BLOG啦...D人次次食野前都會影相...好得意丫!!

不過我地因為太肚餓...次次都唔記得影相啦!!! 

呵呵~~ 今日又搞惦多幾樣野喇!!  心情大好呢!!

 

 

又買無謂野~~

今晚約左同學仔去一田睇下有咩無謂野買...減價我地就身痕了呢~~

先去平時同學仔做FACIAL o個間問下d package...個 sales 話我d皮膚做下補濕基本o個個 package 就得喇...唔駛做美白...因為會仲乾添!!  同學仔又幫我問駛唔駛做鑽可磨皮...因之前個 sales 係咁叫佢做...不過sales 話我無暗瘡又無斑...所以做黎係無用既~~

可能個 sales 見同學仔好照顧我...所以問佢...我係咪佢細妹...好多人都覺得我地似兩姐妹架...不過對佢既感情...我都係當佢係家姐好親架!!  ^^

約左下個星期二黎試做...如果ok...就用同學仔既 7 折黎 join...

***

之後去左行一田...無想像中咁多人...可能d人未放工呢...呵呵~~~

我地首先去行sanrio...因為想買把風扇啦...睇中大口仔把雪條型風扇架...不過比hello kitty吸引左...因為可以坐檯用呢!!!

就係呢把野...買完先知開動時好嘈而且唔多涼呢...仲比阿B笑我笨丫...咁細把扇頁就知唔涼啦~~ 真係好睇唔好駛...

仲買左兩卷膠紙...其實唔知用黎做乜...可以用黎痴響請帖度掛....

我知 ANNA SUI 有套緋緋紅唇做特價...而且有個化妝袋同卸妝油送...所以去睇...仲買左支香水...隻味好清香呢~~

響行行下途中...朋友打電話來問我買左被做嫁妝未...原來佢響附近呢...佢話比我知雅芳婷有特價呢~~~ 而且佢一陣會睇下D喼~~~ 真好...大家都響今年結婚...可以多D交流...好開心呢~~~ !!

收線後同學仔就話我...嫁人都無乜似做新娘咁...都唔將D野放上心...成日只係掛住睇D無謂野...!!  呃...仲好講...你同我一樣都係比D無謂野既磁場攝左去啦!!

之後佢出血買謢膚品...原來佢未用過卸妝油...唔怪得成日都咁多暗瘡啦...用防晒都唔用...點清潔得乾淨架?!  @@!!!!!

買完就去左元綠食壽司...係咁傾傾傾...食到人地都要關門喇!! 

今日本來想去睇下D碗...點知都無左件事啦!!  ^^"

 

 

 

換左細細的禮服喇!!

夜晚又出信和喇...換左條 XXL 比隻細細豬呀!!  因為搵唔到 XL...是旦啦...預鬆 D 好D既...只係可以換一次咋!!

今晚落微微雨...經過銀城商場附近...明顯少左人行喎...係因為落雨定係前幾日發生擲腐蝕性液體事件呢?!   D 人真係無人性啦...擲水彈都已經衰架啦...扔中都好痛架嘛!!  今次仲用呢D傷害人身體既野?!  太過份啦...快D捉到個變態友就好喇!!

之後返到太和...有間鞋鋪新開...喎...有converse喎...粉紅色有特價...是旦啦...未著過呢隻色...平就得啦~~  仲買多條 nike 三個骨褲要黎下個月跳消脂健康舞著呢...哈~~

跟住去麥記食包...呢間麥記既座位...大部份比人霸晒黎溫書...傾保險...阿伯捉棋...阿爸響度教女做功課...阿婆響度傾計...o靚仔打機等等...真係幫襯既好多時都無得坐要買外賣...呢度就黎變社區會堂喇!!  點解可以咁既?

返到屋企...拎件衫仔比阿細試著...都ok既...係大左少少...邊個叫你肥丫!!  叫左佢好耐先肯著呀...可能佢以為我整蠱佢丫~~

佢著左唔多 like 我又捉住佢影相呀!!  睇佢個樣幾無奈丫!!  唔肯郁添丫~~哈~

皮膚好痕啊!!

今日無返工丫...因為實在痕到無教好訓...成對手起晒紅點...條頸又係呢...而且仲腫起上黎...因為我忍唔住抓左幾下呢...一抓就會好腫架喇!!

終於要睇醫生啦...其實我間唔中都會咁...不過近年每逢天氣轉...就黎料架喇!!

初時睇普通醫生...不過d藥對我黎講無乜效...所以而定轉左睇專科...不過一叫"專"既野...就即係貴囉!!

只係見醫生都收 $450 !!!!  計埋d藥...次次都將近一千呢!!  所以我好討厭呢個病!!  又辛苦又心痛!!!

都幾個月無睇呢個醫生喇...不過而家轉晒d醫生喎@@~~ 而家呢個有d似林峰呢~~ 不過佢仲求其...佢賺我o個450真簡單...而且藥費佢收得我好貴呢!!!   以前o個個會親自解釋d藥比我知...而家呢個只係叫護士講...以前o個個比沐浴露係成支原裝的...呢個只係比個咳藥水樽裝比我...初時我仲心諗 : 點解要我食咳藥水既?!  支潤膚膏細支到丫...以前係大支架!!  今次只係比左3包藥...其中一款係胃藥...有一款同我睇普通醫生比既係一樣!!!  咁我做乜黎呢度睇呢?!  我睇普通醫生最貴o個個都係二百幾咋!!

埋單計...收我 $1,020...嗚嗚~~~ 好肉赤呢!!   我個心不停諗...咁貴架...1,020呀...咁貴既...1,020既??  之後出左診所...上左商場...好彩突然醒起...佢好似無比病假紙比我...即刻落番去拎...如果唔係仲傷呢!!  嗚嗚~~  唔好再發病啦!!!  無左一隻9份既耳環喇!! ><"

阿林峰醫生話呀...佢都唔知點解我會敏感呀...佢叫我自己留意下喎...um...原來我先係醫師.......

細細的禮服

今晚出左去旺角 check 耳仔...之後就去信和喇...今次既目的係買件禮服比我隻細細豬~~

之前睇過又一城既 log-on...um...d質地麻麻...而且又貴...四百幾元丫...!!  之後上網再search...不過都唔平丫...而且又無實物睇...都係唔博lu...

前一排行開信和...有間賣狗仔衫既鋪頭...裡面有幾件狗狗的禮服...男女都有呢...男仔o個d都幾靚架...不過我隻係囡囡...所以只好買女裝啦~~ 呵呵~~

有件粉紅色幾靚架...著響白雪雪既細細身上應該ok架...不過阿B唔鍾意搞到阿細咁姣喎@@~~ 所以堅持要白色...是旦啦...都靚架!!

簡簡單單都唔錯丫...另外有件有頭紗既...不過阿細一定唔肯比人綁個頭啦...!!  所以呢件係最佳選擇!!  折左 $295...其實都幾貴...鬼叫我D手藝唔得咩...唉......

買左件 L 碼...點知...我家的肥妹...原來係比我想像中更肥...唔啱著呀...胸口差一吋有多呢!!  @@!!!!!   睇黎...除左我要減肥外...我隻細細豬都要減呀!!

好彩3天內有得換呢~~~ 不過又要走一轉出旺角呢~~

 

皮膚又敏感

今日阿B返大陸飲囍酒...我就響屋企o牛~~~

近呢兩年...皮膚無拉拉都會敏感...唔知點解...不過我覺得有可能我再唔可以食咁辣既野喇!!  因為我發覺次次食得辣 D 就會有問題!!

今日又開始復發了...唉...好痕呢~~~ 而且條頸又開始有紅點了~~!!  真係心煩~~ 點先可以根治呢?!

呢兩日都唔開心呢...

羅浮宮影相日

今日天氣不太好...間中有微雨呢~~ um......

因羅浮宮的 $100 化妝是不包男仕 set 頭的...阿 B的頭髮很柔軟...如果出一出汗的話...會成個髮型變得很扁無層次...所以今朝一早佢就出左大埔 set頭...

本來約了 CDL 11:00 的...不過前兩日收到電話...話佢地o個朝會開會...所以要約遲 1 hr...咁仲好~~唔駛咁趕!!

因阿B的頭髮實在難搞...所以去了兩間 saloon 才搞得惦...終於搭 taxi出去...直達門口都只係遲了幾分鐘~~呵呵~~

好快就比姐姐帶上 1/F化妝換衫...幫我化妝的是阿 June...佢個人幾 cool下...佢 set 第一個頭都幾 ok...不過可能我對眼太難化...總係覺得佢化得唔好...camera man叫阿 Lam...助手叫阿鵬...阿 Lam幫我影了幾張相睇個妝效果...其實佢都唔滿意...因為對眼實在太大細了...不過執過都係咁...所以只好繼續... 今次我帶左大口仔大口妹黎呢!!

影既過程都幾輕鬆...可能有左經驗...不過今日阿 B好似不在狀態咁...可能佢個頭影響佢心情掛~~ 但我覺得佢個頭都 ok 喎!!

第一套衫係粉紅色蝴蝶裙...哈哈~~~大部份今日影o個d都係揀 suki 系列... d 姐姐仔都話太恐怖了!!  @@~~

呢套衫影得最耐...由室內去到室外呢!!  我唔係最鐘意呢套呢!!  ~___~"  而且無拉拉做乜要我褸件披肩o者?!  我個膊唔係橫成咁下話?!  ~___~"  我最憎用披肩...!!  我問係咪一定要用...阿June又唔理我喎 ><"  激到我丫~~

今日有好多對響度影相...成個花園塞滿晒人...有時要等呢~~ 有次最搞笑...兩個 camera man為左影相...其中一個坐住另一個的頭咁...笑到我地丫!!  哈哈~~

幸好影相期間完全無落雨呢!!  上天對我們真好!!  ^^

之後換第二套衫...呢件係玫瑰花花...又係超多人揀...成間房四個人同一時間都係呢件...真誇張呢!!  之前比阿 June睇左我想 set 的髮型...不過佢話太妹仔了...而且話我膊橫唔太適合...所以唔肯幫我 set...咁佢話事啦...佢 set 左一個兩邊都有頭髮放落黎...不過我覺得唔太鬈...不過佢話一人行一步啦...綁左幾條辮仔比我...@@!!!  有點負擔咁...算了...後來睇番d sample相...um...我覺得麻麻呢!!  為左呢個造型仲買左 d 花花黎添... $55呢!!   D玫瑰因為太大...同有 d 花仔太唔襯...所以無用到!!   只係用左d藍色桔梗同d白邊葉~~

跟住換民族服...我又是揀 suki 的...不過老孫的那套被尖沙咀取去了...所以只好選第2款...都ok既!!  今次 set 左兩隻髻仔...應該出黎效果 ok掛...真係有點擔心... 阿 Lam成日叫我柔情d...隻手要擺得柔 d ...哈哈~~ 我真係唔識啊!!  仲叫我拎 d 絲巾...阿鵬仲叫我扮o采...我真係扮左...笑到佢地丫!!  哈~~ 今次大口仔中式禮服都有出場...不過唔多囉...我鍾意中式多 d 呢...阿 Lam都話中式得意 d...!!!

呢對公仔係新出的...和之前的那一套有d唔同架...我...一共有三對了......

睇得出有咩唔同嘛?!

影完中式到換最後一套衫了... 今次係著拖尾婚紗...條裙都幾新下...著出黎都幾瘦下...而且遮到 d 鬼鼠肉呢...呵呵~~ 正因為咁呢套著得最好睇...!!

不過阿 June今次幫我 set左個比較成熟的髮型...唉...是旦啦~~ 佢都唔聽我講的!!  我講左唔適合成熟架啦!!   而阿 B o個套黑色禮服...要加 $$ 呢...因其d男裝實在太大件又老套...我都諗唔到佢會加 $$ 呢...哈哈~~ $480架!!  原來佢對衣著都有要求的...哈~~~不過呢件衫影得太少了!!

我換咁多件衫...阿鵬都係換咁多件...阿Lam就同阿B一樣換左兩次衫...我笑佢地時...阿鵬話費事有異味危害我地呼吸道喎~~~哈哈~~~ 不過今日真係幾熱就真...佢地成身濕晒呢~~~

之前阿鵬問我地要唔要 set 2R相 (一套兩款...每款兩張)... $198 可以即晚拎走...阿 B話 ok!!  真懂得捉顧客心急睇相既心態~~~黎賺錢呢~~

影完少少園景就影埋室內就搞惦晒喇!!   卸妝之前...阿鵬拎左張 A4紙黎...裡面有8款造型相...我地揀其中兩款做 2R...我唔鐘意個眼妝啊!!  上下眼線好似好深色呢...UM~~ !!   阿B 話未執相...執左應該好 D...UM...乜可以執得眼線淡D既咩?!

約左 25號揀相...唔寄以厚望啦....除左中式相可能加相外...我諗其他都唔會加啦... 今次一定唔會over budget喇!!  因為初部睇黎...我都唔太鐘意...!!!   而且阿 Lam叫我地擺既 pose變化又不...所以可能好多都會太相似...更加唔駛多心了!!  唔知今次我地會唔會破晒最快揀相紀錄呢?! 

***

成日無乜食野...我地決定去九龍城食放題...!!!   九點半後 $138 超滿足呢~~!!

 

 

 

第一次GEL甲

今晚約左 Nail Deluxe 試做 gel 甲 $288 ...加閃石要加 $120呢...不過因為近...所以是旦啦...唔加石囉!!  橫惦我鐘意簡單 d 既!!

由 6:30 做到 7:50左右...本來揀左粉紅色...不過我驚自己唔適合呢d咁粉色...最後轉左銀色...都ok...清清地~~~ 幫我做手的是 Pinki ...原來佢剛結婚一個月...哈哈~~~所以我地好好傾呢~~ 分享左大家結婚籌備既野...

比 $$時...Pinki 例牌 sales package ...不過佢知我平時都唔會做...所以唔係咁落力 sales...原來不包拆甲的...要 $190 呢!!  如果唔係就自己用甲挫磨...um...真煩~~~

因係粗人一名...所以唔好介意我對手既皮膚比較粗糙...heehee~~

修眉及染髮

約左 Lancome 6:30 修眉...因為 Jennifer 放緊大假...所以搵第個幫我修...um...呢個修得好痛呢...而且叫左佢唔好修太幼...佢又唔聽~~ !! ><"

之後佢問我有冇野要買...我一話無...佢就搵第個同事 follow up我簽名...自己去左無聊玩化妝掃...你駛唔駛咁現實呢?  @@!!!

返到屋企...阿B幫我染髮...呵呵~~~好多時都係佢幫我染的...佢手勢都 OK架!!  咁又慳番唔少喇!!   佢自己都染埋一份呢~~~ 我既係紫紅色...佢係金銅色...不過染左之後...兩個既髮色都深左喎!!  都ok喎!!

消脂健美操

哈哈~~ 好耐以前報讀過工聯會o個d健美操...其實功效唔大...不過都迫到自己每個星期有一日運動既...都好多好多年前喇...其實都幾辛苦的...而且大熱天時跳完又無涼沖返屋企都幾辛苦...@@~ 好臭的汗水味~~

前一排...有同事建議報讀這類課程...哈~~都好丫...又可以郁下喇!!

六月開班...每個 wk 一堂...每堂 1 hr...出下汗都幾好~~ 而且一班人都應該會幾開心的...heehee~~ 又要開始刻苦的體力勞動了!!   Yo~~~Let's Go~

睇牙醫 & 大埔海濱公園視察環境

今日放工去左大埔海濱公園視察下環境...都幾靚喎...感覺舒服!!  Big Day o個日我地打算黎呢度外影呢!!  影左一 d 相...不過都好熱下...見到有對新人黎影相...個新娘見到阿B舉起部相機...佢即係搵手遮住塊面呢 ~~@@!!  哈哈哈~~ 或者我見到有人影自己都會咁做呢!!

呢度好多花...雖然好人工化...不過多彩色會個人都開心d...人工唔人工都無乜所謂啦...影相就係咁作狀...邊會有自然丫...哈~~

希望到時好天氣啦...唔落雨就謝天謝地啊!! ^____________^

***

五點半約左牙醫洗牙同補牙...又無兩千銀!!  洗牙好快...都唔駛20mins就搞惦...補牙就成個鐘呢~~~

七八年前脫了一隻大牙後...因有個空位...所以門牙開始越黎越疏了...成條小牙縫...笑起黎覺得好肉酸呢!!   上次影相時都趕唔切去搞...今次影相一定要執下呢d瑕疵先得!!

呢個牙醫既手勢真係幾得...家下我又可以重拾自信咁依起棚牙笑喇...不過 d 牙可能食得藥多...始終都係黃黃地...嗚~~~

油脂粒

近呢兩個月...右眼下面出了一粒油脂粒...真討厭...仲要響呢d當眼位!!

自己唔識搞...上次幫我修眉既 Jennifer 叫我搵美容院搞搞去...今晚做 facial...就請 Connie 幫我搞搞先得!!

其實我覺得 Connie 唔想幫我搞...不過唔好意思推我!!  佢猛話好痛架喎...會腫架喎...或者因為太近眼啦...所以佢都驚容易發炎唔多敢幫我掛...不過係得佢幫到我咋...所以我堅持唔怕...哈~~

佢幫我清完黑頭就開始搞喇...真係好痛呢...之後佢幫我用機消炎...佢手勢又幾好喎...完全搞惦呀!!  呢兩個多月既困擾無左喇!!!  好開心呢...不過...好痛呢!!  隻眼好快消腫呢!!

好野...影相o個時唔駛煩呢粒討厭的傢伙了!!  yeah~~yeah~~~ 唔該晒 Connie 啊!!

努力運動~~

今晚又跴機...不過阿 B就好懶呢...成日灘響梳化度...直接打擊我的士氣呢!!

不過今晚又做多左時間喇... 51 mins (3,000 kilo)...好突破的數字!!  希望我既意志會繼續強勁落去!!!  嘿~~~

第二隻耳環

今日又比魔鬼同學仔帶左出去出血...今次買左單隻耳環...!!!!  佢都買左架!!!

兩個真敗家!!!!!   呢粒帶起黎型D~~

 

Mask~

近黎買左d mask~~ 有我的美麗日記...不過太多款...都未知邊隻o岩自己...只知道好唔鍾意清酒既味...而且用左有d敏感~~ 呢隻mask勝在平...日日都唔會肉赤...哈~~ 夏日一網打盡...

今日o係卓悅見到有隻綠茶海藻骨膠原mask...$25/pack...即係 $5 一張...見到骨膠原令我雙眼發光...又平...即管買黎試下~~~

有新屎坑...返到屋企拿拿林拎出黎試...張 mask 薄薄地又幾 fit 面型喎...係個鼻位差少少 (可能我鼻大掛^^)...都幾貼面...好似好多精華液添... 不過唔知產地響邊 @@"  雖然有英文及日文說明...不過...大陸野至興係咁架嘛...

敷左20mins...無用水洗...咦?!  都幾舒服喎!!   又幾抵玩...唔知我勤力 d 敷會唔會改善到我咁乾既皮膚呢?!

舊金器

今晚無無聊...開個 " 碼頭箱" 黎睇下自己 d "碼頭" ...喎?!  原來好耐以前都買落唔少金器...有d係人送既...而家金價升左咁多...當年好似3千幾兩咋...而家呢d "碼頭" 我都好少戴喇...近黎唔興戴金呢...原來我都幫襯唔少 justgold...佢呃我唔少手工錢呢~~

呢度好多 mickey 系列既野...而家有 $$ 都買唔到... 成堆野拎上手...都幾重架!!  如果我將佢地變賣晒...唔知有幾多 $$ 呢?! 

望住幅相...其實都有d唔捨得賣...因為真係幾靚下...只係而家唔興罷了...如果我賣晒佢地...究竟我會唔會後悔呢?!

婚禮進度表 (ver20090506)

婚禮日期：	18/10/2009 (星期日)
當日rundown ：	有些少idea
註册
註册地點：	九龍維景酒店
證婚律師：	壹証婚服務
戒指枕:	大口仔-已請Ron加工制造(暑假前交貨)
羽毛筆：	律師提供
結婚証書簽名冊：	律師提供
結婚戒子：	已買 (J's Duet)
婚宴
婚宴地點：	九龍維景酒店
場地佈置：	Casablanca Flower Workshop
March-in音樂：	諗緊 (大概用陶喆, 蔡依林的今天妳要嫁給我)
婚宴音樂：	諗緊 (MC可提供)
成長片段:	純美新娘 (未交相片)
嘉賓簽名冊：	巴黎婚紗 (已取), 羅浮宮 (未影)
簽名筆：	大口仔 DIY 簽名筆4枝 加 花花簽名筆4枝
酒水：	酒店提供, 會再買紅酒兩箱
結婚蛋糕:	酒店提供
回禮小禮物:	未諗定…有幾個方案
Table Stand：	酒店提供 (應該會找朋友DIY)
賓客名單／Seating Plan：	有初步構思
Pre-Wedding／婚禮當日攝影
Pre-Wedding Photo :	1) 巴黎婚紗 (已影及取相)
	2) 羅浮宮 (2009-05-16)
婚禮當日攝錄：	純美新娘:  攝影師 - 福哥, 錄影師 - 未知
	Snap shot攝影師 - 同事及弟弟
禮服及配飾
新娘
婚紗／晚裝：	溫馨 (1WG, 1EG - Confirmed)
	COUPLE 囍 (1WG, 1EG - Hold)
	仲有 1EG 未JOIN (敬酒-心水是紅色 / 送客)
裙褂：	榮華 (已租中五福)
婚紗鞋：	未買
裙褂鞋：	未買
化妝造型：	Shirley @ Image Beauty
頭飾及飾物：	Shirley @ Image Beauty
花球：	1) 絲花球(pre-wedding photo)-Trinice Flower (已取)
	2) 真花球 - agnes b. florist (未訂)
新郎
禮服：	溫馨 (Confirmed)
恤衫：	金都 (會再買多一件)
皮鞋:	未買
西褲:	未買
銀包:	未買
上頭及兄弟姊妹
新郎及新娘上頭人選:	未諗
伴娘／姊妹服裝：	伴娘 - 溫馨租 (Confirmed) / 7條姊妹裙 (未買)
兄弟服裝：	未諗 (兄弟自己提供, 可能會提供tie)
証婚人襟花：	未諗 (可能用Trinice Flower)
兄弟襟花／姊妹及司儀手花：	未諗 (可能用Trinice Flower 或 找Ron)
兄弟姊妹團
伴郎：	Anthony
伴娘：	Maggie
兄弟：	Hong, Chung, Eric, Chris, Franky, Benson
姊妹：	Wendy, Emile, Amy, Yan, Connie, Sammy
MC：	Angel Leung
花車
花車：	1) 美滿 (紅色London Taxi)
	2) 酒店已free三小時花車, 但未決定用7人車還是Benz)
花車佈置：	大口仔中式公仔, 已找Ron設計絲花佈置 (暑假前交貨)
兄弟姊妹／賓客車：	LB's車, LB's 大哥7人車, Chris's車
兄弟姊妹／賓客車佈置：	可能買現成 或 DIY
喜慶用品
接新娘遊戲道具：	未諗
嫁妝：	買了龍鳳鐲, 花花頸鍊, 其餘未睇 (耳環及手鍊)
中式禮餅券:	未買 (會買奇華)
西餅券:	未買 (請同事代買美心80張, 另買50張Pappagallo雪糕劵)
過大禮用品：	未決定 (應該會以果藍, 唐餅及以利是代替有關物品)
龍鳳被及上頭用品：	未買 (應該會買雅芳婷 / 上頭用品在笋崗購買)
紅傘及睡衣：	未買 (笋崗 / 金都)
Cushion及敬茶用具：	未買 (笋崗 / 已買小鳥茶壺)
囍帖:	未睇 (可能用番酒店提供的)
回門乳豬：	未諗 (或以利是代替)
利是封：	未買 (笋崗)
佈置物品：	未買 (笋崗 - 囍字貼, 絲花等)
其他
婚前檢查：	未book時間 (已 join package, 大概六月去驗身)
新居：	泰亨祠堂村
Honeymoon地點：	未決定 (目標係衝出亞洲!!  嘿~)

運動!! 運動!!

今晚又跴機喇...仲做左 47 mins (2,500 kilo)!!  好攰啊!!  而且出左好多汗...希望有成效!!

近黎又食少左零食...不過食量都係咁上下...無乜食少到...因為我唔食野...我會暈的!!  哈~~~

再做運動

懶左成個 week...要開始番做運動先得喇!!

其實上次去溫馨試衫...明確背部係少左dd肉...阿B話估唔到我咁快有少少成果@@!!

我都估唔到呢~~!!  不過下半身就好似無乜瘦到囉!!

今晚做多了 5 mins...45 mins ...而且開始覺得無咁辛苦喇!!!

我要堅持先得!!  嘿~~

終於搞惦個絲花球

今晚去太子拎番個花球...我無上到去...只係阿B上去...個花球重扎之後圓番...不過都唔會改變我既決定了~~!!

***

嗚~~~四月頭已收到消息 b.仔 既花球加價啊...!!!!   原本已經貴架啦...而家仲加多幾百添!!!   雖然有匯豐白金咭會有10% off...不過都唔夠填番個加幅...阿 B落井下石...佢話之前話左你架啦...明明睇中無拉拉又去左第度訂...嗚嗚嗚~~~ 當教訓囉!!

去過又一城問過下...婚期前一個月訂都OK...不過肯定無大牡丹...網上既款好少...去到有本相薄睇...好多款啊...個網得咁少既?!  而且個sales都好耐心同我講大概個 size係幾大...咩花響10月會靚d...服務都ok啊!!  人地咁大公司都唔會咁大鼻要成大半年前hold期...又唔怕佢會執...貴少少都係個保証既!!   好...一於申請張匯豐白金咭先!!

第一對鑽石耳環

今晚去check完耳仔之後...途經 Mabelle...同學仔話而家買野可以減 $300...所以咪睇下野啦...

點知一睇就出事啦~~~ 因為一直都想獎勵自己咁勇敢去穿耳...所以想買對耳環黎獎勵下啦~~~ HEEHEE~~~

就係呢對喇...簡簡單單...人生第一對鑽石耳環呢...13份細細粒...呵呵呵~~~

買左對平平既鞋

去完羅浮宮揀衫...跟住出左太子...行下金都...因為阿B要買裇衫...響地下睇左一間既款都OK...要二百幾...咁上去上面睇埋其他先啦...到 Big Day 時會有兩件裇衫替換...因為阿B超大汗...哈哈~~~ 佢上次做兄弟幫人影相...o個日氣溫得o個幾度...凍到痴根...佢居然都會個身濕晒呢...Big Day佢一定會緊張仲出汗啦...佢仲話最好下午影完外影返酒店沖個涼添呀!!  @@~~ 其實我都想呢...至唔鐘意個身痴立立...去完外影...返去沖個涼再化妝set頭...唔知夠唔夠時間呢?!  哈哈~~~

睇左兩間...終於去返上次細佬租禮服o個間買...好似賣$180幾...試上身ok...買住一件要黎影相先...遲d再睇o岩先買...話唔定再買過兩件新的~~

經過d婚紗鋪好自然又再望下d衫...見到一件幾靚既A-line婚紗...真係好想著一件係A-line呢!!!! ~___~"  你地就比我平凡D啦~~~ 其實我覺得簡單就是美囉...可能我個樣平凡...實在唔想搞太多野...

其實我仲有件衫未 join 的...不過都的唔起心肝去睇...可能過左度氣...又懶...弊啦!!  遲d搵唔到...心水比人hold晒...我實後悔又怪自己了~~~ 搵日真係要去搵了!!

***

跟住行去旺角...途經 blog界傳說中的有利鞋鋪...其實之前都黎過睇一次...都已知正確位置同有咩款...真係好簡單乜裝飾都無既鞋款...而且真係好平...$75咋...仲會響邊會搵到呢?!  拎左兩對白色款既上樓試...d樓梯好難行...上到去都幾多人試鞋...個賓賓問我要乜size...其中無咁尖頭既款無我size...得38...咁唯有試對尖既...其實我幾驚著咁尖的...我隻腳不嬲都好煩...成日腳指抽筋...著呢d鞋一定攰...所以我既抽筋指數一定好高...即管試啦...不過無想像中咁舒服...大一個碼又鬆...o個位老闆...成日同我講唔好意思...又成日講對唔住...~__~"  實在禮多人奇怪呢~~

終於都買左...就係買左呢對呀...!!

呢對都係for去影相...是旦啦...到時頂唔順咪著番我既戰友~~converse囉!!!!

再睇埋d褂鞋...有兩個款都ok...都係80幾元...不過無試著喎...阿B叫我著D有跟既...試左一款都OK既...不過都係睇下先...呢對又唔急既...其實我心目中有一對幾鐘意D色...不過未知響邊度搵到...有人曾經響呢度買到架...不過而家唔見左...借網上找到的相黎分享~~謝謝!! ^^

而跪墊都有心水既...我鍾意d特別既款式...上次問過花得囍...而家已經無得賣呢對雞雞cuhsion喇...我極鍾意呢...嗚嗚~~~

而另外響網上睇中呢款...不過唔知係咪又斷貨呢...個賣家無覆我~~~

唯有再努力去發掘下有冇仲靚d又特別d架啦~~~~

丫~~~其實可唔可以用大口仔 cushion黎做跪墊呢?!  唔係紅色既又得唔得呢?!

***

之後再去卓悅買埋乾濕粉撲同埋假眼睫毛就返屋企喇...因為太多人啦...而且開始好攰喇!!! 

唔知呢d 啱唔啱用呢?  因為對化妝品既野無乜研究呢~~~