姊妹手花

噚晚整左一個姊妹手花...終於搞得惦將條珠鍊連落個手花度...經過幾輪人仕試戴...個個都奇怪係我整...@@!!   有乜出奇o者!!!!  我讀書時成日做壁佈架...間中都拎過下獎架!!  手作仔只要有心機都 okay 見得下人架!  不過越大越懶又學識依賴...心中已無乜o個團火...!!   而且屋企有個萬能勇士...見我整親野都叉隻手腳埋黎...所以更加磨滅我既鬥心...因為我明白女人有時要扮蠢的道理...嘿嘿~~

當然同其他專業制作比...我o個d梗係劣作啦~~ 如果係用黎賣比客就梗係退貨收場啦...但係做比姊妹...我諗佢地應該會收貨掛...heehee~~ 今日我上司讚做得幾靚呀...不過佢問我做乜唔用真花...我奸笑咁話 : "我o個個梗係真花啦...慳黎豪自己丫嘛~~ "  講係咁講...我都係習染左 blog 界新娘子既氣氛o者...係都要響呢段時間搞呢樣o個樣...唔搞就周身唔舒服咁既樣...大概做 DIY 可以分散下緊張既心情...而且將來有點回憶...其實做一個手花...背後既意義仲大呢~~

越接近婚期...相對於緊張...我反而覺得係唔捨得呢段日子多D...因為應該唔會再有呢個機會 (哈哈)...今日先同阿B講...10月18日我地做王子公主 (咪笑!!!)...10月19日我地就做番平民...10月21日我地就扮富豪環遊世界十多天 (只限西歐某幾國)...之後返黎就變番做庶民......仲要隱居...因為已經山窮水盡了.....

心情真矛盾...其實我應該開心去面對去迎接呢個大日子...但偏偏呢個時候出了點問題...心情難免有點影響...有點挫敗感...不過經過姊妹們的安慰以及發洩完...反而輕鬆了...我還可以對人說...這兩天的眼淚已流晒一年甚至幾年的眼淚 quota...哈哈~~ 其實有點害怕被人看到軟弱的一面...偏偏響呢個時刻黎失控...我平時EQ好高架嘛...唉...真的很羞家...不過...我都認同好多 blogger 所講...搞婚禮期間...真係可以睇清楚邊d先係朋友...睇到朋友既真性情...其實我都只係需要別人的幫忙...而唔係捉我地有咩做得唔完美既地方...善意惡意我會識分......

喎!?  講得太遠了...標題是 : 姊妹手花啊~~ @@!!

有初稿喇...仲有d後期功夫未埋尾...試戴黎睇下效果得唔得先...個個見到條粉紅色珠鍊好鍾意呢...

隻手好樣衰...!!  影出黎效果都 ok ...我覺得幾柔和...襯番d姊妹溫柔既個性...hahahahaha~~ 睇番我整兄弟o個個襟花...好似樣衰好多...咁就o岩喇!!  嘿嘿~~

搞左咁耐...仲係無甩皮甩骨...即係測試成功了...得閒就整埋其他先...

完成後再 post ... 伴娘答應幫我整蝴蝶結...因為近黎要左騰右騰周圍去...有佢幫我分擔下...我 d 懶根又可以出黎抖抖氣了...我覺得綁蝴蝶結係最難最用時間架~~ 辛苦晒喇!! ^^

***

今晚去左酒店傾 " 咩料"...其實都係傾下d細節...仲係未定菜式...不過當 Yanny 聽到我地咩都唔駛用佢做o個d...佢有點奇怪...哈哈~~ 我地幫你慳番唔少功夫...你係咪都要幫我地爭取番d野呢?!  等你消息啊!!

聽日去傾 backdrop...其實我都無乜 idea...聽下有咩意見...加加減減算了...實在諗唔到野...又懶搵資料...

 

 

折墮就是這意思嗎?!

折墮這兩個字很討厭...起初聽到有點反感...但這兩個足以形容今晚我的心情...從沒發生比這更折墮...令人更難堪的事...

從籌備婚禮到現在...雖然無時無刻都會感受到壓力...不過我總相信自己會嬴到無形的壓力...總相信會一一解決到...

其實我好易喊...不過逞強的關係...不愛在別人面前輸掉面子...總會以笑帶過...總會忍忍忍......有點虛偽...但在至親面前...我會撒野的哭個痛快...

在這段不長不短的日子...為了婚禮...痛哭過兩次...其實兩次也是沙上的問題...

第一次是因為請誰和誰而引起了紛爭...最後嬴了堅持...但其實是輸了...因為不值得為了無關痛癢的人去堅持而引起爭執...

今次的聚會實在難堪...令人意想不到...姊妹裙不喜歡就算了...為什麼要私自 hold 單?!  甚至無不好意思的樣子?!  還叫我自己去同人理論點解可以比你 hold ?

估唔到我份 rundown 會引黎勁噓~~ 連上頭地點都列入討論範圍...真的令人意想不到...

我諗我要發聲明了:

(1) 選擇酒店出門...係因為想方便大家黎幫我出嫁...唔駛大家神咁早入馬鞍山 d 新界地方...以及我唔想家中的老人家要在大班人接走佢個女之後...要自己孤獨的清理現場...掃地拖地執垃圾...我唔忍心............這可以理解嗎!?  要再解釋嗎? 

(2) 點解要選擇在家中上頭而又不在酒店上頭...其實係因為我媽媽已離世...所以想在家中拜神...話比佢知我要嫁了...雖然我無宗教信仰...但我選擇我媽生前的信仰去告訴她...可以嗎?!  難道要我拎埋家中神檯幅相去酒店上香嗎?!  點解要在我傷口上再割一刀呢?!  為何要質問我呢?  這不是我家事嗎?!  對你們有關係嗎?  即使我在街邊上頭都唔會影響任何人...是嗎!?  另外...上頭不是我和阿姨兩個人既事...我仲有爸爸...細佬及親戚...就算係我可以響酒店上頭...但我唔想佢地成班人咁夜自己走...咁我一個走有咩問題呢?!  或者係出於關心我...我話無乜特定既吉時...都無乜所謂...又話既然要做就要擇吉時黎做...咩唔吉利?!   我地雙方屋企人都無問題...外人點解反而睇唔順眼呢?!

(3) 已經好頭痛座位問題...而且地方有限...有幾檯已經要放麻雀位...有人的提議應簽名時派埋小禮物...我都做過姊妹.... receiption個位置係好busy...mark 人名已經好混亂...仲要再混亂?!   所以我地決定係等d 賓客坐好晒先派...確保每個人都會有一份...我唔介意有人拎多...不過我介意亦唔想有人會無...因為呢份真係我地既誠意...所以我地覺得呢個方法係最好既...如果覺得我地麻煩...可以選擇幫定唔幫...而唔係去質問應該點點點...我唔係話我地決定既係最好...不過當中會有我地既原因......  放過我好無?!

可以協助我們的決定而唔挑剔我們的決定...可以嗎?!  可以容忍我們一生人一次的重要決定嗎?!  可以尊重我們一次嗎?   可以嗎?   可以配合嗎?!

今日係姊妹 gathering ...唔係聲討大會...我只係由始至終要求過為我著一日姊妹裙...點解變成咁?!  再著有咩意思呢?!  而且我都唔敢叫你平時幫咩手...

***

之後打的一大段...不小心按錯制...全部無晒...或者個天想我忘記........但真的可以嗎?!

 

DIY 襟花 & 手花 (初試版)

今日繼續努力進行我既 DIY 項目...因為成日比人噓所以要發奮...一口氣整左7個兄弟襟花...8個親友既襟花手花...手指頭好痛...剪鐵線好痛...最後要勞煩阿B幫我剪...因為近來我手臂唔知咩事成日好痛...唉...唔係呢樣就係o個樣痛...好煩~~

其實仲未完成...因為買左既絲帶粗過頭...所以要再去買過先可以整個蝴蝶結...不過都有初稿喇...阿B話值八十分...heehee~~ 佢仲話估唔到我一發力就整到...你估我吹水架?!

兄弟襟花...用左紫色小牡丹...加粉紅色茶花仔...ok嘛?!  已經加左 T 字扣...扣起睇過都幾靚丫~~

七個襟花...整埋個蝴蝶結就大功告成喇!!

影相期間...我隻狗仔又黎搗蛋...今次仲扮影后呀~~~ 用個 pat pat 上鏡呀!!

因乜佢今次用個 pat 搞搞貢呢?!  答案係阿B響花園整緊野...佢要一心二用...一邊 (塊面) 昅實個門口等阿B返黎...另一邊 (籮pat) 用第三對眼黎阻礙我~~!!  可惡呀~!!

另外親友o個 d 就用橙黃色小牡丹黎做主花喇~~ (要夾番之前響 Trinice 訂o個幾個襟花手花~~)

一大堆襟花手花...又係要等蝴蝶結...聽晚去買絲帶...希望早日能夠完工~~~

仲有姊妹手花未整...姊妹會用粉紅小牡丹做主花...搵日再開工~~!!  yeah~~ 我乖嘛?!

 

 

 

 

DIY 簽名筆

今日放工後...全日都在派帖...先去中環搵阿B舅父...再去荃灣搵佢表弟...再去馬鞍山搵我伯娘...之後同黃老闆食晚飯...再接住去大埔搵阿B表哥...好彩我搵唔到我兩個堂大佬...如果唔係就要去埋 Tuen Mun!!   又派左部份帖喇...夜晚堂大嫂打番電話比我...佢叫我寄比佢地就得喇...好野...慳番d時間~~ 不過佢話o個日撞期呀...佢唔黎喎!!  是旦啦...佢同學嫁女係親過佢伯叔嫁女既~~!!  有約在先...我明既~~

今日去探伯娘...佢而家一個人住...精神都唔錯...唔知點解...覺得佢好寂寞...以前佢屋企好熱鬧...家下得佢一個人冷清清咁...總係覺得佢地屋企出左d 問題...um...其實點解唔可以多d關心老人家呢?!

***

成日比人哦...今日終於的起心肝去整野喇!!  不過阿B都係睇我唔順眼...我整整下佢叉隻腳埋黎幫手...哈哈~~ 佢仲哦我...話佢D野唔駛整咩?!

新鮮出爐既簽名筆...!!!!  其實個筆咀仲未整好的...!!  整左八支每隻色兩支...應該夠掛~

四色簽名筆~~ 紫加黃既組合幾搶眼...仲有四色絲帶呢~~ 特登整隻蝴蝶結同筆桿唔同色...HEEHEE~~~

仲有個筆咀未搞惦...如果唔夠時間可能就咁算了...咁都好丫...可以比賓客分到係咩顏色添~~ (懶人的借口...呵呵~~~)

呢個就係我既製造工場喇...!!  相當之混亂~~~

仲有襟花 & 手花進行中...努力~~!!

 

 

 

婚檢有結果

上星期六我地去左做婚前檢查...今日姑娘就打電話黎講報告比我地知...結果兩個都正常!!  無地中海貧血基因...無愛滋...無糖尿...血液正常...小便正常...德國麻疹ok無問題...不過驗到我係敏感體質...正常應該係 0-6...但係我 over 10 @@!!!   因為我有鼻同皮膚都敏感...um...無得醫的!!

而阿B就無乙型肝炎抗體...相反我就有大量抗體...可能我曾經受感染過...不過自己打嬴左好番...所以姑娘話我好幸運...因為唔係咁多人會打嬴...叫我只係 2-3 年後再驗...如果弱左就打支加強針就OK喇!!    至於零抗體o個位曾先生...就要接受 3 支針的痛楚了...哈哈哈~~~ 咪話我嚇你...想當年我打甲型針係好痛的!!!   好彩甲型只係打兩支...你要打三支呀!!!!!!!!!!!!!! 

為左就番我兩個月後打既第二針...所以阿B必須響10月頭打佢既第一針!!   咪做 " 淆底王" 呀下...快d book 時間打針呀))))))))))))))))))))))))))))))))))))))

又完成一個項目...兩個都健康...真開心!! ^^

渣打慈善紀念鈔票 & 買西裝

之前入票申請左三個 no... 只有一個中左...嗚~~ 我地結婚日期o個張抽唔到呢!!!   抽中o個張會響 Oct 4 去會展拎...今次都係靠伴郎家人既運氣先抽到...真係唔該晒啊!! ^^

***

今晚約左黃老闆, 黃大少, 黃二少去買西裝...搞左幾個鐘...終於都揀到心頭好了...不過仲有對舅仔鞋未買...下星期取衫時再去揀...

又完成一個項目...努力!!

原來黃老闆早兩日扭到條腰...不過佢無唔話我地知...希望佢快d好番...叫左佢未好番就要忍手唔好去打羽毛球...希望佢聽話啦!!

***

另外...姊妹Y幫我買左兩盒半島月餅...不過原來嘉麟樓先係傳說中好好食o個隻...但係我覺得呢隻已經好好味喇喎!! @@~!!

***

仲有三個星期...不過仲有兩個大項目未傾...就係未揀 menu未定圍數...同埋未傾 backdrop !!

***

今日黃大少話我地張帖靚...佢問我要一套 (中式 & 西式)用黎留念...有人欣賞...真係開心...不過佢既一 set 意思...包唔包埋裡面既其他物品呢?!  (例如: 餅咭, 回禮利是, 地圖, 相片等...) 哈哈~~~

其實就算無人 keep 都無問題...起碼佢地收到睇左有反應就滿足了...

同事拎左返屋企比d家人睇...好開心對我地張帖有興趣...而且"鄧"我地開心!!  可能因為佢地年年都問...終於今年有結果...而且佢地又可以派少四封利是...有d仲可以袋番兩封或四封...所以特別開心...哈哈~~ 我地宣佈結婚簡直係舒解民困既好消息...!!

有人問我點解又決定結婚...哈~~~ 我咪話襯熱鬧囉...今年娛樂圈咁多人結婚...見好玩咪玩囉...不過我地其實都無乜張揚到...好少話比人知幾時結婚...但係唔知點解個個都話一早知 @@!!!   唔通公司都有狗仔隊?!  老闆個仔仲話佢一早就知 @@!!   乜我地印左 " 要結婚 " 三個字響額頭上面嗎?!   其實唔係想刻意低調既...不過唔想咁煩成日比人問...而且費事未搞好就周圍宣佈o者...我點知有乜變卦架...嘿嘿~~ 不過見到佢地收到帖o個一刻好開心...仲話終於都等到...又話早就應該...覺得好搞笑...估唔到我地都會比人有期待...哈~~

有個同事仲搞笑...問我係咪有左?!   我話唔係...佢叫我跳兩野比佢睇...咁我咪跳囉...!!  信喇掛...!!  有左~~~~~肚腩好耐就真!!

***

仲有部份親戚朋友既帖未派...呢個周末要周圍走了...而部份姊妹及兄弟既帖應該響下星期都會派埋...咁我地既放炸彈行動就會完滿結束了!!

JB CHEQUE TO MY DEAREST SISTERS

為左令接新娘環節更搞笑...所以秘密為姊妹們設計了一張大支票...到時佢地一定好驚喜...笑爆咀...哈~~

初時諗住比人整...兩個星期可以交貨...雖然報價黎係好平...不過個 sample 太簡單...唔係好靚...真係好似籌款o個d支票呢...

之後又見到另外有人用卡通公仔做張 cheque's 主角...靚好多...唔用卡通又可以放相都得...不過問過價錢就好貴...兩百幾元呢!!

我知百利都有得做...不過未得閒去問...問下阿B意見...阿B話自己做 @@~~ 所以我地DIY項目又加多了一樣喇~~

整左個初稿出黎...係我地既婚紗照...佢依照真既 cheque 做藍本...不過覺得效果麻麻地...但係已經覺得好厲害了...

再改進下...覺得加上大口仔公仔更好...真係好好多喎!!  有logo...有大口仔...有我地張相...真係好似出奇蛋...滿足晒所有既願望啊...!!

我地會拎出去比人做...背面加埋 foam board...哈哈~~好期待頒獎既過程啊!!

Final Trial & 揀飾物 (PART 2)

第四個 look 係進場...佢 set 到個髻好怪...好似道士咁...呢個 look 影到我好肥...簽字既look...真飲恨...初時仲揀個大皇冠比我...OMG!!  娘爆...家下唔係選 MISS HK 呢...太誇就變得娘了...而且唔覺得顯得個頭好長好怪咩?!  我鍾意簡簡單單一個小頭冠...一串珠鍊就夠靚了...我唔要咁多野堆砌響我身上面...始終太複雜既野放響我身上就會顯得格格不入...戴左呢個教宗冠...我覺得頭頂有好大壓力...條裙已經好誇...我覺得其他唔駛再誇都已很夠了...由頭閃到尾有夠白痴...好娘...好土...公主病咩?!!  我已經讓步揀左呢條唔係理想既裙...佢地話要閃要誇...其實我好唔鍾意...好抗拒...人地嘩嘩聲...通常亦有包含負面反應囉...我覺得著左好論盡......我仲煩緊點坐得好黎簽紙...我都唔知點放好條裙...好擔心......到時實好緊張...又要顧條裙...有點洩氣......我驚到時...通常人地感動到喊...我係擔心到喊囉.....

其實佢地比意見我...不過接受與否...其實應該屬於我囉...不過我唔鍾意...我話唔得唔好既佢地就黑面比說話我聽...即係要我屈服咩?!  次次都係咁...我好唔鍾意!!  如果我覺得ok...佢地又覺得 ok...咁先可以通過嘛...而家唔係由佢地話事囉!! 

大皇冠...真係接受唔到...我唔係公主病......唔似戴左頂鴨咀帽咩?!

雖然呢個皇冠唔係咁閃...不過我覺得戴左自然d...覺得襯我d...

反面咁 set 晒上去好似仲好...無咁肥~~

呢個都係上次既look...如果佢前面識得幫我整好d...應該會好 d ...我去影婚紗相o個 d 都識幫我整...唔明點解佢唔識整囉...乜 mua 唔係要收正我既缺點既咩?!

我似唔似謝安琪...haha~~ 飛飛頭!!  總係一睇就覺得我似地中海戴左假髮~~

接住黎既係敬酒 look ...不過我總係覺得整得怪怪...我話成個牙擦仔 look...佢地又話唔係...有特色喎?!   究竟我既感覺重唔重要既呢?!  連自己o個關都過唔到...我仲邊有自信見人...邊有信心著得好睇呢...我驚到時我 C C 縮縮囉...o個個網...唉...好似我爸以前賣水魚用黎裝水魚個網呢.....

成個菱形咁...呢個 look 襯條裙咩?!  =___="

我就係比個網捉住既水魚喇...

um............ 真係得咩?!   靠害.......

d頭髮整到咁拱...我想問個頭頂d頭髮會點整好呢?!  總係覺得有點阿差婆 feel...仲欠條巾遮面...

上次o個個感覺好似好 d...

 

到最後一個 look ...亦係我至失望既 look...整左幾個都唔滿意...呢個又太似先前迎賓o個個...而且呢個邊係頭飾黎呀??  頸鍊黎架喎!!   你會點幫我整呢?!   一定要夾好多夾先定到啦!!

吊落黎o個抽野...會點處理呢?

好似d山地姑娘......

個鍊扣...好明顯係一條鍊黎...咁用黎戴啦...要搵個頭飾先得!!

綜合今次試 look 同揀飾物...比第一次求其...基本上得個迎賓係 ok d ...其他好唔惦...試完好唔開心...加上...o個個 Maggie 又馬後炮...話其實呢個唔得o個個唔得...我問佢點解當時唔講...佢又話當然幾個比較係好d...即係全部唔好之中揀個好既...咁咪即係唔好囉!!  唉...........................................  想喊~!!

好擔心......

Final Trial & 揀飾物 (PART 1)

上個星期六約左大S試妝...今次佢帶埋前面o個執假髮比我試...不過我總係覺得戴左好怪...但佢地又話唔怪...我就覺得戴左之後...條界好唔合邏輯咁...而且戴左感覺唔舒服好唔自然...但係佢地又話唔係...但我呃唔到自己囉...想催眠話好睇真係唔得囉!!  有種羅家英的感覺...所以我決定 BIG DAY 唔會用呢 PAT 野...用左我驚後悔一世...到時會燒晒D相無眼屎乾淨盲囉!!

睇番輯相...見親呢PAT野個心都好唔舒服...好唔開心...其實而家都整得唔好...到時咁趕又點會整得好呢?!   諗到呢度又擔心又驚...但係居然無人講真心話比我聽!!!!!!!!!!   Maggie我知佢根本唔想我靚...見佢秘秘密密搞咁多野...無一樣係幫我扮靚...只係為佢自己...電髮...電眼睫毛...加大量金錢做 facial...周圍試 girdle...搵飾物...買鑽石手鍊...買貴鞋 etc...人人都想自己靚我都明...不過唔明點解佢太緊張佢自己囉...所以我開始唔相信佢講既說話...而且佢d taste實在太....................

首先試褂 look ...上次個造型都ok...不過今次我頭髮長左好多 (長多1/3呀)...再咁扎起就唔似set左頭...好似好混亂咁...所以想叫佢改做髻仔...我覺得會整齊d...感覺爽d...而家好似普通將d頭髮束起放埋一邊咁...um...點解佢地話ok既呢?!

側面睇...好咩?!  好厚重......而且前面o個執野...分界位真係好礙眼......唔關頭髮同唔同色事...根本都混合唔到...拱左出黎...邊有人d界線分到咁架?!

上次試妝既頭髮既長度...反而上次既頭飾仲好~~

明顯無乜心機整...只係覺得好混亂...加上又無上妝...所以靠估效果囉...

上次整得好好多囉...

響另一邊睇...都唔覺得靚...um...咁樣真係好嗎?!

成 pat 野咁...太長頭髮唔o岩咁扎...=__=   插埋 d 花...好似傻婆咁...現場睇都唔覺咁差...原來影出黎既效果係好差...

上次後面都整得好 d...側邊唔太多頭髮感覺好 d...

第二個係外景婚紗 look ... 不過我覺得 set 到咁行去影外景有d格格不入...反而呢個造型用黎進場會好d...不過我條裙又係泡泡活潑型...如果 set 呢個高貴look又怪怪咁...唉...有點擔心...其實點解無人可以比到意見我呢?!  我話有問題時...個個都比唔同理由比我去說服我咁...不過總係說服唔到我囉...其實好坦白講...佢地應該都覺得唔靚啦...不過又唔知set乜先會好睇先唔出聲o者...換著係我都會啦~~!!  太成熟的樣子...咁既look去影外景...好似老多十年...

反而我覺得上次咁整仲清新...夾番外景個 feel~~

個 feel 同條裙會唔會唔多夾呢?  而且阿B又著白色禮服加波鞋...好causal...我 set 得咁成熟...會唔會好似姐弟 feel 呢?!  @@!!!

前面o個 pat 真眼冤...好唔得~~ 一陣人地以為我禿頭呢~~

 

第三個試迎賓 look ...呢個感覺好d...時尚d無咁老土...而且起碼似係 set 頭囉... 不過 d 紫花...好唔得...好殘舊...但係佢地又話無問題...唉...我家下唔係影婚紗相...個個現場睇得好清楚架...試到呢度...真係好唔開心...不過我都唔知可以點了...睇我試妝個樣就知我好無mood..................

希望到時佢整得整齊 d 啦~~

好顛婆 feel...唔明點解蝴蝶結就唔ok...呢個就話 ok???  唔娘咩?!  而家要等埋 couple 比 d 咩飾物...呢個我覺得好唔惦!! 

 

前面o個 pat 貼住個頭好唔自然...

呢邊還可以...希望到時佢會set得好 d...

上次有心機整...感覺好 d...

後面...都係希望佢整好 d...

點解差咁遠既?!

to be continue.... (Part 2)

http://hk.myblog.yahoo.com/jew903hk/article?mid=2079