大日子的回顧篇: 兄弟姊妹

一個婚禮的成功...背後一定要有一班支持自己的好兄弟好姊妹的幫手...當日一對新人真係會忙到痴根...根本無時間理會其他事情...所以一定要靠班兄弟姊妹代為執行d細節項目...事前雖然都準備得七七八八...不過要打點起上來都會好混亂...就一定要靠他們臨場執生了...幸好...當日他們都義不容辭...說實在的...我們的婚禮...實在放了太多無聊野...哈哈~~~ 怪只怪我太多鬼主意...而阿B又能配合去完成...所以相對就麻煩了班兄弟姊妹了...!!

酒店的顯示板...這是阿B做給酒店的...還有一張相片版本...不過暫時沒有照片...

不過我想要奉勸即將結婚的姊妹們...事前一定要和兄弟姊妹溝通多一點...起碼要比佢地知道你究竟想點...因為到時要做既唔會係你自己...你唔同人講...人地鬼知你想點?!  所以認為一切由自己一手一腳會搞得惦...係好蠢既想法...係絕對唔work既... 我也是交帶的比較少...幸好先前也講了部份構思給姊妹Y知道...而且她也一直為我地既婚禮並肩作戰...當晚幸好有她呢...!!

係呀...講緊你呀...你係得既!!  ^^  你好惦呀~~!!  呢位就係我地既檯咭設計師...我地既入座咭最後都用埋佢D檯咭黎做藍圖呀!!  好多人都讚好靚呢~~~

Receiption 檯儘量唔放太多無謂野...因為唔想變得更混亂...所以只放了簽名布...一盤絲花簽名筆...大口仔welcome board & 一對大口仔大口妹公仔... 全白色更能突出展示的物件...清清簡簡...就是我想要的...!!

背後還有我們的大 Welcome board... 很喜歡那紫色的布幕...

期間...姊妹W特意走來新娘房告訴我 : " 講比你聽丫...你一定會好開心...班 waiter 話你個場好靚...靚過隔離場丫....... "  聽到當然好開心...不過都係無時間出去睇呢...... 只知道條迥旋樓梯好襯我地個 receiption...哈~~~其實我地係同對面場 share 架...真係唔好意思呢!!

而阿B嘔心瀝血的傑作...用了他幾個星期的時間去制造的相片樹...真的很成功...當晚成了一班來賓的影相區...@@~~ 幸好有姊妹Y的幫忙指揮...亦多謝一班兄弟姊妹很合作的自動幫忙...很短時間就將它還原展示人前...

油畫的大少剛好...太細張就會顯得小家唔起眼...賓客話鍾意我地張油畫...大概裡面有大口仔大口妹掛...應該好少人會將卡通人物放在自己的結婚油畫內囉...哈哈~~ 姊妹Y成日話我地個婚禮同其他人好唔同...大概我地鍾意唔跟傳統...亂黎一通掛...^^

本來想用絲花圍起幅油畫...不過佈置公司既人勸我地唔好...因為會似死人相喎@@~~ 而且而家唔興咁喎...興清簡喎!!

相片樹上掛滿我和阿B的部份回憶...好珍貴架...!!  和他在一起...照得實在太多相片...這裡展示的只是一少部份... 上面展示了我和他過往踏足過的地方......由初拍拖到近期的也有...當中可以睇到我地既變化...咁多年...真的有太多回憶...太多事一起經歷...別人說很感動...但我又唔多覺...哈~~

雖然事前因為姊妹裙的事件有點小風波...不過大家都咁多年朋友...這只是小插曲...事件解決了也該把事情淡化了...當晚姊妹W亦表現得非常出色...早上幸好有她及姊妹E...令到接新娘環節生色不少呢~~~ 我和黃老闆坐在房內睇on live TV...笑到我地痴左...haha~~

當晚安排了即場派相環節...姊妹A及姊妹Y滿場飛...忙於幫我地分發相片給賓客們...真的很感激...因為佢地著住高跟鞋...跑來跑去真的很辛苦呢~~

伴娘M和姊妹C當日真的為我出了不少汗...而且要她們和我一起捱餓...真的不好意思呢...下午還要她們跟我往外影...熱到她們痴根...當晚每件衫都幫我痴好膠紙收好肥肉才出場...真的很辛苦佢地兩位...^_^  由大日子前一天就陪伴到我們宴會的完結...

仲有伴郎E及兄弟A都有幫我地影左D花絮相呀...不過兄弟A o個d仲未收到呀!!!  睇左部份伴郎E提供既相先啦~~~

影得我少有的含情蜜蜜...HAHA~~

兩條茅利等緊攝影師既安排...

攝影師比我地睇效果...

個花球係我自己整架...出黎效果都幾靚丫...第一次整係咁上下啦~~ ^__~

在伴郎E既鏡頭下...兩位攝影師變左影"後"...HAHAHA~~~

呢張咁唔正經既相...我反而幾鍾意...HAHA~

呢張係伴郎E影的搞笑照片...我覺得好搞鬼...哈哈~~ 我地同阿婆相影成趣...哈哈哈~

Receiption 的位置從來都是比較繁忙及沉悶...不過當晚有姊妹W坐陣...當中發生好多搞笑場面對話...令到坐在那位置幫我們收禮金的細細佬...坐到唔願走...佢話實在太開心喎@@!! 

我細細佬笑得幾開心...哈~~ 佢係個大笑姑爺黎架...佢比較感性...所以當晚佢喊到變豬頭...哈哈~~ 傻仔!!

辛苦晒坐在Receiption的姊妹W, 姊妹E 及姊妹S...!!

另外...一班兄弟都很合作幫忙...因為忽略了入門後會少了兩架車...就要勞煩兄弟C, 兄弟B, 兄弟H走多兩轉...幫忙將D兄弟姊妹及親友接去酒樓食飯...又要載我們去外影...又要代我們取西餅...還有中段發生了小插曲...就係我的寶貝囡囡離家出走...嚇得伴郎E及兄弟B幫我出外四出尋找呢個百厭妹...熱死辣辣著住西裝周圍走都幾係野...又陪我地外影...流了不少汗呢...所以我批准伴郎E去到酒店和阿B一齊沐浴...HAHA~~

而伴郎E及兄弟A大日子前一日更為我地吹氣球...真係辛苦晒!! ^^

通常D大 Banner 會放在宴會場地...我地放響男家門口位置...原來效果更好...夜晚無再放響宴會場地 lu...因為有相片樹同埋大油畫都已經好夠喇!!   況且呢張野都幾阻訂...又似街邊D廣告...hahaha~~

晚上臨時加插了兩位小花女進場的環節...多謝伴郎E及兄弟G借出一對花女...亦很感激兩位花女媽咪...將兩位小花女打扮的很可愛很漂亮...令到進場的時候生色不少...令場面更溫馨...坦白講...佢地兩個搶了我地不少鏡呢...很多來賓都將注意力放在她們身上啊!!  哈~~ 花女T負責拋花瓣...呢個係專業花女...所以拋花瓣的動作舉止很優雅...我們跟在後面亦忍不住笑呢~~ 而花女G就負責幫我們拎戒指座...很鎮定的幫我們送到台前交給伴郎E...伴郎E還是她的爸爸呢...係咪好溫馨的感覺呢?!  很有代表意義啊!!  通常都係花仔花女進場...同時用兩個花女都比較少見...但反而做成婚禮另一個特式...哈~~ 與別不同...令人更難忘了...

哈~~ 本來想叫d姊妹幫我進場時拋花瓣...但佢地話幾廿歲人響度拋...好似發花顛咁唔肯制...咁又係...唔可以只為自己進場有所謂自己覺得的浪漫感覺...就忽略姊妹既感受既...^^  幸好有小妹妹代勞~~yeah~!!

兩位小妹妹很留心聽 MC姐姐的講解...

很認真的綵排... 你兩個條裙仔真係靚爆...我覺得靚過晒我當晚既衫!!

咁淡定...真可愛的花女...HEEHEE~~

正式進場喇...佢兩個真係好惦呀!!  連我老闆同上司 (兩位面向鏡頭的男仕) 都睇到好開心...

好明顯我地老闆同上司係比佢兩個吸引左視線...!!  連我地進場都唔知...haha~~

當晚很多煩瑣事...有一班不辭勞苦的兄弟姊妹...實在是我們的榮幸...謝謝你們!!

本來想在大日子及 Honeymoon後會安排慰勞宴比班兄弟姊妹...不過因為身體出了點問題...所以要延遲了呢............

所以...很自豪有呢班相識很久的好同事好朋友...多謝你們的支持及幫忙!!! ^____________^

一班好英又鬼馬既兄弟們!!

兄弟F, 兄弟H, 伴郎E, 新郎B, 兄弟A, 兄弟G, 兄弟C, 兄弟B

一班好靚又溫柔既姊妹們 & 花女們!!

姊妹C, 伴娘M, 姊妹W, 姊妹E, 新娘J, 姊妹A, 姊妹Y, 姊妹S

花女T, 花女G

p/s:  謝謝~ 伴郎E, 兄弟B, 姊妹S's未來老公, 姊妹Y 的相片提供...^^