2011-08-24 試新開的新翠丰

星期三 (24/8) ...放左工...兩公婆又在傷腦筋去邊度食好...本來想去食大埔公園仔幾出名的東江雞...不過好多人等...家下仲要拎籌先得......而且個阿叔態度極唔好...我地呢 D 受軟唔受硬既人...唔會為左一啖雞肉而受呢D氣既...!!     所以即刻掉頭走...總唔信無野食!!! 

不過又真係好似無乜好食咁...@@!!!   係咪太意氣用事呢?!   走得太型呢?! 

突然阿B靈機一觸 (懶係)...提議去大埔墟街市食...經過間花檔...令我地諗番起上年一件極搞笑既事~~~~!!  

上年又係大概呢個時候黎...去完街市食飯...去取車途中...阿B突然話佢肚痛...叫我響附近行一陣...我當時仲諗...點解我食完無事既?!  佢個鐵打肚好少會出事架喎?!    無幾耐佢就返黎...仲話舒服晒...... 之後就揸車返屋企了~~!!  

後黎至知...佢炸肚痛...去左訂花...哈哈哈~~~ 因為我地同一間公司做野...通常放工又在一起...就算佢上大陸...我地都會約埋一齊食飯......所以佢有咩地方去...我都會好清楚...所以次次就到我生日既時間...佢就會搵機會去辦事又要唔比我知...!!  其實都幾好玩~~~

今日經過間花店......阿B提番起呢件事...笑到我丫~~!!  仲問佢一陣食完駛唔駛又去辦D事?!     佢答我 : 無咁多事辦呀!!    哈哈哈哈~~~

不過今年佢有一個我已知道的 "驚喜" 比我......!!!   期待中.......

*** *** *** *** *** *** *** *** *** *** *** *** *** *** *** *** *** *** *** *** *** *** *** ***

講得太遠了...講番呢晚食乜先......

終於我地上左街市食新開的一檔...叫做 " 金翠丰 "...因為呢檔係新...我地本住試新野既大 " 無謂 "既精神!!    加上呢檔又少人...所以就試下喇!!

叫左三個餸...好大食的兩公婆!!! 

呢個叫做廚師推介既...見未試過咁煮法...就試下啦~~~~

(1) 香芥牛柳條...真係唔錯喎!!!   好好味...煮得好有心機~!!  (阿B話...可能因為少人...所以就用心D整...) ... "話沙bee" 加左落d牛柳黎炒...真係唔錯啊!!! 

(2) 椒鹽豆腐...外脆內軟滑...唔錯唔錯!!!!

(3) 椒絲蝦醬通菜...上碟都有心機...將菜和莖分開黎放...賣相 " 靚 "!!

呢間味道真係唔差...!!!  其實可以再黎試既.............................不過.......

感覺呢檔做野既人係比較雜......

而且...有個後生核突仔...執左檯之後...可能 D 汁淋到佢隻腳啦...佢居然除左隻拖鞋...就咁用條抹檯布黎抹腳......!!!   睇到我地 O 晒咀呀!!!!  

跟住我地好留意佢會唔會拎去洗下塊布呢?!  係唔會囉...轉頭仲拎番黎抹檯!!!!  有點嘔心囉!!!!    

雖然佢唔係廚師...不過想起佢用布抹腳嗰一幕.......就會幻想更多幕會上演囉!!!!  哇~~~

做飲食業既老闆...真係應該正視下員工既質素 & 衛生常識囉!!!!