大日子的回顧篇: 戰鬥造型 ~ 符符碌碌 8 個 looks

一向鍾意簡單一點的化妝及髮型...所以一直都要求 mua 唔好咁重手...唔駛搞到我個頭好似出 show 咁...一切以清簡為原則...就算揀飾物...我都係要求細細抽...唔駛太突出太誇...總之激死陪我揀衫試妝既人...!!

大日子當日...其實造型變化不大...天生頭髮幼及薄...因為我唔想用假髮...所以 mua 要求我去電髮...不過我電左其實都係咁上下... heehee~~ 但係頭髮幼 set 頭都有個好處...太粗太厚就會變得頭大 set 起唔靚...

點解話有八個 looks 咁多...haha~~ 其實有兩個 looks 係意外黎...第一個意外係我響溫馨租了條綠色裙...不過著左girdle好似唔太啱身...又唔肯再幫我改...所以諗住放棄呢件晚裝...之後去左 couple 租過條黃色晚裝用黎送客...點知大日子前一晚玩試身...姊妹C話唔好浪費條裙...叫我唔著girdle用nu bra再試下...點知效果好好多...佢地叫我用黎席前切蛋糕著...出黎反應都幾好...因為呢隻色幾清新特別...蛋糕裙其實都幾靚丫...著起個人好似精神左...

第二個意外...其實只係轉了少少髮型...但都係著呢條裙...因為公司老闆大概五點來到酒店...但當時我剛剛影完外影返酒店正在轉妝...仲要係剛剛將d頭髮放番晒落黎...裙都未著...因為老闆同老闆娘係黎一黎影張相就走o個隻...之後要返大陸廠...所以就拿拿林叫 mua 求其幫我補下唇彩...個頭求其加個頭飾就沖出去...點知因為頭髮薄...個頭飾 (其實係條鍊黎) 行左幾步就跌左落黎...搞到好狼狽...又要入番新娘房搵十幾廿隻夾仔夾實去...仲要 fing 幾野試下仲跌唔跌先再沖出去... 同老闆影左張相傾左陣計就入番新娘房繼續轉妝...老闆娘客氣到...臨走時入黎新娘房同我講唔好意思阻住我...@@!!  我知佢地會黎一黎...不過唔知佢地咁早黎呢...我地唔好意思就真...一個上左房沖涼...一個化緊妝...真係招呼唔到呢!!!

下面就係當日既八個變化不大既 look 喇 ...其實我都幾滿意...因為做到我既要求...唔誇又清清地...heehee~~  你地鍾意邊個 look 邊件衫呢?! 

   <1> 褂 look    <2> 外影 look

   中五福褂   泡泡拖尾婚紗

<3> 意外1 look     <4> 意外2 look

   綠色傘裙晚裝 (頭髮放落黎) 綠色傘裙晚裝 (頭髮束起)

<5> 迎賓 look <6> 進場 + 註冊 look

   紫色晚裝   A-Line蝴蝶結長拖尾婚紗

   <7> 敬酒 look    <8> 送客 look

   藍紅色中式晚裝  黃色A-Line晚裝

做了一個少少的公司民意調查...加上當晚賓客既反應...最受歡迎係 7 號佳麗 (敬酒 look - 藍紅色中式晚裝)...第二名係 5 號佳麗 (紫色晚裝) ... 第三名係 6 號佳麗 (進場註冊 look) ...

直至今日...仲有人同我講起大日子當日既情況...7號佳麗令人太難忘了...可能隻色好搶眼...而且又係少有的掛頸款...加上無乜野昅到既 Deep V...而且又高叉...基本上我響新娘房出黎時...公司班色情狂就已經嘩嘩聲...我上司仲叫我唔好著到咁返工...佢話驚d人唔專心做野喎!!   最開心係高老闆當晚讚左我兩次好似明星咁...之前同佢合照佢仲拖住我隻手架...好似爸爸的感覺...!!  哈~~真係要多得我的好 brother 幫我揀...兄弟A今晚同我講...當晚著呢條裙補影相都影左起碼成八個字...搞到唔起得菜...因為當時係敬酒時間...@@~~!!  個個見到呢條裙都話要影相...成世女未試過咁受歡迎...我諗我呢世都唔會忘記!!

當 7 號佳麗未出場前... 5 號佳麗係至受歡迎...因為隻紫色襯黑色撞得好靚...而且呢件衫係露背的...好多女賓客影相前都摸過我背脊...仲話做左人情要抽番d水...

6 號佳麗其實都係一個十分意外...因為我原本唔係揀呢條裙...雖然都試過...不過當時覺得著得好肥...但我brother 就話好睇...我其實係揀左第二條的...不過張單既 no. 就寫左呢條裙...到 fitting 時...我一著就好大聲咦左出黎...嚇親 couple 既人...但係今次著起又好似幾好睇...雖然 couple 都改埋我原本揀o個件比我試...但最後錯有錯著...可能係天意...所以我決定揀呢條~~!!  公司 d 人話呢件婚紗好閃好高貴咁...一聽到高貴...我就開心到昇左上天...從來d人只會話我男仔頭...用高貴黎形容...真係呢世人都未聽過!!  我相信...都無下次......

其實我反而鍾意送客件衫...因為著得好舒服好飄逸咁...又有我鍾意既蝴蝶頭 cool ...公司有人話其實見我係著得好舒服...著起黎都幾靚...黃色唔易著...反而我著起就好精神...不過......佢地話比起前面o個d裙就顯得太普通... 可能d人去飲都係想睇誇張既新娘...d A-line 裙只係新娘鍾情...響賓客眼中就係普通...仲話比著佢唔會揀...不過我都無所謂既...個個人既喜好都會唔同...阿B就話我...應該揀桃紅色o個條...佢鍾意...哈~~ 我就偏唔揀!!

p/s: 遲d再補d清楚d既相出黎...整理中...不過...當晚太忙...影單人相或同阿B兩個既合照好少...