電髮!!!!!!!!!

一直以黎...我都係直頭髮...因為我唔多識打理...又驚電左好成熟好女人...所以都係簡簡單單的算了...我頭髮又薄又幼...好多時d人會覺得好羨慕...成日都話好柔軟...不過對於我黎講...其實我唔鍾意咁幼咁薄...我又天生有少少鬈 (但唔係鬈得靚)...所以次次吹頭都要吹到好乾先得...如果唔係就會左飛右曉...所以我無乜點轉變我既髮型...

影婚紗相時d髮型師就覺得我 d 髮質容易 set 頭...但係影下相係d短時間梗無問題啦~~ 之後會好快轉...而且鏡頭會就位...所以無乜大問題......

不過上次試妝後...化妝師叫我最好電下d頭髮...咁樣會有d彈力...咁set頭會靚d...唔會成個頭扁扁咁...

化妝師叫我最好大日子前兩個月去電咁會自然d...不過我十五十六左好耐...又懶去...平時我一年只係剪一次髮咋@@!!!!   一拖再拖之下...家下仲有個半月左右...數下數下...黎緊兩個 SAT 都唔得閒...又唔想 SUN 去搞...終於的起心肝...今日鼓起勇氣去髮型屋搞搞去!!

其實我都唔知點電...呢排o係街好變態咁成日昅女...發覺好多人都整得幾靚下...不過又唔知啱唔啱自己...無拉拉又緊張又擔心...我都覺得傻傻地......電髮有乜咁大件事?!  駛唔駛咁憂心?! 

終於今日放工...即搭車去荃灣搵姊妹介紹o個間髮型屋搞搞去!!  佢認得我啊!!  佢問我想點整...我話比佢知就結婚所以想電電...不過又唔想咁誇張又唔想要打理...佢問我想唔想 gel ...我話要最簡單o個款...佢問我要咩鬈度...我話唔要太鬈...不過佢話我d髮質咁軟...想好鬈都好難!!  @@!!!   佢叫我電陶瓷...我都唔知係乜黎...是旦叫佢幫我搞搞...

真係好大鄉里咁...各位唔好笑我成日大驚少怪...因本人天生神經質...有事無事關於身體任何一部份都會驚餐死的.....~___~"  其實我都電過髮的...仲響大概四年前電過一次...不過只係維持左三日...實在唔習慣自己個樣...所以走左去拉番直...銀包又傷頭髮又傷!!

之前都見過人用呢舊機器黎電髮...好似外星人咁...鬈晒d髮鬈又用類似百潔布既野包住...之後又插d類似電線既線去個髮鬈度...成個頭定左唔多郁得...當其時我覺得自己個樣好搞笑...成日望住鏡中既自己傻笑...o個度o個個外藉女助手見到我咁痴線...只係對住我好無奈咁笑...我有幾次有個衝動拎部 i-phone 出黎自拍...不過我兩邊都坐左人...我好抑壓自己唔好咁衝動做 d 低 b 行為!!

期間我好無聊地睇左幾本雜誌...間中又恰下眼訓中中下...間中又同髮型師吹下水...原來佢都係今年結婚啊...佢係十一月新娘呢...不過佢話除左酒席婚紗同埋婚紗相搞惦之外...其他佢一樣都未搞!!  @@~~ 所以佢叫我呢兩個月如果想搵佢染髮...最好先打比佢問問... 真係開心呢...今次搞婚禮既過程...好多幫我手做野既人都係將近結婚呢~~

由兩點幾坐到五點幾...終於搞惦...!!  無想像中咁鬈...有d似我洗完頭未乾既樣~~佢叫我唔好咁快洗頭...下!!!  我一日唔洗頭會周身唔自在的!!  仲叫洗完唔好吹頭...!!  下!!!!   濕立立點出街喎!!!

呢個就係我既新 look 喇~~ 其實唔係好鬈咋~~

阿B話我電左髮好似精神左...

電髮期間仲發生左個小插曲...髮型師佢用手當梳咁撥我d頭髮...點知 cake 住左我左邊隻耳環...一拉成隻耳環托飛左落地...差d成隻都趺埋出黎...好彩佢手快幫我按住...都有d痛啦~~~不過都驚咁細粒會搵唔番... 之後成班人幫我響地下搵個耳環托...但係好多頭髮響地下好難搵呢~~~阿曾志偉笑 Ava 應該整跌粒鑽石...佢仲好有科學概念咁分析應該跌o係邊個方向...@@~~ 搵左成個幾字...真係比曾志偉講中跌響佢話既位置附近@@!!!!   好彩搵得番...!!  如果唔係呢個髮真係電得貴咯!!