盒子相架~送給朋友的禮物

上星期五 (11/11/11)...就係全城熱話的六條一結婚的好日子~~!!

之前幫朋友做完一系列的 DIY ... 終於響佢地大婚前一星期前搞惦...

但係心入面...總係覺得有D野未完成...!! 

記得早在3月時...新郎哥除左交左 20 隻笑口常開貓咪比我...仲有九隻細細隻既貓公仔!!

20 隻笑貓仔...我整錯左一隻...好彩...其他剛剛好用盡...!! 

對左咁多個月...真係好唔捨得...希望他們的兄弟姊妹會善待佢地啊~~!! 
  

仲有呢堆可愛的小貓...拎番黎時...其實因為頭頂的電話繩已經生锈...搞到一身都係污積...用擦膠幫佢地擦番靚仔...!!

其實都花左幾多時間...所以無理由唔用埋佢地...而且好似係朋友專登買番黎的...唔用好似浪費左佢地...!!

睇真...隻隻表情都好得意...!!  但係...究竟點用佢地好呢...!?   我間唔中都會諗諗......

一直都有個諗法係將佢地用響 WELCOME BOARD...不過究竟要用咩方法呢...?!

之後一直放埋左一邊...直至 9/11 的夜晚...醒起之前響 IKEA 買左兩個玻璃盒子...

其實當初都有諗過用呢個盒子...,但係要點擺佢地好呢...?!





唔知點解次次殺到埋身...我就會好似上身咁...突然諗通左點解決!!! 

即刻拎D架生出黎...阿B見我又忙起上黎...問我 : " 乜你唔係整好晒喇咩?!  仲要整乜野?! "  哈哈~~~

拎番之前晒左既相黎睇...揀左幾幅...再剪左D立體字 & 圖案出黎...放埋D貓仔落去...

D貓仔表情我有襯過架...唔係立亂放的...嘩哈哈~~~~

放在地上左拼右拼...終於初步構思完成!!

終於最後決定係將D貓仔咁擺放...仔細睇D貓...D表情真係好得意又抵C...HAHAHA~~

連續做左兩晚...因為第一晚係要將D 咭紙痴在相架內固定...

因為支 OK 膠已經同我分左手...又買唔到支新既番黎...

所以今次用白膠槳...無咁快乾......不過而家先發覺白膠槳係會持久D...無咁易甩...!! 

再將D貓模擬放上去...睇下仲駛唔駛修改......

 

第二晚...拿拿臨開工...因為我驚D貓唔乾...如果運送過程甩左出黎就大件事喇!!!! 

上埋層玻璃架...第一次整盒子相架...雖然我無好好利用屋企有既 scrapbook materials....

不過要響咁短時間完成...都算幾滿意了...!!  其實我自己就好鍾意...唔知一對新人對呢份禮物會唔會有驚喜呢?!

諗住將佢地放在 Reception / Photo corner ...阿B提我...如果用個腳架撐起會好D...

因為個相架就咁企響度...D人會睇唔清...就有可能個個都拎起黎睇...咁樣裡面D野唔散就奇...

醒起之前買左個腳架...就拎出黎試下...效果一流呀!!! 

決定就咁拎埋去酒樓...放在 Photo Corner 度...!!  

(當時最底層仲有隻貓仔未完全乾...都有d擔心佢會亂走...@@~~)





放在相簿區的一角...我覺得係一個不錯的擺設...而且又可以放在新居內裝飾...

希望新郎哥唔好怪我...又整d野阻住佢屋企...嘩哈哈~~~~~~~~~~~~~~~~