再黎朋友的婚禮用品開工

剛剛完成六條一的婚禮用品...突然接到另一朋友的請求...想我地幫佢地整幾樣野...

不過佢地下個月中就大日子喇...其實都幾趕下...

加上我地下星期就去旅行喇...而且之後有幾晚我仲要去玩添...可以做既時間真係唔多~~!! 

要做番6條1咁多項目真係無可能... 

佢地既婚禮而家定左用史迪迪做主題...所以將有好多史迪迪會出現.......



之前應承左會為佢地完成既係:

(1) 姊妹剔名筆 (K.O. - 2011-11-20)

(2) 賓客簽名筆 (已有公仔, 有 idea...不過未見實物未確實)

(3) Floor Plan (K.O. 設計- 2011-11-21, 未拎去整)

(4) 入座咭 (K.O. 設計 - 2011-11-21, 未完成)

(5) 結婚証書套連盒 (未開工...有點苦惱...呢個項目其實最花時間...而家仲未確定用布定Bookcloth...)

之後再加左 :

(6) 愛的宣言牌 (K.O. 設計 - 2011-11-21, 未拎去整)

(7) 襟花 & 手花 (已有公仔...但公仔係爪型...@@~~未有 idea...呢個係難度極高的挑戰...!!)


究竟要點整隻手爪先靚呢...?!   有冇人可以比 d 提點我呢...?!

其實個人覺得用手爪做簽名筆會好d...而公仔用響襟花手花會靚d...

不過原來新娘子係有意思的...佢話比我知...

用手掌係喻意班兄弟姊妹係佢地既手手腳腳...沒有佢地就等於斷手斷腳...@@~~

既然新娘子很喜歡這背後的意思...我會盡量配合...不過已講左比佢知效果未必會好...要有心理準備...

其實要做點都會做到...不過係怕佢會失望罷了...!!    好彩佢都明白...!! 






暫時應該無其他...

仲有檯咭想用佢地對史迪迪結婚公仔黎做主題...

上星期六 (19/11) 已取公仔...順便拎左去祠堂 & 西貢影左一陣...

哈哈~~~ 阿B幫對公仔做左個膠鐵線架...等對公仔就算跌都係向前...又可以企定定...

不過發覺對公仔係聯住左...而家生產商真貼心...!!   嗰時我地對大口仔...係阿B結婚前一日聯的...! ^^

但係我地就有點苦惱...變左張張都係兩隻公仔企響度...只係換左 background....好沉悶...

所以就詢問過新人...可唔可以將d線拆去...之後佢地搵人聯番...?! 

ok 左就拆線...阿B仲做左幅手術圖比佢地...哈哈~~

幅圖好搞笑...!!  

黎緊呢個星期六希望放晴...咁就可以快D完成對公仔的結婚相...比番對公仔佢地先~~~~


噚晚...出左一轉 SSP 買左 D 珠仔...絲帶...Lace...毛毛球等等......

之後再去埋德祥...點知已經搬左...搬左去對面馬路...鋪頭面積仲細左好多...

已經無以前咁多野賣喇.......!! 

買埋T字扣...好貴...而家無一包裝賣...每個 $4.5...好彩只係需要四個......