JB1018 Wedding Party@席前切蛋糕(綠色EG) & 席前迎賓(紫色EG)篇

響大埔海濱公園影完一輪外影...就要去到晚宴的酒店作準備喇...!!

去到已見到一眾兄弟姊妹...已經開始忙碌地幫我地佈置 Receiption喇~~~

我地既大會吉祥物~~~~大口仔大口妹夫婦!!  到處都會見到佢地幫我地招呼人...哈哈~~~~

姊妹們忙於打點現場...

呢個大型 Welcome Board 係我地自家出品...掛在 Receiption 後面...!! ^^

Receiption 的靚靚招待組成員...加埋我個傻更更的細細佬 & 佢女友~~ 仲加多個對我好照顧的姊妹A...而佢係負責1018大會既統籌及 Time keeper...!!

辛苦晒各位喇!!!  ^_______________^

而呢位靚靚既就係負責佈置統籌既~~~姊妹Y~~ 佢響我地婚禮上既角色多元化...例如: 兄弟無間道@九千萬女郎...檯咭設計師...愛的宣言設計師...Formboard 速遞員...特約派相員...佈置統籌等等...無左佢...我地會好似打麻雀爭隻腳咁!!  o個晚及之前很多個晚上都多得她呢~~~!!

你都比個 GOOD 自己呀?  我比十個你!!

姊妹Y幫我地將相片樹的相片掛滿...還原展現人前~~!!  上面有好多娘爆老土核突 look架...haha~~

一對搞笑的活寶貝鎮守接待區...haha~~~^^

就係有佢兩位響度搞笑...所以沉悶繁忙的 Receiption 變得輕鬆愉快得多了...搞到我細細佬話比我聽佢坐到唔願走...!! ^^

而我就即刻要去轉妝換上 淺綠色 的晚裝...準備迎接各方親朋戚友到來祝賀...因為屋企人開通...都唔駛再著裙褂影相喇...咁我又可以多d時間著多件靚靚衫喇...

之後同d早黎既賓客影下相傾下計...暫時都好輕鬆自在...哈~~ 我地有即場派相...有兩個攝影師影...所以和賓客影就要用較多既時間...之後姊妹A及姊妹Y就幫我地做跑腿...周圍派相比人...真係辛苦晒佢兩位呢...仲要著住高跟鞋添...!!  ^__^

十年前一個網上遊戲...令一班陌生人聚在一起...再變成好朋友...Acer family 既 members~~ 能夠 keep 住咁耐...真係一種緣份~!!  很難得的緣份...!!  ^__^  而另外有d都想請架...不過太耐無見唔想亂炸人...所以只有派雪糕劵比佢地啦~~

影左一輪相...大概六點半左右就到左切真蛋糕時間喇~~~!!  好開心...可以切真蛋糕...!!  我覺得結婚點都要切下真蛋糕先完美...呢個係我既執著想法...!!

因我地擺既圍數唔多...所以無花錢訂個靚蛋糕喇!!  呢個蛋糕係酒店送架...雖然樣子很普通...食左少少 cream 都幾ok喎~~ !!

個 stage 其實好細...所以我地唔想搞到好誇...Backdrop 只用少少燈...白色的紗...加上簡單的 Logo ...完全附合我地要求既簡簡單單...清清地~~!!   兩座水晶花柱係送既~~ 都幾靚架!!

一大班人一起圍住切蛋糕...好開心好熱鬧呀!!!   好耐無切過蛋糕喇...!!   yeah~~ 多謝你地既祝福呀!!  ^___^

兩個低 b仔...塞到成咀都係 strawberry~~~ 之後仲比攝影師玩...要我地用咀互餵...!!  @@" 

成班兄弟姊妹圍在一起切蛋糕...很熱鬧很開心...!!  ^___^ 

之後同 d 親朋好友影左陣相...攝影師就催我去換第二套晚裝喇~~~ @@"  因為開始越黎越多人喇!!  佢叫我爭取時間...因為轉妝換衫都起碼 20-30 mins ...如果唔係就浪費左另一件衫架喇!!

MC 當晚表現非常出色...有她代我們跟進事宜...令我地好放心去招呼朋友...享受晚宴...^^

換左另一套 紫色晚裝 出場...開始忙住同d賓客影相...雖然賓客唔太多...不過都係影唔切...有d要留待敬完酒再補影了~~ 好鍾意呢條紫色裙...好特別...隻紫又靚...!!

兩個臨時加插的小花女...樣子比實際年齡細...其實兩個都八歲喇!!  丫...!!  其實花女有冇年齡限制的?! 

好多謝老闆都黎飲呢...真係好開心好感激咁賞面~~^^  做左咁多年...同老闆最親近都係今次!!

三位由細玩到大的好朋友...雖然事前因姊妹裙 & gatering 的關係有點不愉快...但只係沙中事件...風吹過後就無痕跡...無影響到友情...這就是真正的朋友...^___^  當晚她們都盡心盡力去幫助我地完成婚禮...

往後的日子...還是需要你們在身邊支持和鼓勵......

因為親戚唔多...有d又玩野唔黎...~___~"  敬茶既時間都唔多~~ 不過一敬茶就會用左好多時間...所以最好酒店 / 酒樓員工可以立即幫忙搬椅子拎茶壺...咁樣會快速搞惦又可以再影相了...

一對好搶眼的麒麟臂...哈哈~~ 只怪自己天生愛吃又懶惰...很早已放棄減肥了~~ ^__^  因為著實好難忍受美食當前要忍口的滋味...heehee~~~

因為好多客人都在八點左右時間先到...有d到左又留響門口影相...所以影大合照都幾趕下...又要等齊人...約左律師八點半証婚...律師好準時到左同MC討論...不過我仲未入得去準備...仲影左一輪相...!!

終於八點三先拿拿臨跑去換婚紗轉妝...o個陣好心急...律師同我講乜都聽唔入耳...腦裡面係一片空白...!!   間新娘房又細...成六個人響度...好混亂...爭d鞋都唔記得著就走出新娘房...見到出面已經熄左燈好耐...但係我仲未準備好...當其時真係開始有 d 炆自己 @@~~ 搞到個個叫我放鬆放鬆...笑都笑唔出...好彩最後都趕得切唔係遲好多...不過之後諗番...其實都唔駛咁趕...因為個律師好好人...都無催過我地...所以就黎大日子既 JM們...到時記住要放鬆心情...因為一定解決得到呢...無謂搞到拿埋口面...至緊要保持靚靚啊!!  ^___^

 

下回:

JB1018 Wedding Party@進場 & 註冊篇