兩個月的倒數...

仲有兩個月就到大日子...但係又唔太覺得緊張...可能我呢d天生死到臨頭都唔識驚既人 (正確應該係遲鈍怪胎)...到左o個日先曉震都未定...!!

婚禮既大項目搞得七七八八...只剩番d細項目...同d屎忽無聊項目未搞惦...!!

噚晚買完兄弟呔既時候...提阿B快D去買埋D女婿金多寶...佢外父大人成日催佢個遲鈍女...成日話個女忽略佢女婿...真係冤枉阿遲鈍女...~___~"   快D買啦買啦~~ 你外父唔係成日開水喉架!!   不過都未知揀乜...所以都無乜點睇到.....又準備比人哦了......我要買耳塞!!

另外...我地講好會互相買樣野比對方做結婚禮物 (好似聖誕咁交換禮物)...上次珠寶展...阿B買左樣野比我...我當係架喇...咁佢又未搵到心水...我提議過腳架同相機...我比較膚淺...只係基於佢既喜好出發...原來佢心目中唔係咁諗...佢想真正想要份可以用黎紀念又耐用d既野...佢話 : 腳架同相機呢d...因為係結婚禮物...壞左都唔知掉唔掉好!!  咁又係喎...我又真係無佢諗得咁長遠...其實佢比我細心好多好多...我比較粗枝大葉...一正一負的組合...所以我地咪可以cross over 囉!!

佢提議買對錶...但係佢話上次送左野比我...今次到我買...下?!  一對喎!!  咁咪即係我o個隻要自己比錢?  佢真係紀念得過......

周圍睇下有咩錶啱...佢話揀d襟興d既對錶...um...我至唔like d 好女人細細隻o個類錶...我話我要boy size先戴!!!!!!   佢話要長大啦 (的確只係思想未長大...身體同年齡的確已好大...)...唔通到老o個時仲戴隻boy size既錶咩?!  ><"   我比錢唔係有話事權既咩?

經過信和...好多時款錶賣...不過我地醒起...要買老餅對錶先啱...所以改去d老行睇...九龍錶行...喎?!   家下都賣時款錶既?   老牌子好貴下喎!!  你條茅利...趁結婚想開我夾萬 (空心既) 搶錢?!   之後我地又經過金鋪...嘩~~~ "努"力士呀!!   好貴好貴...要好努力搵錢先買得到!!  不過我地不約而同話 : 戴左人地以為我地戴既係 A 貨!!   Cartier d 錶都好靚...不過又係好貴...!!   終於 window shopping 完...得啖笑...都幾開心丫...兩條無聊粉腸粉皮扮晒勁咁去學人睇貴野!!  差在面皮未夠厚試戴下過下癮咋...

可能最後我地買左對 " 天長地久 " 鐵達時都未定...貪佢夠貼題嘛!!  哈哈哈~~~

***

另外...今日收到 Ron e-mail...除左介指枕外...其他都有初稿...改左少少野...佢好好人...儘量幫我整埋個介指枕...仲約埋星期四交收...太感激了...!!  ^__^ 

每日都充滿期待...係最好的動力...我驚結左婚之後我會好失落好失落...因為我而家先覺得好好玩...我中左 blog 毒...話晒我既 blog 齡好淺咋~~ 我都未學滿師!!  blog 界既人實在太厲害...好多 DIY items 都令我歎為觀止...好羨慕佢地既手藝...真係好欣賞!!

自從搞結婚之後...覺得做結婚呢行生意真係好好搵...而且搵既係開心錢...別人開心自己都會好開心...有d興趣學下呢d生意呢~~~不竟而家做緊既公司前景不太樂觀...阿B又未落實養硬我響屋企煲~~~~~~~劇 (唔係湯) !!   所以...我係時候要諗下自己除左已經厭倦既會計行業...仲有咩出路可以行可以闖可以開大廠?!  做咩好呢?

***

噚晚阿B突然對我講...好彩 Dongwan 去左當兵...如果唔係我就會分心...佢叫我不如將佢當做"神話"忘記佢?!  唔係嘛?!  都話你妒忌佢架啦!!!   等我聽晚開佢情敵隻演唱會 DVD 刺激下佢先得!!  呵呵~~