聽日就係八月喇!! 即係仲有兩個半月時間咋!!
八月內希望完成埋以下部份...!! 要開行Turbo!!!!
(1) 買女婿多寶 (皮鞋, 西褲, 皮帶, 銀包)
(2) 買鞋 (我, 阿B, 黃老闆, 細細佬)
(3) 搵花球款式資料 ~~~> 訂花球
(4) 開始搞要DIY既野...起碼要有初形 (<~~ 個個月都係咁講...)
(5) 搵頭紗及手套資料
(6) 諗下個 backdrop 用咩色咩設計
(7) 搵兄弟 tie
(8) 身體檢查
(9) 覆MC婚宴音樂
(10) 買紅酒
(11) 買唐餅咭, 西餅咭, 雪糕劵
(12) 買束褲, nu bra
(13) 做禮服 (黃老闆及細佬)
(14) 買禮服 (伴郎)
(15) 搵相 (整相簿, 成長片段)
(16) 印貼子, 咭......
其實我已經做左好多野下...點解好似仲有咁多未做既!? @@~~
結婚就好似考試咁...九萬幾樣要準備......
台上幾個鐘...台下十年人工!!!!!!!!!!!!!!
今日響公司唔知係咪撞邪...無拉拉坐坐下覺得好凍...之後頭痛肚痛...又標汗...但其實個人覺得幾凍...食左粒止痛藥...仲有D想嘔咁...
放左工即出沙田想睇醫生...不過唔知係藥到定係換左環境...又好似無咁痛...可能出左身汗覺得好左好多...所以最後都無睇醫生...唔想食太多藥...一食多藥人就水腫...捱過左無事就唔食好過食~~
***
響火炭車站售票處見到有隻狗好似搵緊主人咁...不過我覺得佢幾老下...因為佢行得好慢...只響售票處徘徊...佢主人唔係遺棄左佢下話? 車站職員又唔敢埋去...只係響度望望下...其實我唔知隻狗咩原因響度...可能佢係響度唔見左主人...所以不停響度四圍望...只係覺得隻狗仔好忠心...希望佢搵得番佢主人啦~!!
***
搭緊車途中...突然醒起要幫姊妹們約化妝師...即刻打比mua大 S...問佢要幾時 book...因為佢公司會派個人黎做...佢話而家都可以book...仲話六個有折...我再問佢有冇得再平D...佢話除非唔o係佢公司book...佢自己幫我搵其他化妝師...我問佢手勢得唔得架?! 佢話好難講架喎...個個要求唔同...哈哈~~ 因為我話我d姊妹要求好高架...如果朝早set完頭未到夜晚就甩頭甩髻就唔好啦...佢話如果係佢搵既...到時唔ok...佢會幫姊妹們搞番惦喎!! 反而公司派o個d佢就唔會執手尾...因為各有各做唔想搞人地d野喎!! 佢多次叮嚀我唔可以同佢公司講 @@~ 咁我都唔會打難人飯碗既...於是成交...!! 每人平左六十蚊呀!! 姊妹們...希望到時大家都化得靚啦~~包括祝福埋我呀...!!
另外問埋佢 final 試妝試頭...佢叫我九月尾去揀飾物o個日試埋...唔駛分兩日去咁煩喎...到時要帶埋d衫既相...弊喇...溫馨o個兩條裙唔知幾時可以影相呢? 要做下功課set d 咩頭先得...不過我都無乜 idea...只要唔太誇就 ok 喇...普普通通其實仲啱我......
又搞惦一樣...姊妹呢part暫時可以放低了......
***
催左阿B好多次搵齊d兄弟...今晚終於搵埋兩個兄弟做車長...哈~~ 阿B話我搵左七條女...所以佢要搵番七條仔喎! 今晚搵埋阿松同阿康...我仲笑佢兩個係盛年組既入選港男...哈哈哈~~
兄弟仲有一個就搵齊喇...真漏氣!!!!! 因呢位今晚響高山劇場獻唱的關係...所以電話無人接聽...我地係突然醒起佢唱緊歌的...@@~~ 希望佢有熄電話啦...嘩哈哈~~ 如果佢袋響身就........呵呵呵~~ 唱粵曲有電話既音樂聲...佢咁識執生...我諗佢會即場扮吉百利廣告個細路呢~~~哈哈~
***
呢本就係裝住d單據及資料既活頁簿...就黎爆棚喇!!!
今日決定北上笋崗訂D小禮物同買D結婚用品~~ 我地成三點幾先上到去...哈~~因為唔願起身囉~~
10分鐘既的士車程...廿蚊雞車費~~話咁快就到左笋崗...我地大概黎過四次喇~~如果用成本學黎計...我地每次買d買d...睇下昅下咁...唔慳得幾多...不過以我呢d未來c奶既心態...真係行下都好開心架...呵呵~~ 總之搞有關結婚既...仲要兩個人一齊搞既就唔再係用 $$ 黎衡量啦~~~ 所以如果真係想慳又買得抵既話...都係一次過寫定份清單先上黎買啦~~^__~
先行"笋崗文具玩具禮品批發市場"...鵬鵬又係超多人...今次仲入唔到去...都話呢間野做唔到我地生意架啦~~ 跟住去睇下心水小禮物...有blogger介紹係上 1樓既...不過正確鋪名就唔知...所以唯有自己搵搵啦~~~
可能因為上個星期打風啦...今日特別多人呀~~~!!
第一間...問價錢...喎?! 連埋刻名仲平左d...而且覺得個 sales 幾老實下...!!
第二間...一開價就貴一倍...訂過 100 居然已然減半...不過刻字要收做版費呀...即係每件野要加兩蚊呀...傻架?! 貴咁多...唔老實呀~~!!
第三間...同第一間既價錢差唔多...不過都係覺得第一間明碼實價d!!
好~~~ 睇埋其他野先再決定...
再睇下d 絲花鋪頭...唔知係咪呢度係批發...d野放得亂d...所以都係覺得花園街伯伯o個d靚d ... (可能只係自我安慰中...因為呢度價錢係平D既...哈~~)
不過都係無買d花籐...因為阿B都未定實點佈置個花園~~所以又要留待下次再買喇~~
上次無行百合隆...突然醒起家下好多blog友都話o個間"立興"價錢公道d...所以就過去睇睇...入到去地下...行兩行就無拉拉搵到間鋪喇...因為企左好多香港人響度入貨呢~~~
有個女sales招呼我地...極之好禮貌...我地係咁執執執...今次清單上既野差唔多買晒喇!! 以下所有物品只係用左人仔四舊水有找...!!!
因為決定著褂鞋啦...呢度又平喎 (人仔38咋)...著起黎覺得幾好睇ok舒服...sales姐姐話影相幾靚架...所以咪買呢對啦...唔駛煩喇~~件睡衣有d花花...質地幾好咁...所以咪買埋...最搞笑個姐姐話可以平時都著得...唔係嘛?! 我腦裡面即時出現在個景像呀~~ 就係紅色睡衣著埋褂鞋...加上我長直的頭髮...村屋地方又黑麻麻...夜晚見到我咁樣去扔垃圾...人地一定以為撞鬼呀!!! 阿B話男既唔駛著喎...佢嫌娘 (其實佢驚我迫佢著馬褂呀...哈哈哈~~~)...不過後黎睇單先知要 55蚊呀...我地唔記得問價添...呢件睡衣響呢堆野之中係最貴的了!! 唔知有冇買貴左呢@@~~ 我仲未試著...唔o岩既話...可以下次拎去換~~
好難得先搵到把個柄唔太膠又無印字既遮...開價人仔30蚊...不過佢落單就寫左28...是旦啦~ 基本上有部份野買貴左...有部份野平左...所以我地都無乜討價還價...因為好熱下~~
之後姐姐仔話啤牌同子孫桶裝飾要過新鋪取貨...問我地介唔介意跟埋去拎...好啊...去見識下~~ 行左兩條街...有個新商場呀...叫做笋崗工藝禮品城...不過無乜野行既...佢仲話比我地聽d野賣得貴d添架~~
買埋個杯托...啤牌要左貴5毫o個款...因為平o個隻實在太薄太軟唔得呀...駛唔到牌呀!! 埋單計數...只係肯送左四包仔利是封...貼子唔肯送要收錢呀!!
o個幾粒英文字響百合隆某鋪頭買人仔兩蚊粒...唔肯減...><" 黎到呢邊賣人仔一蚊粒...比人呃左添! 另外響地下某鋪頭買左扎繩黎加工d小禮物...不過無check到...返到黎先發覺質素好差...下次要拎去換添...唔知認唔認數呢!?
見到有d香港人(仲要係外表好潮的後生)上黎印帖...某d款同香港既差無幾...應該平好多好多...其實香港o個d好多都係拎番上黎印的...!! 如果見到我地張帖呢度有得訂...我地一定個心"拿"死!!
之後返轉頭去"禮真多"度訂埋d小禮物...訂左180 套...貨到後我地會上黎驗貨先...之後再速遞落香港...個妹妹仔好搞笑...只係記得開單就算...居然唔記得收錢呀!!! 仲要係阿B提佢至醒起呢~~~阿B同佢講下次記住開完單要收埋客人錢先啊!! 哈哈~~~ 我都話佢老實架啦!! 不過佢唔係汪菲...佢姓郭的~~ 買左隻咖啡杯好得意...裡面寫住 POISON的...哈~~
之後見到間做水晶相架既鋪頭...問左價錢...覺得好呃人...再問另一間 " 天力 " ...呢間老實好多啊...價錢仲平差唔多一半...所以一定要格下價呀...之前o個間張咭片...我地當時即刻掉左...費事搞錯嘛...哈~~
已經七點多...d 鋪頭陸續收鋪喇...所以我地決定去食晚餐...見對面馬路有間 KFC...所以就試下深圳 KFC 喇...佢地同 HK有d分別...呢度無飯食的...一個桶餐人民幣66元...有支1 lt 汽水...上面仲有韓國人氣組合 Super Junior M 既俏像...D雞幾好味喎...無香港o個d 炸得咁油咁熱氣喎...仲有魷魚鬚食呀...
食完準備打的去交通樓...不過好多人等的士呢...之前比人打左尖...跟住成大鵬人響度等...又無吉車喎...阿B行後少少等...我就企前少少...正在煩惱之際...有架有人既的士停響我前面...司機開窗同我講...話個客去前少少就落...叫我上車先...@@~~~ 我居然聽得明國語呀!!! 咁咪揮手叫阿B上車囉...阿B上到車...問我點解前面有個女乘客喎...哈哈~~~ 不過我都唔明o個度咁多人...但點解個司機只係叫我上車囉......@@!!
***
返到香港...好彩無落雨...如果唔係都唔知開唔開把遮用好!! 哈哈~~
響返屋企既途中...阿B成日拎我把遮黎玩...一時扮盲人...一時扮銀樂隊指揮...又扮老公公揸拐杖行路...又扮劍客...臨入閘門...佢見到個燒烤爐...居然扮燒野食!!!! 佢今晚顛左呀!!!! 無聊指數係極級...!!!! 屬於極度危險人物!!! 佢應該係未食飽所以有呢D失控行為...返到屋企食左個麵就回復正常喇!!
***
如果各位想訂d小禮物...不妨考慮上去搵下...因為好多香港賣既小禮物...例如: 毛巾蛋糕, 毛巾波板糖, 支裝毛巾花, 小餐具, 小相架, 水晶擺設, 蠟燭擺設, 筷子, 印環保袋, 鎖匙扣等等...同呢度賣既無乜分別...不過價錢呢度真係平好多...就算印埋咭仔或刻名都唔係好貴...出貨又快...當然要格下價咯~~~
一年一度既書展已經開鑼...每年我同細細佬都會扮下文化人...去吸收下人地既文化...
今年既目標又係買D無聊書...年紀大唔再鍾意睇多字既書...鍾意睇下D港式漫畫...好似我的低能系列...麻煩系列等等...只要圖多我就喜歡架喇!! 另外想買D旅遊書黎睇下...無得去睇下都好開心~~
食完 lunch 就向會展進發...今年唔算多人...而且天氣唔算太熱...因為有d風吹下...好快就入到會場...
入到去即刻比一個 counter 吸引住...Green Print~~ 係間未有門市做印刷集圖本既公司...我正想自己整本相冊送比我爸爸...而且價錢便宜...厚皮的外頁厚咕紙的內頁...睇d sample 都幾精美...問左d資料就比錢買左幾張 couple ...試下玩下先得!! 如果做出黎真係唔得先再去 blurb整啦~~~ 不過我家下都未搵相呢~~
今年書展既特色係度度都見到d o靚模既寫真...仲有好多出名d既都露下肉...好似 Stephy 同 2R 既 Race...最突出係周秀娜...Angelababy同埋 Kama...至多麻甩類既人排隊買黎睇.....香港人都係鍾意睇圖多過睇字.....
見到麥玲玲...真人原來好矮細...@@~~
之後見到 YY...即係五個背包廿七天的練習曲既作者啊...佢真係勁啦...寫blog寫到出書...我都想啊~~~ 見佢有本新書出...書名叫做"我們都是這樣 火羅 大的" 個 火羅 根本搵唔到呢個字打出黎啊!!!! 我好鍾意...所以就買左本...個 sales 仲叫我同 YY影張相留念...呃.........
見到 TVB o個隻 Buddy ... 貪得意同佢黎張合照...又買左兩排3A電...送左把麥o麥風扇仔...見到 Feel 100% 既作者劉雲傑...我好佩服佢出呢本書出左十幾年但係只係得十幾本~~~~
之後清醒番要做正經野...就係去搵低能系列...上年買左 我的低能之道 1 & 2 及我的低能婚禮...今年出左兩本新既呢...掃~~~ 我的低能旅行及我的低能大肚之道!! 送左兩個門掛呢~~雖然無乜用...不過咁有誠意就收左佢啦~~~
跟住目的就係麻煩女生RERURN...上年買左麻煩女生日誌同埋懶鬼OL日誌 ...都幾搞笑寫實的...!! 至鍾意睇呢類既繪本~~~ 仲送左個 folder添~~
買左兩本髮型書...一本 for我...一本 for 細細...
見到朱薰e出左本潮語新聞字...為左要與時並進...所以都買左本黎學下野~~~如果唔係好out架喇!!
好鍾意墾丁...想下一站自由行去呢度...去下台南...去下台中...自己 plan 行程好有滿足感~~ 不過都要買本書黎睇下有乜野景色...
買書用左三舊幾水...呢八本野都幾重下 @@~~ 哈~~我細佬話...一睇我買既書種...就知我係個極級無聊人呀~~!! 係丫...我係啵!!! 笑下唔好咩?!
行到七點幾...搭隧巴過旺角食日本野...好美味~~~ 因為有人請...呵呵呵~~~
距離大日子仲有3個月...我地仲未揀好請帖呢~~ 上星期去會展 join 左金城印帖...所以今日就過灣仔揀埋張帖啦~~~
間鋪真係好易搵...一出地鐵站隔離既大廈上1樓就係喇~~ 咦!? 呢間野咁特別既...職員係全女班...!! 而且仲用apple機黎做稿添...真係估唔到呢班阿太好叻啊!!
我地係咁揀揀揀...最後都係揀番上次既款式...不過轉左顏色...其實原本的米黃色 grand d...不過我鍾意紫色浪漫 d...仲印埋我地既 logo...哈哈~~~無錯呀...有我地既 logo 呀...好簡單既設計呀~~ 係完全無花款架!! 不過我幾鍾意喎...即係我幾鍾意無印咁...貪佢簡單...哈哈~~
阿太好認真處理我地個 Logo...阿B好認真咁監工...
十日後有稿睇...不過我地居然無帶酒店既地址黎...@@~~要再 e-mail 比佢地添~~~
睇到酒店送既帖款...原來要 $9.5 一張...原來又金又紅係貴d既...睇睇下都覺得順眼又靚左...哈~~
暫時搞惦...!! 日子越黎越近了...不過我地仲係好懶.....
***
今日差d唔見左部電話呀~~話說call左架的士去太和火車站...幸好阿B落車時好心弄好條唔識回彈既安全帶...咁我又好自然咁望番入個車廂...突然見到個 seat 位度有個橙色殼物體好熟面口...丫~~~~~~ 係我部成日 hang 機既 i-phone呀!!! 好彩見到咋...!! 即刻執番啊!! 之後阿B仲成日窒我...叫我睇下部電話有冇唔見到呀!!!!!! ><"
早兩日...CDL 居然打比阿B話有相收...呃!!!!!!!!!!!!!!!!!! ><" 明明叫左 Fiona寫明打比我架嘛!! 因為我後加左d相呢~~ 我仲想話比個驚喜阿B添...點知佢會咁樣無拉拉知道喎!!
去到CDL...可能呢排成日落雨...今日都間中有呢...去到得一pair人影緊相...無其他客人喇!! 個 sales 帶左我去揀相區...之後有位師傅拎本相簿同隻 CD 比我...check過無問題簽番個名就走得喇!!
收到喇...好開心呢! 而且佢寫 7月25日...真係比預期早幾日有呢!! 希望8月尾的相都係咁快收到就好了!!
不過其實都無乜執到d相...係白左 d 光左d...其他只係執相阿B 額頭o個 d 小疤痕~~ 我d眼肚眼紋仲見到呢 @@~~ 不過都好既...自然 d 囉...哈哈~~
一直心掛掛既姊妹裙項目...終於今晚去揀衫喇~~~
出奇地一次過約好了七位...只是有兩個因工作關係遲來了...但可以 join 到一齊食飯...好開心呢~~ 八條女嘈到拆天呀!! 食完飯再去陪遲來的兩姊妹揀衫試衫...個個意見多多...哈哈~~~ 又係嘈到嘔又搞笑...間鋪頭比我地玩晒咁~~ 呢餐雖然食得好貴...差唔多八百蚊...不過請姊妹食飯...無乜所謂啦...只要食得高興就得啦!! 絕對值得!! 有d姊妹要計番錢比我...不過我一定唔會收囉!! 姊妹 gathering 都收錢?! 唔係呀化!? 不過有d人真係咁計較的!!
過程好順利...個個姊妹都好快揀到合心意既衫...而且d款好ok啊!! 好期待試身的日子呢~~~ 希望一直順利到尾啦~~!! D妹妹仔係有個生手D...唔識度身@@!! 但係個個都好友善又忍耐...
而家暫時定左d 款, 在九月頭前都可以隨時去改款呢...不過十月頭才收衫...有點擔心時間好緊呢~~~ 咁上下要再打電話去問問先得!!
款式不大相同....但顏色一致係米白色...腰帶或小蝴蝶結係深紫色...出黎效果應該會好靚~~
雖然大部份都係唔同款...不過只要各位著得舒服又靚既話...其實都唔駛一式一樣既!!
試衫過程無乜遇到黑面...態度好好...妹妹仔又親切笑容滿面...係 Gloria 有 d cool...不過有時佢都比我地引到笑呀...哈哈~~~因為班姊妹實在太搞笑喇...!!
呢間公司係人太多...地方太少...款式大路都好容易揀到...
好開心...暫時都好順利下!! 不過 fitting 係最易出錯既時候...希望到時 ok 啦~~!! ^^
阿恩及 Amy 都揀了呢款...不過條帶就有不同...阿恩一直鐘情呢件...所以佢都無乜試其他款...而 Amy 就改了為掛頸款...條裙個款著起黎好靚架...又 young 又 trendy~~ 係我心水款式之一...佢地初頭以為呢個款會顯得胸大唔好睇...其實呢D款先分散到人地既注意力...著起黎一D都唔誇張個胸呢~~
Connie 就著咩都靚...件件試著出黎既效果都好靚...瘦真係著數D...佢就鍾情呢件...好羨慕佢腰幼幼...我仲笑佢 : 你好似仲似新娘啊!! 哈哈~~~ 條裙雖然好簡單...不過佢著起黎顯得個人高高瘦瘦好靚呢~~ 不過簡單其實仲靚~~弊!!! 到時唔可以安排佢企響我隔離...容乜易比佢搶晒鏡呀!! 哈~~^^
之後輪到大笑姑婆...阿太話自己肥...又話自己公司近呢度想第日自己黎試...不過梗係唔得啦...所以係咁推佢入去試...佢試得最多又最搞笑...嘈到 Gloria 都皺晒眉頭...哈哈~~終於佢揀左呢件...佢好抗拒要佢著呢d衫呢~~ 因為佢真係好男人婆下...哈哈~~
而 Maggie 就決定著番溫馨租o個條...個款都好靚架...!!
之後比錢...佢地差d計少我錢呀...因為落訂時暫時用短裙黎計...而佢地忙到唔記得計番我長裙價...到比左錢等找錢時...我諗諗下好似應該唔係咁少...拎張單黎睇見佢未改就提番 Gloria...哈~~ 我唔呃你啦~~ 大家開開心心...!!
跟住過左隔離越南餐廳食野...join埋兩位姊妹...又係嘈到嘔...其實次次我同Maggie, Wendy及Emile出去食飯都係嘈到拆天...就係因為有位大笑姑婆囉!! 今日仲加多四個人...笑聲變成加多一倍...!! 好開心呢~~ 好難得咁多個可以一齊出黎...!! 其實有D仲係第一次見面都無見外既感覺...特別係講點玩兄弟時就更講到眉飛色舞...個個都出晒招...嘿嘿...兄弟們你地有難喇!!!!!!! 而阿B仲話我用一個Wendy都夠殺了...哈哈~~ 兄弟們祈禱吧!!! 要預多點時間玩先得...哈哈哈~~~ 實在訓左諗起都會笑醒!!!!!
成個晚餐聚會好開心...初時會擔心咁多女會唔會好混亂...又唔會喎!! 揀衫試衫時大家都會比意見比對方呢~~ 當然有時會互相取笑下...但係都無傷大雅...笑下先會增進感情啊...我地幾個都係咁由細顛下顛下咁笑到大呢~~!! 有時我甚至懷疑我個口咁大...就係因為笑得多~~!! 而我咁粗魯都係因為近得佢地多!!!!!!!! 哈哈哈~~~
叫到成檯野...食得好開心...不過後來至醒起唔記得影張合照呢!!! 嗚嗚嗚嗚~~不過唔緊要...當時既場面我永遠都會記得!! 好感動好難忘呢!! 姊妹們...多謝晒!!!!!!!!
因為鋪頭收九點半...所以食到九點我地又返入去...再陪另外兩位姊妹揀衫試衫...
Wendy 及 Emile 成日互相取笑...因為兩個都比較胖...但係佢兩個一企埋一齊就顛左咁...成日話對方係墊底o個個...Wendy仲叫 Emile 試佢著過o個d就得喇...因為效果都差不多...哈哈...比佢地兩個笑死...終於佢地兩個都係揀同一款啦~!!
Emile試衫過程好搞笑...成日未著好就走出黎...春光無限...哈哈~~~ 而呢間鋪頭對面就無厘頭開左間類似賣關於佛既野...我地仲搞笑話o個個老闆一定成日有野睇...跟住拎住d佛珠一路睇一路話罪過罪過...cool cool 地既 Gloria 終於都比我地引到笑...因為我地實在咩都講得一餐!!
之前佢地好忙時...我地仲幫佢招呼其他客人添呀~~ 不過間鋪真係好細囉...!!
跟住到 Sammy 揀...佢就係最乖o個個...先前做定下功課...心目中都有幾個款式揀好...佢試左幾條...最後佢揀左呢款...斯斯文文...呢款都係我心水款式之一呢...
終於揀晒喇~~ 好順利...!! 而家D款到九月頭前都可以隨時轉...個個都有張獨立單...都幾好喎...可以多D私隱 (因上面寫有三圍數字呢)...雖然我地已經清楚睇到晒各位既身材...哈哈哈~~~ 到時又約埋一齊 FITTING...又顛過~~~ HOHOHOHOHO~~~要等一齊等...!!
差不多搞惦既途中...佢地突然發現有條靚裙...紫色出黎效果好靚...個款仲著起好瘦好好睇...而且仲可以將條吊帶當埋披肩呢...呢條我叫佢做魔法裙...!! 連 Wendy 試上身都好似瘦左一個碼咁...不過唯一一樣唔好...就係好易走光...唔可以著bra架!! @@!!!
而 Gloria 亦坦白同我地講...揀呢件要預左到時要fitting幾次先會ok...而且因為質地較軟身...所以容易走光要痴膠紙的...而有d姊妹覺得 sexy 過頭...所以都否決了一齊轉呢件呢~~ 不過我真係覺得呢條好靚呢~~
其實淺紫色都好靚丫...我叫過佢地不如轉顏色...但係佢地話驚搶我鏡...所以最後都話 no...其實我唔介意呢樣喎...!! 咁淺色唔怕架...見到紫色我好開心呢~~!!
成晚過程順利又熱鬧...真係好難忘好開心...都係班姊妹實在太合作了... ^__^
其實唔同款...只要姊妹係齊心又係真正既朋友...到時影張相出黎都會好襯好夾的!! 呵呵~~ 我地姊妹情深...一定得!!
而家只係希望交衫過程順利呢!!! 希望上天繼續眷顧我啊!!!!!! 大家祝福我吧!!!!
一直心掛掛既姊妹裙...終於今晚去揀衫喇~~~
出奇地一次約好了七位...不過最後有兩個遲來了...但可以 join 到一齊食飯...好開心呢~~ 八條女嘈到拆天呀!! 食完飯再去陪遲來的兩姊妹揀衫試衫...個個意見多多...哈哈~~~ 又係嘈到嘔又搞笑...
過程好順利...個個姊妹都好快揀到合心意既衫...而且d款好ok啊!! 好期待試身的日子呢~~~ 希望一直順利到尾啦~~
而家暫時定左d 款, 在九月頭前都可以隨時去改款呢...不過十月頭才收衫...有點擔心時間好緊呢~~~ 咁上下要再打電話去問問先得!!
咁多個 Connie 著得最大方又好看...^^ 影相出黎效果最好~~ 阿B話到時佢企響我隔離幅相都會好睇 D...哈哈~~~
其實佢著條條都好好睇...佢自己最後就揀左呢款...幾特別又顯得佢腰幼...果然有 taste !!
而 Amy 比較鍾情d輕盈款式...佢著得都ok啊~~ 之前佢都有試其他款...不過我未黎所以d相響佢部相機度~~
佢而家仲未揀定...有機會會轉呢款...因為呢款變化度高d...而且唔駛再加披肩~~ 但係比較易走光囉~~ 因後面係露背...而且唔可以戴 bra 的~~
暫時定左的款式...不過會改成掛頸式~~ 我最鍾意呢款...著得個人 young d...trendy d~~
阿恩試得最少...因為佢上次已經試過好多款短裙...心目中佢已揀定左喇~~不過我地都叫佢試下其他...佢鐘意紫色...不過唔鍾意呢款露太多背了~~
佢最後都係揀番呢個款...上次試身時...佢一見呢個款就好抗拒...話大胸先會著...傻妹...呢d款先分散到人地既注意力呀!! 著起咪幾好睇...好青春可人呀~~ 佢同Amy揀既一樣...不過 Amy 係掛頸...阿恩就吊帶...兩種著法各有各好睇!! 而呢隻色就同制成品完全一樣...蝴蝶結既色都一樣呢~~~
Wendy 起初唔肯試...佢猛話自己肥呀...唔係太肥啦...只要揀o岩款就可以了!!
不過佢係試得最多款既一個...好多款都唔ok...有 d 佢甚至唔肯著出黎!!
其實佢著呢條幾好睇...呢條裙出奇地好似有魔法咁...個個一著起就變得瘦左又修身...除了 sexy 外...真係可以考慮下的!!
最後佢揀左呢款...件衫做起左o岩番佢身型應該都ok架!!
食完晚飯再成班人去 Exing 幫 Emile 同 Sammy 揀衫... Emile 又比較難揀d ...所以比番 Wendy 之前試過o個d佢試出黎睇...
藍色呢條都ok...簡簡單單仲有腰d...
最後佢揀既款同 Wendy 一樣...!!
最後到 Sammy 了... 佢做左功課黎架...響 Exing 個相簿網度影底左幾款響手機入面...佢試左幾條~~
佢心目中原本想揀全絹質地...不過因為會太現肚腩...所以最後揀左有紗的款...幾好睇架...斯斯文文...
之前響溫馨就租左呢件比 Maggie...都幾清幾靚架...!!
其實佢著起長裙一d都唔顯得佢矮丫...不過佢少著裙...成日以為自己對腳長...所以想著短裙...不過佢腰短呢...著短裙仲怪啦~~仲話要超短添...唉...
雖然大部份都係唔同款...不過只要各位著得舒服又靚既話...其實都唔駛一式一樣既!!
試衫過程無乜遇到黑面...態度好好...妹妹仔又親切笑容滿面...係 Gloria 有 d cool...不過有時佢都比我地引到笑呀...哈哈~~~因為班姊妹實在太搞笑喇...!!
呢間公司係人太多...地方太少...款式大路都好容易揀到...
好開心...暫時都好順利下!! 不過 fitting 係最易出錯既時候...希望到時 ok 啦~~!! ^^
